كفايه هم على ما بنا من هموم

[منقاش]

قبل شهر والا أكثر , لا لا , الكذب عيب على طوال الشوارب , الصحيح قبل ثلاثه أشهر كنت موقف حماري في مغسلة الحمير حقت صاحبي أيام زمان اللي أسمه مخاوي منقاش, وكان المخاوي يغسل في الحمار ويصنفر في حوافره وينظف في مناخره وأذانيه ومحاشمه ومعه كم واحد من أصحابه أعضاء المنتدى اللي يقفون دايم في صفه مشغلهم عمال (بعدين أعلمكم بأساميهم) , وكنت متربع كما القمر ليلة خمسطعش على كرويته أفكر كيف تحول الحال بالمخاوي بسبب سو نيته واعماله حتى سار مغسل حمير بعد كان يتشرف بأخوة منقاش .

وحد ما أنا في هالأفكار الا وهاك اللحيه الغانمه أللي أحسن ما تحلى من الرجال ناصيني من بين الزباين حتى أقترب مني وأنثنى عليه وسلم على راس خشمي وجلس قدامي , واستغربت اكثر أنه ذكرني في التحيه بالأسم (الشيخ منقاش الثمالي) , وكان يهرج عربي مع شوية لحن ولوحة لسان ما هي قليله مثل يوم يقول : كيف هالك خبيبي منكاش الصومالي؟.

قلت له : يا وجه الخير كيف عرفتني باسمي ؟, وأنت من أي القبايل ؟, وويش صنعتك ؟, وهات علومك , وبشر عسى دياركم ممطوره من هالغشين اللي ياخذ ويجي علينا والا حوالينا ؟.
جاوبني الرجال بهروج مكسره لكن مضمونها أنه يعرفني من صورتي واسمي في منتدى ثماله , وان أسمه حنش ولد جحيش من قبيلة المريكان اللي سد البحور , وانه شيخ الخزانه حقت الخماجات المريكان , وان سبب مسياره على الطايف دورة ذمر عن الحمير العربيه الأصيله اللي كشفتها لهم ألأقمار الصناعيه في حمى ثماله , وانهم يبون يشترون بعضها ويكثرون من نسلها عساها تساعدهم في التنقلات والاسفار أذا جف البترول اللي بدا يوم بعد يوم في النضوب , وعن الأمطار شكى عليه زودها وانها أهزلتهم واطبعت بديارهم من كثرتها عليهم ليل ونهار , قلت له : هذا يا طيب من طيبكم وقلة حسدكم .

