عز الله انك يالمخاوي سنافي

[@ بن سلمان @]

salam:
مساكم الله بخير والله لا يجعلكم في ثوبي ثوب الزرى والعلوم اللي تودي الرجال ورى
البارح بعد ما سرينا من عند ابن ابي محمد في محاولة رضوة منقاش على ولد اخته عصريه رجعت البيت وتسندت على طرف مسند والصغار الله يمتعهم باعمارهم اللي يهمز واللي يصقع في اصابع رجولي وهي تاخذني الدنيا في سجة واتفكر في حالهم لو ان الله يعاقبهم بخال مثل منقاش وانا اعود احرف الفكر يم جده وايام الدراسة فيها والياني ما اتذكر الا قلة الحيلة وضيق اليد وانا اعود اردها يم نجد الا وحالي يوم انصفق يوم تذكرت ان ما مجليني منها الا الحر وشمسها وانا ادور الفكر يم الشمال واخص بعد حي اهل طي وليا مخاوي منقاش الله يمسيه بخير هو والسامعين يوم ارتسم محياه قدامي وانا اتذكر العلوم اللي تجيني عنه وانا اعدل جلستي وقعدت وكتبت فيه الابيات التالية هدية محبة وعربون صداقة :



عز الله انـك يالمخـاوي سنافـي =صحبتك ماهي صحبة البوق والكذب
ماشي دروب العز والقلـب صافـي =ما كنك الا جم ورد ( ن ) يجي عذب
واليا بديت بعلـم تحمـي القوافـي =وحقوق ربعك دونهـا دايـم الـذب
ينصاك والله من له الوقـت حافـي =يلقى لبوس العـز ضافـي مهـذب


يستاهل مخاوي منقاش كل علم زين وهذا اللي ليا قالوا الوجه ما هو مثل القفى

[محب الجميع]

ينصاك والله من له الوقـت حافـي ........ يلقى لبوس العـز ضافـي مهـذب
صحيح من قال انه مايعرف الذهب الا هل الذهب
ومايعرف الرجال الا الرجال اللي مثلها .ومخاوي منقاش .كريم وسنافي يابعد حي .ياحايل واهل حايل.وانت يابن سلمان دايم راعي الاوله .ماتنلحق .ياعسى عظام اللي ورثوك للجنه والسامعين اجمعين .

[منقاش]

يا حسرتي عليك يبن سلمان , ويا حسرتي على ألأبيات اللي عنيت نفسك بها ترجي من وراها تميرات وانت ما أنت داري أنك تنفخ في رماد .
شوف المدح اللي في مكانه مدح أبو عادل لمنقاش اللي تلقاه حزة الله الله على يمناك وتشوفه يوم الهيجاء في أول الصفوف يهدر ومطلع لهوانته مثل البعير الهايج .
واما مخاوي فهو خاوي وعلمه هاوي ولا يجيك منه الا البلاوي .

[مخاوي منقاش]

الخ ابن سلمان اشكرك على المشاعر الصادقة 0000
محب الجميع انا دايم اوزع النصائح واقول لك ترى اللي يحب الجميع يتعب في هالزمان لان فيه ناس بتقدر وناس مثل منقاش يعتبرها ضعف ويتفرعن عليك واسال صديقي ابو امجد كلما دق على راس منقاش التوم كل مامشى زي الحمار المعسوف ولكن يبدو ان معدنك طيب واغلى الناس عندي اشدهم ايذاء لمنقاش وفقك الله00
(قل موتوا بغيضكم) يامنقاش الرجال تعرف الرجال وابو عادل حفضه الله منكل مكروه سألوه مرة ماهي القصيدة التي قلتها وندمت عليها قال قصيدتي بمنقاش فساله المذيع لماذا قال لانها القصيدة الوحيدة الي قلتها وانا اكذب 00
وانت يامنقاش تعرف القصائد التي قلتها فيك وهذه بعض عناوينها
1-يالثمالي تايه منهو نصاك
2- قصيدة اورلاندوا
3 قصيدة حمدون
4-ستبقى(---)ماعشت دهرا فدع عنك التسمي بالثمالي

5 الثلج 0000وغيرها واذا يسمحلي ابو عبد الرحمن بنشرها فليس لدي مانع علما ان نشرها سيترتب عليه كشف المستور وكنت ناوي انشرها قبل ان اعلن انسحابي نهائي من المنتدى00

[أبو عبدالرحمن]

أبدًا يا ضيفنا..لن نسمح لك بالانسحاب..

