بطل التطبيع /الحلقه الرابعه.

[منقاش]

تذكرون في الحلقه الثالثه أني طلبت من شيخة أسرائيل تزوجني حتى يسير بيننا وبين عيال عمنا اليهود حسب ونسب ورحامه وتطبيع يطابق فيه القول الفعل ,, وتذكرون أنها رفضت وقالت : خل السعه في بالك قدام شويه , وخلي حتى يكتمل التطبيع وتفتح الحدود بيننا وبينكم ويومها أتجوزك أنا وبنتي مائير على أزواجنا (يعني أنه مسموح عندهم تعدد الأزواج والجمع بين البنت وامها وبعدها الطرح) .
وبعد أشترطت عليها النظره الشرعيه لبنتها مائير قبل الموافقه على زواجي منها , زدت سعلتها وقلت : سمعت أن ألشيوعيه واشتراكيتها ولت الى غير رجعه أن شاء الله ,, ويقول القواله أن صدقوا أن الرأسماليه اليهوديه مقبله علينا تحث في خطاها حثيث , وانها راكبه على العولمه وتشيل على راسها في الخصخصه , تكفين فهميني ليش الراسماليه يهوديه ؟ , وويش معنى الخصخصه ؟(لا خصك شر ولا جاك قشر) حتى يوم يوم أتربع واتوسط مجلس ربعي وامدح الخصخصه ما أبربس في كلامي عنها ويشكون أني ماني فاهم .
ردت عليه وقالت : لعلمك الشيوعيه واشتراكيتها والراسماليه وخصخصتها يهوديه 100% فكر وتنفيذ .
لكن قبل أجاوبك على الخصخصه قل لي يا منقاش ويش اللي عندكم اليوم بلاش ؟ , رديت عليها وقلت : العلاج عندنا بلاش وهو أقل من المطلوب واجد , والتعليم بلاش وهو أقل من المطلوب واجد , وشيل الزباله بلاش , والقبور وتغسيل ودفن موتانا والصلاه عليهم بلاش , والسير بالسيارات على الطرق بلاش , والهوا ومعه الكلا والماء في الخلا بلاش .
ردت عليه وقالت : عليك نور , خصخصة الراسماليه المعولمه ما فيها شي بلاش البته غير الهواء ,,, يعني كل شي تعرفه اليوم باقي بلاش يبي يعود بكره بفلوس .
وخذ مثال من بلاشكم اليوم اللي بكره مع الخصخصه رايح يعود بقروش وهو القبور ودفن موتاكم ,,, يعني بكره تطلع لك شركات تمتلك المقابر وحق دفن الموتى بما فيها مقبرة العباس والقيم ,, ووقتها ما يسمح لك بدفن ميتك الا عندهم , ولا تحصل على صك أثبات الوفاه الا بعد تجيب ما يثيت من الشركه أنهم دفنوا ميتك عندهم وأنك سددتهم .
ويجيك يومها لشركات دفن الموتى فروع وتخصصات ما عمرك سمعت بها مثل أقسام الحرق بالأفران للفقره المفلسين , واقسام تجميد ألأعضاء للأغراض التجاريه , وأقسام فرزنة الجسم كامل أو الرأس منفصل للزباين المقتدرين (الأثرياء) حتى يسير لهم بصيص أمل وفرصة في العوده للحياه مره ثانيه من جديد فيما لو تقدم الطب في المستقبل وقدروا يردون الحياه للأجساد,, وقيس عليها غيرها من أستثمارات الشركات في خصخصة أمور الأحياء والأموات .
يعني يا منقاش مع الخصخصه تنتهي دولة خدمات ورفاه المواطنين اللي تقدم لهم رعايه صحيه واجتماعيه وتعليم بلاش , واللي تدعم هذي السلعه حتى تحمي هذاك المواطن ,,, لا لا , كله هذا الحكي ينتهي.
الدوله في عهد الخصخصه تقصقص أجنحتها الشركات الأحتكاريه , وتعود دولة تشريع (سن قوانين) , ودولة فرض للنظام الداخلي وحارسه لمصالح الشركات واستثماراتها في الأحياء والأموات .
وتراك محفول ومكفول في سد لحيتي اللي ما عمرها طلعت يا منقاش أن حطيت يدك في أيدينا وسرت في ما يرضينا واصبحت بطل من أبطال التطبيع أن الصهيونيه لتدعمك حتى يظلي عندك شركات مثل شركات بعض أعضاء السلطه الفلسطينيه اللي ريشوا وساروا من أهل الملايين بعد مساهمة شركاتهم في عقود بناء الجدار العازل والمستوطنات اليهوديه في الضفه الغربيه .
ما أطيل عليكم ... حديثي معها طال وتشعب وكان منه أني حذرتهم وأنذرتهم من أعداء السلام والأنسانيه أمثال رويعي الكلاب والمخاوي والمشاكس الناكس .
لكن الختام كان لوعه , لوعه ساعة ودعتهم بعد أجهشت بالبكاء على فرقاهم يوم حل ممشاهم ولا خلفه ألا الأنين والحنين على لقياهم .
وبعد مشوا مسحت الموع من على خدي وألتفت على قايد الطابور وطلبته يفتح عيونه سته على سته ويشمشم يمنه ويسره وأذا لقي أي واحد غيري يجالس والا يحاكي بني صهيون أو يعتب يمهم بكراعه عساها الكسر , أو يروح ويجي عليهم , أذا لقي أي خاين من هالنوعيه يمسكه بترقوبه ويجره بعرقوبه ويعلقه بواحده من كراعينه في أطول وغيفه في الديره وينتف شنبه شعره شعره ,ويمنع عنه كل الماكولات ألا البرشومي حتى يكون عبره لكل الخونه من أمثاله .
وقلت له يحاول يلفق تهمه لمخاوي منقاش ويلبسه أياها , ثم بعد يقبض عليه بليل أسود ينتف ريشه حتى يسير أمعط في البرد والهزل , لأني شاك أن الرجل مصاب بفنزويلا الطيور مع شوية عدوى من حمى شافيز وأحمدي نجاد .
والى عند نتف ريش المخاوي أللي يستاهل حتى نتف رمش عيونه أتوقف بكم , خلوكم معي في الحلقات الجايه حتى تعرفون باقي سالفة بطل التطبيع شيخكم وشيخ اللي خلفوكم الشيخ منقاش حفظه الله , والسلام عليكم ...