ثم قلت له : مادام أنك شيخ الخزانه ويش رايك تكرم عليه بكم كيس شعير وشوية علف أبغيها ضرمه لهالحمار المقصر وقطعة مذيب ورايه ما تلقى ما يشبعها عند مرواحها للمراح ,, ضحك من كلامي وقال بالمكسر : يا منكاش هذا خزانة فلوس حق دولار ما حق شعير .
يوم قال هالكلام وانا أعتزي وأفز واقف من مقعدي كما فزة المقروص واسلم على خشمه والزم عليه يقوم من على ألأرض ويطلع يجلس مكاني وانا أعود مكانه , ويزيد الماخوذ المخاوي يوم سمع أن فيها دولار وخزانه يرمي بالحاجات اللي في يديه ويترك شغله ويروح يجيب براد شاهي ودله وتمر ويحشر نفسه بيني وبين المريكاني , حسد .
المهم , ما علينا من حكاويه اللي طالت وعرضت , أنما اللي علينا منه هو علومه عن الدولار.
وزبدة السالفه أني قلت للمخاوي : قم رح سنع ثنتين من الغنم عشى للرجال (أبغي الخساره تجي في وجه المخاوي وانا أكسب الوجاهه والجميله) , واياك تعلم أحد والا تعزمه معنا , وبالفعل أنفردنا بالرجال وبعد تعشى قلنا له : علم لنا يا ضيف الرحمن ويش عندك في الخزانه , وان كان تقدر ترشنا بشوية فليسات وترمي علينا منها كم كيس تكون مشكور , بس تكون بالريالات .
رد علينا وقال أنه ما يقدر يرشنا لو بريال واحد لأن فلوسهم ما هي للوجهنه واللعب وشغل الدحلسه , لكنه قال خذوا نصيحه ثمينه وأغلى من القروش .
قلنا هات النصيحه : قال : أنتم يا مساكين ريالكم معلق برجيلته في ذنب الدولار , ودولارهم ورق مطبوع ولا كلفهم غير قيمة ورقه , لأن ما عليه ضمانه ولا عليه غطى من الذهب , وقال أنهم كل ما زاد سعر البترول رايحين ينزلون قيمة الدولار حتى يخفضون قيمة البترول الفعليه, والريال المسكين مربوط فيه ووراه في النزول مع الدحديره , والنتيجه , العازه والحاجه اللي كنتم تشترونها بريال تعود بريالين ثم ثلاثه ثم أربعه وانت طالع حتى تضخم ألأسعار وتقل قيمة الريالات ويعود اللي راتبه عشره ما يساوي في الشرا ألفين , وعليك الحساب .
تلقف مخاوي وقال : هم بيش رابطين الريال في الدولار حتى نفكه والا نقطعه (الخبل يحسب أن الفلوس تربط كما الغنم بمريره مع بعضها ) ,, عودت سكت المخاوي وقلت له دخيلك تدمدم لا تفضحنا كما يوم فضحتنا في الصين وتكشف حالنا قدام ألأجنبي (المريكاني) .
ثم رديت على الضيف وقلت له : أخصرك من مخاوي , تراه مزوحي شويه ومليقيف , بس هات النصيحه .. قال النصيحه اللي منكم عنده قريشات كثيره يحولها في بيوت وعقار والا عمله مثل اليورو والا ذهب قبل ينزل بريالكم الدولار حتى قاعة الوادي .. قلت طيب يالأجودي ماهو ألأحسن نفك الرباط اللي مربوط به الريال مع الدولار وكل واحد منهم يروح في حاله , ويادار ما دخلك شر؟.
كان يضحك حتى تفلقح على مقفاه ثم عود أستقعد وحك راسه وقال : هذي ما تقدرون عليها لأن بعضكم جمع تحويشة عمره كلها وودعها والا شغلها عندنا بالدولار , ولو فكيتم ألرباط هم أول من يبي يتضرر لأن الدولار وقتها رايح يهوي بسرعه أسرع وتهوي معه قيمة أرصدتهم .. رديت عليه وقلت : رصدتك يا بعيد تريله محمله برشومي والا شعير وسمنت على مفرق خط الديره .. بس , بس , كفايه هم على ما بنا من هموم ...
والمشكله أن المخاوي كان فاغر فمه مثل بعضكم , ذباب داخل وذباب خارج مثل مغارة الدبوره , ولا هو فاهم الهرجه من أولها حتى آخرها ...

[شبلي أبو الونات]

عوذه يا منقاش
الحين انا عندي دراهم واجد وكثيرة وتوني عرفت وين احطها بعد ما بعت الاباعر اللي عندي على المهبل حقين ملكات جمال الجمال اللي رازين لهم بيوت شعر وهاتك يا ذبايح لين غلو الحلال وغلو الرز والشاهي حتى التنباك ما سلم من الغلا واصبح الحق حق ابو بس ب 6 ريال
لكن ما قلت لنا يا منقاش عو صدق يقولون ان الارض على طريق الملك فهد في الرياض وصل مترها على شريط بن موسى 26000 ريال للمتر واعرف لي واحد عند فرشه في السياره طولها 3 × 2 شرا له 6 متر ب 180000 ريال عشان يجلس يحتري واحد من عيال عمه يبي يجي من القصيم ومواعده هناك .
قلبت علينا همومنا يا منقاش
الا علمني بكم يغسل مخاوي الحمار ؟

[أبو عبدالرحمن]

صادق يا منقاش ..وليت المثقفين مثلك..

مشكلتنا مثل نوعية المخاوي وشلته ..ليتك تقول أسماءهم!!!..معاهم معاهم عليهم عليهم!!!

[منقاش]

ياالله مسا خير
الرفيق شبلي : أن كان عندك زود دراهم حولها جنيهات ذهب وهاتها عندي أدفنها في الزريبه في مكين ما يعرفه أحد غيري , وانساها ما دمت حي حتى تقعد لعيالك الله يحفظهم .
أما غلا ألأراضي في الرياض فلا تدور عندي لها علم لكن حسب ما ذكر لي المخاوي أن سبب غلاها ألأحتكار ومضاربة الهوامير .
أما أيجار غسيل الحمير في مغسلة مخاوي فهي ما تزيد عن ثلاثين ريال مع الشانبو والتنشيف والتطيب . ومحدثك ما يدفع ريال لأني ماسك فضايح على المخاوي ويخاف مني أنشرها أقلها زوجات المسيار .
الرفيق ابو عبدالرحمن : وهو فيه مثقفين غير الشيخ منقاش ؟.
أما أسامي عمال المخاوي في المغسله فهم مجموعه علامتهم أنهم يناصرون المخاوي ضدي , ورايح أعطيك أسم أول واحد منهم والبقيه تجيك أساميهم قدام شويه .
والأول فيهم هو أقزوز منسم , ما تشوفه ما عاد له حس ولا خبر لأنه يقضي نهاره كله منشفاتي في المغسله , يعني ينشف الحمير بالنشافه الكهربائيه بعد الغسيل ويبخرها .