وترك منقاش في الساحة لوحده..

وصح لسانك أبو هبه على هذه الأبيات الجميلة..

[منقاش]

صوم وتدمدم يا مخاوي منقاش وبطل عنك الفضايح لا تسير كما الشق على (.....) .

[الشيهان]

صح لسانك يابن سلمان انت تقدر على اكبر منها ومخاوي منقاش يستاهل اكبر واكبر

ومنقاش بدت تخور علومه الضاهران الشيخ مخاوي منقاش دغله على الجرح فالشاكله

انا من اول الوقت اقول ياناس هذا منقاش وراه علوم دواهي بس الناس تقلي احسن النيه واليوم جات الطامه الكبرى وخرت زيوته قبل ماياكل المطب

حلال في جلده

[مخاوي منقاش]

ابو امجد ترونا ضغطنا على الرجال اكثر من اللازم وبديت انا اشفق على الرجال واعذروني العشرةعمرها ماصارت ببسي لان ربعه تخلو عنه والتهديد الاخير افقده توازنه وانا اقول الموضوع ابي ااجله الى بعد العيد واذا يشرفني بحايل بالعيد ابي احرقها وان جاب ربعه الي خابرهم انذر نفسي لمدحه شعرا وتثرا

[الشيهان]

الله الله على الكرم والشهامه ليت منقاش يتعلم من هذي العلوم

الحين انطبق مافي البيت الاخير من ابيات بن سلمان اللى يقول فيه

ينصاك والله من له الوقـت حافـي *** يلقى لبوس العـز ضافـي مهـذب

اقول ان كان تسمع كلامي خلنا نعيد بمنقاش ونجيب العيد فيه قبل العيد

[محب الجميع]

يامخاوي منقاش انا الاحظ ان منقاش وراه سر خطير .لانه كل مايجي طاريك الرجال ينفجر غضب . ومغير يتفرعن فرعنه .بعدين اذا عندك اسرار وفضايح لمنقاش. نبغاك تسترها . وان عادها لاترحمة. وبعدين اللغز الخطير كيف انت تصير مخاويه .من الواجب هو اللي يخاويك.
الله يكفينا شر مخواتك لمنقاش.لايقلبك علينا .ترا الشيطان شاطر .ومنقاش اشطر فانتبه لنفسك.
وانا والله اني احب الخير للجميع .

[ما عندكم أحد]

يا مغارير بانفسكم
هذه المخاوي لعب على بن سلمان ودهن سيره ما فيها شك وانا كنت متقهوي من يومين عند بن سلمان وجاب لنا على القهوة تمر احلف يمين ما هو من الطايف
لكن ابشروا ان ما انقظ هذه الابيات وارجعكم لعصر النقائض ما اكون انا ما عندكم احد

[مخاوي منقاش]

ماعندك احد الله يهديك ابن سلمان لا انا ولا عشره من اشكالي يضحك علية واحترم عقلا الاستراحة هذا جانب والجانب الثاني سوينا انا وابن سلمان حلف اطلقنا علية محور الخير ويضم (ابوعبد الرحمن واب امجد وابوعادل وكرداشوابن عازب وقزوز بعد ماضبط وترك الرجة ولنكون ديمقراطيين امام الناس ادخلنا زهور وفراشة وشيري لتكملة النصاب والباب مفتوح للجمع المحترمين من اصحاب الا ستراحةوقريبا سنضم رويعي الغنم بعد فك اسرة وتعينة تي بوي للمحورواما محور الشر فمنقاش والمشاكس وماعندك احد وابن فنحاص بوق منقاش الاعلامي وانا اقول من ليس معنا فهو ضدنا 0000
ابو امجد يا حبك للشر 0واناتراني اضعف امام المواقف الانسانبة حتى لومنقاش هو صاحب الموقف وساروي لك احد هذه الماقف اليوم او غداا باذن الله0

[مطر الليل]

يستاهل مخاوي منقاش

[مشاكس]

