بن داخل {درس في اللغة !!!!!}

[ابو عادل]

سلام الله سلام الله ومن بعد العلوم علوم=وابن داخل خوي الجنب غاب وغابت اخباره
معلّم فاللغة يقرا عن المجهول والمعلوم=لكن علمه على حدّه ولاندري عن اسراره

[بن داخل]

هلا يامرحبا ترحيب مايخطي زعيم القوم = زعيم كان يامر فالبلد ومهجد الحاره
تعبنا فالنحو مانعرف الظالم من المظلوم = ولا ندري عن اللي قدم المفعول واختاره

[ابو عادل]

ياراعي الثوم لوغسّلت باقي فيك ريح الثوم=طبع ريحه على راعيه في يمناه ويساره
ألومك ثم الومك لاتقلّي ماعليّه لوم=ولوتحلف يمين مغلّظة تلزمك كفّارة

[بن داخل]

تهيا لابن داخل وانت لامعطى ولا محروم = تزهمل فالحرامي ثم بعده تطلب بشاره
أنا عارف بعير القوم لجل انه عليه وسوم = عيونه في عباد الله وكل السم في كاره

[ابو عادل]

أنا مكرمني الله كلما انزل في بلد محشوم=ولاحدّتني الهجرة على دعمر ولاداره
أمدالساق واتعب واجتهد واحصل على المقسوم=وراعي النار مايلقى حطب ويشب به ناره

[@ بن سلمان @]

الله الله
بيض الله وجهك أبا عادل
جريت لنا بن داخل وعلامة الجر ظاهرة على اخره

[ابو عادل]

ووجهك أبيض ياأبوهبة
كلمافي الأمر اني أبراجع معلوماتي في اللغة العربية مع شخص متخصص
شكرا لك ولحضورك .

[أبو عبدالرحمن]

ما شاء الله تبارك ...

لا إذن ولا دستور!!!

كلاكما ممنوعان من الصرف!!!

[حسن عابد]

الله الله الله كلام على اعلى مستوى فاللغة واصلو ونحن نتابع

[بن داخل]

وجيهٍ ظاهره ووجيه تخفيها علينا اليوم = يابو عينين لاتبلى عباد جوك مراره
أنا عارفك وسط السوق تاجر ماعليك رسوم = تبيع وتشتري وتقول للاسواق سمساره

[ابو عادل]

حياك الله ياأباعبدالرحمن
ماعليش شفناك ماانت موجود قلنا نسرق لنا نصف ساعة قبل يجي لكن مامدانا
ولوأنك الآن فعل متعدي الى مفعولين ولكن تجاوزا نعتبرك أداة عطف.

[ابو عادل]

حسن عابد
حياك الله ان حبيت تحضر الدرس استأذن من المدير أبوعبدالرحمن والحصة بمائة ريال خصوصي وان دخلت بدون اذن وقفناك على رجل واحدة جنب السبورة ووشّك للحيط.أيه دا؟ هيه وكالة من غير بواب؟

[بن داخل]

بن سلمان جرك كلب مسعور
وش شايفني مهاجر
كل مافي الأمر ان الجهاز تعطل وتحرينا الفزعة لكن ماش فايدة
وعربنت في محمول يالله يارفاقه الفزعة رقم الحساب 123456789

[بن داخل]

أبو عبد الرحمن هذا عصيان مدني
وش طالع بيدك
هات الفرقة حقت الجهاز وابشر بسعدك

[بن داخل]

حليفي حسن
ودنا نعطي اللي ضيعو لغتهم دروس حتى يعودون لها
خلك معنا رايح تستفيد

[ابو عادل]

أنا شاري ثيابي من فلوسي والسلف مذموم=لكن انته تدورللدفا في لبسة العارة
بعدقالوالي انك من رجال يفسّرون حلوم=تفسّر حلمنا والا يجي للحلم عبارة

[ابو عادل]

نستأذنكم الآن وقت النوم ونكمل بكرة بمشيئة الله.

[@ بن سلمان @]

لا لا
يا لرقود
وين عادل ينضح عليك ماء

[حسن عابد]

حليفي حسن
ودنا نعطي اللي ضيعو لغتهم دروس حتى يعودون لها
خلك معنا رايح تستفيد

ياخوي جايكم نقل تأديبي وتقول استفيد وابو عادل يبغى يضرب الطلاب ويؤدبهم نسي ان الوزارة تحاسب المعلمين على مثل هكذا عقاب
وينك ياماعندكم احد توريهم نجوم الظهر ياحبي لك ياشيخ
ابو امجد مايدري عن علومكم ولا كان له راي ثاني

[الشيهان]

بدع ورد قوي جدا بحجم الشاعرين والمعنى اقوى من المبنى ومسيقى راقيه في هذا البحر

الاخ حسن عابد الله يهديك ودك تورطنى مع هذين الشاعرين حتى اقع شر وقعه لكن ترى اخوك مجنون صاحي لحوايجه والا الكلام كثير بس حساب العاقبه مهم هههههههههههه

[بن داخل]

ثيابك واجده لكن لك ثوب بغير كموم = ليامنك لبسته يامشيلح ينقز زراره
تريح في منامك لاتحسب ان المنام يدوم = تبي تصحى وتلقى عن هذاري النوم قفارة

[ابو عادل]

(أنا عمك واناهمك) وابازيد الهموم هموم=ولوتضرب براسك فالحجر ماطيّر غباره
تبين وتختفي بين الشجر ماتخلق المعدوم=عطاك الله حسب نيتك والايام دوّارة

[ما عندكم أحد]

ما شاء الله تبارك الله
العلمان هنا
#

طاب صباحكما

ـ تحرير الصياد

[ما عندكم أحد]

وينك ياماعندكم احد توريهم نجوم الظهر ياحبي لك ياشيخ


أبا علي
لا تتمنى شر
اراهن على أحساسك أنه بيتغير

[بن داخل]

أريتك يامشيلح فالملاقا تنسدح وتقوم = وتحلف ماتعود فالطريق ولا فدواره
لكن لوشفتني يمكن تموت ونكتب المرحوم = نقز فالدرب وتهيا له فطرقته سياره

[ابو عادل]

تقول اهل المثل ياصقر يااللي في سماك تحوم=غدا عمر الصقر باسباب منداره من اوكاره
حدانا الله على روس الظبا اللي قرنها مثلوم=دسمها لونلمّه مايجي له ربع قطّارة




والختام من عندك بارك الله فيك.

[فـارس الحـرف]

ياسلام ياسلام

محاوره عتابيه وهجوميه وطرفيها كبار

تحياتى

[بن داخل]

أنا ويامشيلح فالملاقا دربنا محشوم = نبيع ونشتري والسوق في تدبير تجاره
وباقي فالليالي المقبلة نكوي على المسقوم = ويبرى من دخله السقم ويعود لمقداره

أشكرك أخي الكريم الذي أسعد بمجاراته وأجد من المتعة مايجعلني أسابق الدقائق لمعرفة ماتخطه يمينك المميزة وختاما أتقدم بالشكر لكل من تابعنا

[ابو عادل]

بن داخل
سلمت ولي الشرف أن ألعب معك فالقاف معك له مذاق آخر
ونتمنى أن يستمر حضورك الوهّاج.إلى اللقاء في محاورات قادمة ان شاء الله.

بدر العجمي
رفع الله مقامك فأنت أكبر من المحاورة
أشكر لك تواجدك الذي ينم عن اهتمامك
ومتابعتك المستمرة لإخوتك بهذا المنتدى
الذين يفخرون بتواجدك بينهم فأنت امتداد لهم.

ماعندكم احد
شكرا لمرورك.