[المبرِّد]

تراني صدقتك يا منكاشو.لكن سعر الذهب غالي .هل اشتري أم اصبر شويه
واشوف اصحاب البشوت في مجلس الشورى انتبهوا للحكاية وسمعوا قصتك.فاعترضوا على زيادة الرواتب كعالج لزيادة المواد الغذائية

[رويعي الغنم]

يا أخواني منكاش المخرف أعطاكم كاسه نصفها مليان والنصف الثاني فاضي
يعني أن 50% من أسباب الغلاء سببها تدهور القيمه الشرائية للريال بسبب أرتباطه بالدولار وسوف ترتفع هذه النسبة كلما تأخر فك ألأرتباط بين الدولار والريال.
أما باقي أسباب الغلاء فهي موزعه على أسباب متنوعه أهمها أن أرتفاع سعر البترول يتسبب مباشرة في أرتفاع أسعار جميع السلع المستوردة بنسب مختلفه لأن البترول عامل رئيس يدخل في تكلفة أنتاج المنتج ونقله الى الأسواق .
والمال الذي يستحق التحويل الى ألأصول الثابتة كالعقار والذهب وغيرها هو ما كان بالملايين ومئآت الألوف .

[العمدة مروق المنقة]

مستر برزدنت منقاش
عندي سؤال خبل شوية
هل البترول يباع بسبعة دولار منذ مدة طويلة الي الان وسيستمر خمسة وعشرين سنة قادمة

[abonayf]

منقاش

الله من سوالفك زمان عنها بس ماقلت لنا متى تحل الزكاه قبل والا بعد يقولون قريب بيحول عليها الحول ماحولك مستحقين .

[سنا الهجرة]

والله يا منقاش إنك رجال سنافي وينشد بك الظهر

بس لو تفكنا من الحمار حقك اللي طول علينا السالفه
وخلانا مره مع الحمار ومره مع قريشاتنا اللي ما عاد تسوى حمار أعرج

ياليت لو تنصحنا وش نسوي ترى السبحة أنفكت وضاع الخرز ضاع >>>>> وجيت ألمه يا منقاش وازريت


تكفى يا منقاش
وتكفى ترى تكفى تهز التكارين +++ كم مات تكروني من أسباب تكفى

ان كان عندك علوم سنعة انفعنا
الله ينفعك بعلمك يوم القيامه

قول آمين

[الشيهان]

امسينا وامسى الملك لله

انت يامنقاش من وين تجيب هذي العلوم والله اني اضن مخاوي منقاش يصبها في راسك بالمحقن حق زيت الفرامل مع صيوان الاذن اليسرى والا اليمنى مسدوده من قلة الترويش

عموما بالنسبه لحكاية الحمير العربيه ترى هرجة الرجال ماهي سليمه واضنه يموه عليك لانهم ماهم في حاجة حمير ثماله عندهم حمير عربيه افسق وانقى من حمير ثماله من قبل عشرات السنين وهم يربون فيها بعضها هلك وبعضها معمر وسلالتها يقولن اجود لانهم ادخلوا عليها بعض التعديلات الجينيه

اما الدولار لابارك الله فالشيطان مدحدر واحنا نغني له واصلوا واحنا وراكم ولابيردنا الا قاع الهباه والموت مع الجماعه رحمه

لاوزر لاوزر

وترى نصيحة خويك في مكانها بس ماتخص عربنا لانهم تنفضوا وريحهم الله بسوا والبورصه وسوق الاسهم والمساهمات العقاريه ولابقي غير المزاين

[مخاوي منقاش]