منقاش
هون عليك ياأخ العرب
كل هذه المدايح لن تتعدى اليومين أو الثلاثة
حتى ينتهي مفعول السكري والخلاص
اللي مهديه لبن سلمان وبعدين تشوف
يوم يعود الكلب على قروه

[مشاكس]

آسف ياجماعة
من كرهي لمخاوي منقاش
نسيت اني أنا ومنقاش بيننا دعاوي وطلايب
بس تدرون أقطع واخس يامنقاش ياحرامي

[الشيهان]

ايه تكفى يامخاوي (الرياجيل )

تصدق مايهون على لساني اربط اسمك بمنقاش الشراني

انا ودي انك تغير معرفك مخاوي الرجال حتى يزول العار اللى لحقك في الماضي من مخاوى منقاش البواق

وبعدين ودنا نشعبن على منقاش وهو يشعبن على حماره اعطنا من العلوم الطيبه عجل علينا الله يوفقك ترى الصبر نفذ

[مشاكس]

أبو أمجد
ماعاش اللي يشعبن على الحرامي منقاش
هذا يشعبن على حماره وعلى عشره من زيك وزي مخاويه

[مخاوي منقاش]

المشكس وش بك الله يعمي شيطانك من جرف لدحديرا بالعادة المحامين ثقال وكلامهم موزون لان الكلمة عندهم بثمن وانا نصحك انضم لمحور الخير 00
مطر الليل /يازين اسمك وخاصة لاصارت ديم وعلى فياض تجد وما عليك زود وموسمك قرب0
ابو امجد عشرة سنين مع الاسم ماقدر اغيرة ولا لازم استاذنت منة علشان يصير لي اسم 0

[ما عندكم أحد]

عموما يا مخاوي منقاش العتب على كبر المحبة
وتراني هونت العلوم وابي ادحلسها معك
هي اسمع وع


يا حيف والله يا مخاوي الحرامي = تمشي ورا منقاش اكال سحتا
وشلون تمشي معه مال العدامي = هذه معيبة في كتابك كتبتا
بس ادعي الله في صلاح الختامي = وتشوت هذا الخبل بالرجل شوتا

[بيقبن بن فنحاص]

يا مخاوي منقاش تراك تسكر من زبيبه .
يا رجل مدري ركبه اللي مدحوك يدورون من وراك تميرات , وقصايدهم فيك حلمنتيشيات .
لكن منقاش البطل قول وفعل ومدحه شعرا كثيرين تعرف منهم الشيخ القرني وابو عادل وابن داخل والشيهان ومحدثك ابن فنحاص وبديوي الوقداني والمتنبي وليلى الأخيليه والعجوز زهور الريف.

[مخاوي منقاش]

انشد خويك منقاش ويش الي يسكرني هو سافر معي ويعرفني ومعلوم انك بق منقاش ووالله ماتقدر تكتب كلمه الا من فمه ولاكن ماقول الا الله مااقوى صبر زهور على منقاش00 وقل لعمك ان كان فيه خير خل احد يمدحه بعد ما عريته اما جماعته0

[زهور الريف]

معليش معليش

ترى الكذب شين يابيقبن بن فنحاص والله شكلك من الدجاج البياض الفقاص

انا الاميره ذات الهيبه والسلطان امدح هذى الشيخ الهرم المخرف منقاش اللى مايتسماش

هزلت والله اشد الهزل
لاقلت شعرا في حياتي ** لو امدح الخِبِل المخرف

وانت الصادق يامخاوي منقاش الله يعين ثماله من الفرعه الى الصور على هالمنقاش والا انا لن نويت امرغه مرغته ولاعندي فيه

[مخاوي منقاش]

امرغية وروح القدس ترعاك بل شعبني فيه ونحن لك من المصفقون بل القارعون لك الطبول / اسرعي قبل ان تصفد شياطين شعرك

[زهور الريف]

مخاوي منقاش والله انك هاوي لفرك خشم هالمنقاش

اقول خلينا نشوف الرجال اشوفه بداء يعترف بالبنات وحقوقهم واصبح يكن لهن الكثير من الموده والاحترام حسب ضني الى الان

ان كان تم على هذا الطريق فقد نجا وان انتكس على عقبيه فهو من الهالكين لامحاله

[مخاوي منقاش]

صح لسني ولسنك

[منقاش]

محمد سعيد 05-9-2007 14:33

وصلني بالبريد
بسم الله الرحمن الرحيم



السام عليكم ورحمة الله وبركاته ,,



اتمنى عدم تجاهل هـذهـ الرسالة ..