يامنقاش نقش عينك الغراب ياقليل الحكمة وكثير اللقافة هوالسجن فاضي علشان تجرجرجماعتك المساكين الي (انخمع) بسوا او الاسهم او ماشبه او اللي لعطه الغلا ءوصار يحسب المقاضي ويتاكد من الاسعار قبل مايملاء العربية وياقف فاغر فاه عند الكاشير ينتظر يقولله المبلغ هالكثر ويطلع المحفظة ويسحب بطاقة الصراف بكل شموخ وبعدين يفاجاء ان الرصيد لا يسمح ويبداء هاه يم فلان هذا ضروري وتجاوبه لا عندنا شوي منه وهذا ؟ هذا اوشك وهذا ؟ هذا عندنا بس احيانا ينقطع من السوق والبديل ماهو مثله وهلم جرا وانا اعترفلك ولاذنابك المغفلين انني لا افقة في الاقتصاد الا كما تفقة بالمراجل والفزعات ولكن ابي اقولك كلمتين باذنك لا يسمعها احد غيرك انت يوم تتدخل بالي مايخصك تبي تصير ابخص من الحكومة او ابخص من معالي وزير المالية او المحافظ على التقاليد(قصدي محافظ البنك المركزي)او ابخص من التجار وبائعي الكوسة ؟ كم مرة قلتلك اترك اللقافة واعتمد على الله ثم على اعضاء مجلس الشوري اللي يحسون بالغلاء قبل ماتحس فية انت وامثالك ياضعيف الاحساس والدولار الي تبي تفك رباطك منه ماسك الريال مسكة العمى لشاتة واحمد ربك اللي ماهو مربوط باحد العملات الافريقية هذا الدولار ياما عين ابو خصر وخصر اهتز من اجله وكم سعبول سال من طاريه وكم رفعت له من الايدي والارجل وكم من جبار بطش بشعبة وهرب لينعم بهذا الاخضر الفتان وعندما يعتريه الضعف تجي يامنقاش الحمير وتقول فكونا منه ؟ معصي هذا حبيبنا ولا نبغا الفكاك الا من امثالك عديمي الثقة بالدولار وللحديث بقية عقب ما (اصفر )اي انام لي شوي واحلم باللي انا ابي

[@ بن سلمان @]

صفروا صفروا
اصلا ما معكم يا لشياب الا الصفير
ترى الفضوة شينه يا المخاوي ولا اشغلنا بها السواليف الا هي
وبعدين اشوفك تمدح مجلس الشورى ( اشوفك شوير معهم ) يقولون ما فيه نية لدراسة زيادة الرواتب
اصلا البلاء ما جانا الا من زيادة الرواتب ومثل ما الريال مربوط بالدولار فالغلاء مربوط بزيادة الرواتب

[مشاكس]

ياجماعة خير
علوم منقاش زينه بس الذهب ماينلحق
والعماير تبي لها عرب قلوبهم كبار
وش رايكم قبل الماخوذ الأمريكي يشيل حميرنا ويبيعها علينا نليم الحمير اللي
في الديره بمافيها حمار منقاش اللي لزم لزم واللي شرى شرى
ولا تمكنا منها سوينا مزاين حمير وشي عرب يفزون على العجه واللجة ونبيع حميرنا بشرط انها بالعملة الصعبة يعني باليورو ونستثمر في حميرنا ونخلي الذهب لاهله

[مخاوي منقاش]

سلمت يمينك يبن سلمان انا امدح مجلس الشورى لعدد من الاسباب منها انني قد اترشح للمجلس ولا ينقصني ولله الحمد شي البشوت موحودة وبجميع الالوان والبدل ثري بييسسز حدث ولا حرج وطوالة اللسان والقدرة على ردع امثالك ممن يلمز ويهمز ويتتدخل بشؤن مالة فيها حمار ولا بغل ولا حتى عصفور واما ثقافتى فلله الحمد والمنة فانا اعرف من اين تؤكل الكتف ومن اين تطقع النعحة وحافظ الشانزيليزية دكان دكان وماهنا خطوط اجنبية ماركبتها واحوالي المادية مستورة ولله الحمد لا يهمني ان غلاء الارز او وصل كيلو الكافيار مئة الف ين صيني اهم شي تكون متوفرة ام السعر فان التجار رحماء فيما بينهم اقوياء على من سواهم واما المستقبل فعلمه عند علام الغيوب ولكن انصح من يقراء كلامي بتامين مستقبله ومستقبل اولادة بما يلي-
1- شراء فلل في عدد من الدول الي فيهاانهار واحدة في باريس وواحدة باثنا وواحدة بالبرازيل لان فيها نهر الامازون العظيم ولا ينسى يسويلة عمارة بجنب الحرم تكد علية وعلى الاولاد ولاحفاد من بعده وبالمدينة مثلها وبعدها ينام قرير العين
2- يشتري ارض كبيرة في السودان 2 في 2 كيلو ويجيب عمال من كوريا (لا يقربونها السوادنة) ويزرعها شعير ويتحكم بارقاب الحمير من بشر وحيوانا ت
اللهم اني نصحت اصدقائي من قبيلة ثمالة اللهم اني بلغت

[شبلي أبو الونات]

عوذة
الله من هم ركب راسي
كنت احلم بالشيخة واخذها نمر بن عدوان قلت ارحل وادور عرب يقدرون مثلي ويعطوني الشيخة واشيخ عليهم ويصير عندي دراهم واجد واتزوج لي مرة
ليه مرة الا ثنتين هه ما زاد بن عزاب عني بشيء
ثنتين !! وليه ما هي ثلاث يعني مخاوي منقاش احسن مني
الا اتزوج اربع
اربع حريم و تناديني الرجاجيل يا ابو اربع وانا ما غير امشي وكلي نوماس واتخايل مثل الطاووس

[الشيهان]

انت يامشاكس ودك تستثمر في حميرنا العربيه
اقول خل ماك في سماك وحميرنا منت قدها انت وحمارك وحمار منقاش ومنقاش براسه
حميرنا خلاص صارت من كبار الروس ولااحد قدها حتى اسال منقاش عمره يوم من الايام شاف واحد من الحمير العربيه واقف في مغسله ماسك سرى


اما انت يامخاوي منقاش نصايحك نادره مايجيبها الا عقل فطين مثل عقلك مدري وين كانت غايبه عنا والا الدراهم موجود ولله الحمد عندي حوالي 200مليون ليره لبنانيه تسوي اللى مايتسوى

احسن استثمار اللى انت ماشي فيه ياشبلي بس على شرط ثلاث مدرسات وطبيبه يصير تضمن العلاج المجاني وتشتري فان ومن الساعه 6 توزعهم والساعه 12 تلمهم ويوم 25 الله يعين اللى يقف وراك عند الصراف يمسي عليه اليل وانت تقش فالدراهم

[منقاش]

ألمبرد : هات قريشاتك عندي وانساها حتى الزكاه لا تزكيها . ومجلس الشورى أغسل يدك منه , ولو من وراه فايده كان أمدي ريسه منقاش والا العمده .
رويعي الكلاب : أحتفظ بمعارفك لنفسك , وترى اللقافه شينه وثاني مره أقطع واخس , وهو من هو الخبل اللي سعلك حتى تحشر نفسك بين الرجال وتبث علومك.
العمده مروق المنقه : والله ونعم وستة أنعام بعمدتنا , وتكفى حاول تسكت عنا بذبذة ابو أمجد تراه وصلها الخشوم هو والهابي مخاوي لا خير في الأول ولا في الثاني ولا في رويعي الكلاب .أما سعالك عن البترول فجوابه أخذته من المريكاني يقول فيه سلم لي على العمده وقله أني ما زرته في مكه لأني من الخماجات اللي ما يسمحون لهم بدخولها , وقله البترول برميله هالحين ب90 دولار يعني 400ريال الا شي , وان ضربت أمريكا أيران فقل راحت عفيسه ويبي يعود برميل البترول ب200دولار قريب من800ريال لكن وقتها أحذف من قروشك النصيقه وتبي تعود مقضاة ال500ريال ما يجيبها الا 1000ريال , وراتبك أذا كان 8000آلاف ريال يصبح ما يساوي 4000ريال الا أن كان تداركوا المشكله ورفعوا الرواتب وفكوا أرتباط الريال بالدولار.
أبو نايف : لك وحشه وعساه مغيب خير , أما سعالك عن أستغناء الناس عن الزكاه فمثلك يعرف منقاش ما يزكي ولا يعرف عن هالعلوم شي , لكن سعلت لك ساري الليل ويقول هذا الكلام في زمن عيسى بن مريم عليه السلام والمهدي في آخر الزمان , في الوقت اللي يملون فيه ألأرض عدلا وقسطا كما ملئت جورا وظلما ويوزعون المال صحاحا (بالتساوي), يعني من العداله يصبح الناس كلهم أغنياء ويندر الفقراء ويكثر المزكين وتكثر الزكاه ولا يجدون لها محتاج ياخذها (يعني تنتهي مشكلة الريال والدولار ويستغني العباد) ويعودون يدخلونها بيت مال المسلمين.
سنا الهجره : آمين لي ولك على دعاك ,, وسعلتني ويش تسوي ؟ , الجواب : ما تسوي , لأنك ما تقدر تسوي الا شي هداك الله له حتى تسويه واعانك على سواته .
أبو أمجد : ليتك يهديك الله وتفارق ألأوباش وتعود في صف منقاش وتترك عنك ابن عزاب ومخاويه وبقية الشله التعبانه , وتراني لمست من بعض جواباتك أن الهدايه ماهي بعيده عنك أن أقتربت مني وتعذبلت من أبليس , وهذا ما هو عيب وقبلك المشاكس كان ناصبي مناصبني العداء واليوم أهتدى وعود من شيعتي . .
مخاوي منقاش : أترفع عن مهاتراتك اللي تحاول ترمي بها عليه حتى تطرح بها التمر من نخلة منقاش . وعلى فكره كم باقي من الوقت وترسل علينا التمر وزيت الزيتون ,, تراك طولتها هالمره والأنتظار طال .
وترى بعض علومك التاليه زينه اللي عن الشرا في مكه والمدينه والمزرعه في السودان ولا ناقصها الا قارب يسافر عليه الواحد مع البحر يم السوادنه أذا هب عليه الشوق .
أبن سلمان : ترى منقاش يحبك ويحب المشرفين الباقين خوفا وطمعا , واقول أركب معنا واترك الهنثويل اللي ما يربطون حمار .
المشاكس : فكرة مزاين الحمير فكره كانت في راسي ومدري كيف سرقتها وانا ما أدري , على كل حال ما حصل ألا خير , ومكان المهرجان في سوق عكاظ السنه الجايه لكن فيه مشكله مالها حل وهي أن الحمير أكثر من ثماله ولو جاء لكل رجال حمار ونص من القسمه كيف نسوي بالنصف ؟, والنصف الأول من الحمار يا سيد العارفين يختلف عن النصف الثاني اللي فيه بليه ما تنقسم .
شبلي أبو الونات : حماري يبشرك بعشر من بنات عمه يجوزك أياهم من طويلات الاذاني أنت ومخاوي وابن عزاب وابو أمجد ورويعي الكلاب, ونفقه ومهر واثاث ما فيه , كله بلاش .