كانت مطاعم مكدونالدز قد أعلنت عام تسعين، في حملة إعلامية صاخبة، عن نيتها في تغيير زيت القلي من حيواني إلى نباتي ليصبح صالحا للنباتيين الذين لا يأكلون الطعام المقلي بشحم البقر ولكن اتضح الآن أن ذلك لم يكن دقيقا، حيث تقلى البطاطس قليا أوليا في معامل ماكدونالدز في الولايات المتحدة ثم تجمد وتشحن بعد ذلك إلى المطاعم لتقلى نهائيا

وقد صلت هذه النشرة من "Islamic boycott"

تحذر من بطاطس ماكدونالدز ، ومقالة في جريدة التايمز اللندنية بالإنجليزية، ونفس الخبر من البي بي سي العربية.

مختصر الموضوع… أنه بعد أن يتم تقطيع البطاطس على شكل أصابع، فإنه يتم تغطيتها بطبقة رقيقة من (اللارد) و هي سمن معمولة من دهن الخنزير، وذلك لكيّ تقرمش بعد القليّ، أو في بعض الأحيان يستخدمون دهون بقرية، مع العلم أن " البقر غير مذبوح ذبح حلال، أو ربما ميت بالصعق الدماغي أو الرصاص!!

و طبعاً تتم تصدير هذه البطاطس إلى كل مطاعم الشركة بما فيها الدويلات العربية و الهند!

فقامت الشركة بالاعتذار للهند، لأن الهنود لا يأكلون منتجات حيوانية. أما المسلمين فلا قيمة لهم لكي يعتذر لهم أحد!!

وعليه فإن المقصود أن البطاطس تأتي من أمريكا وعليها دهن الخنزير أو البقر، ولكن دهن الخنزير أرخص و أسمك، ثم يتم قليها في فروع مطاعم مكدونالدز بزيت نباتي عادي. وهكذا فإن الكثيرين من الناس يعتقد أنها طالما قُليَّت بزيت نباتي فهي حلال؟ وهنا نقع في الخطأ!!

فعلاً ثبت أن بطاطس مكدونالدز تحتوي على شحم الخنزير وهذا ما تاكد منه بعض الأخوة المسلمين في كندا وأمريكا، لذلك قامو بتوضيح ذلك وعمل موقع على الإنترنت اسمه "الأكل الحلال" ( Eat Halal )

ويجب علينا أن نعلم أطفال المسلمين والجاليات الإسلامية ذلك . كما اكتشفت روسيا ذلك، وهددت ماكدونالدز بإغلاق فروعها فتعهدت ماكدونالدز لهم بصنع البطاطس بالزيوت النباتية!!! وختاماً… أرجو من كل القرّاء نشر ما قمت بكتابته وتعميمه على كل فرد مسلم.

ملاحظة

كونك قد قرأت هذه الرسالة وورد عندك علم ، فأمامك خياران

إن كانت الرسالة صحيحة ، أنت محاسب من قبل رب العباد إن كنت قد علمت وتجاهلت

إن كانت الرسالة لم تقنعك بصحتها ، أنت ملزم أمام رب العباد

بالبحث والإجتهاد للتأكد من صحتها ...وإلا أنت محاسب أيضا ، للشك وعدم الإجتهاد لليقين...علمت وتجاهلت.

اللهم إني بلغت..


المصدر :
https://il.packet.me.uk/dmirror/http/alsaha.fares.net/sahat?128@64.CxEPhGhoHNX.0@.3baa5c8e

[مخاوي منقاش]

يمدحون شحم الحمير ماهو تقرمش وبس تزعج اللي بالمطعم من قرمشتها جربها يامنقاش وخاصة ان كل حلالك حمير

[@ بن سلمان @]

الحمدلله لا اقرمش ولا احب المقرمشين
وبالعافية ماكدوتالدز على اهله