[منقاش]

يا جماعه فيه رجل مغيب وأخاف أنه يحبك في مؤامره ضدنا , والرجل هذا ثعلب مكار غدار يسوي المصيبه في الظلمه ويسري وهو ساكت ما أحد درى عنه , ولا أشبهه الا بالماء من تحت التبن .
الرجال أسمه أبو هاشم ونفسي تقرع عليه , اللي يقدر يسحبه برجله ويقربه للشبكه ماجور , وكما يقول المثل التركي رجل الديك تجيب الديك .

[مشاكس]

أبو أمجد اسمع كلامي ولا تندم
ياشبلي ابشر بسعدك أنا أقلك من ذحين يابو أربعه ابسط ياراعي الونيتات
منقاش المزاين مانبي فيه قسمه نسوي تنازل للي يبي النص الثاني ويصير
حمارين ويعطي الحمار الواحد تعويض
خوي منقاش شكله معاه نصبه جديده مايسد منقاش اللي نصبت عليه وبعته نخلتين
خلاص وترسل له كل سنه ربيعه وتقول هذي من نخيلاتك

[منقاش]

يا مشاكس أنا أعرف ناس من أعضاء هالمنتدى يدورون لنص الحمار ألأخير دوره ولو طلع من نصيبهم ماهم معذرين به لأحد ألا أن كان ضيف مثل مخاوي منقاش .
الزبده , دور لنا عن حل غير المبايعات والتنازلات ,, نبغي حل عملي والا أعتبر ما فيه مزايين حمير .

[المبرِّد]

يا عم منقاش.خلاص ابشر وانا ما ني أحسن من الخبلان اللي اعطوا دراهمهم للنصابين بدون تثبيت او توثيق.ابرسل لك 200,000 ألف ريال .عسى يكون عندك ذمه

[منقاش]

الله يا ولدي يا مبرد يبردك بالعافيه اللي فرحتني أن قريشاتك تبي تحطها في يديتي أحفظها لك .
وترى اللي ما يبون يحرزون فروشهم عندي تبي تفتكها الهوامير منهم ويقعدون مثل الولايا يتباكون ,, لكن أنت البيض تغشاك وليت غيرك وسواك يسوي كماك .

[بيقبن بن فنحاص]

لا أله الا الله وحده لا شريك له , يحيي ويميت بيده الخير وهو على كل شيء قدير ....