[منقاش]

تكفون يا مشرفين واحد منكم يكبر الخط حالا حتى المواطنين ما تتعب عيونهم .

[سنا الهجرة]

ليتني مشرف يا منقاش كان كان خدمتك لكن اكيد المشرفين بيقومون بخدمتك

خليني أرجع للحقة الرابعة واشوف وش عندك من جديد

[سنا الهجرة]

لله درك يا منقاش

أعتبرني من الان ومن قبل واحد من قرائك المتابعين لما تكتب ومن أشد المعجبين بما يخطه قلمك ويرسمه فكرك النير , حتى ولو تطاولت على بعض الناس اللي أعزهم وأقدرهم ما يهم

لانك بكل أمانه مدرسه وببلاش الى الان !!!!!!

بس الله يكفينا شر الخصخصة لا تغيرك علينا وتخصخص وتصير من ظمن شركات المقابر

وأنت خابر......

دعواتي لك بطولة العمر الين تنتهي من مسلسل
( الطريق الى كابل )

[@ بن سلمان @]

هي لا تنساها لي يا منقاش كبرنا لك الخط حتى يقراها لك القاصي قبل الداني وهذه أخر مرة أكبرها لك بلاش و بكرة مع الخصخصة نبي ناخذ على الكتابة عندنا في المنتدى أجرة و أي تعديل بيضاف عليه رسم خدمه و أي حذف أو تعديل بيفرض على اللي يكون ضده رسوم تستحصل منه

[سنا الهجرة]

هي لا تنساها لي يا منقاش كبرنا لك الخط حتى يقراها لك القاصي قبل الداني وهذه أخر مرة أكبرها لك بلاش و بكرة مع الخصخصة نبي ناخذ على الكتابة عندنا في المنتدى أجرة و أي تعديل بيضاف عليه رسم خدمه و أي حذف أو تعديل بيفرض على اللي يكون ضده رسوم تستحصل منه


فتحت علينا باب كان مسكر يا منقاش الله يهديك

وعلمت اللي ما يدري

[أبو عبدالرحمن]

ما دام علومك هذه يا أبو نقشه ..ننفض أيدينا منك..

يعني فرحان بالخصخصة!!علشان تلهف من فلوس الولاياه !!!

[زيد الخير]

أنا الحمد لله اشتريت معزه .ولا بارك الله في الخصخصة والمتخصيصي.
هذه المعزه تسدني وتسد عيالي

[شبلي أبو الونات]

عوذة
الله من ونين يبي يونونه ربعك يا شبلي إن تم لهذا الخبل علمه
إححه أقول يا بن عمي يا منقاش أنت شيخنا ولا لنا مقام في الديرة إلا بك والديرة ديرتك بخيرها و عيرها حتى معزى زيد الخير ونحل بن داخل و غنم الرويعي و غروب راعي السواني وجايزة أبو عادل وفلوس قصيدته وعربية مشاكس و زيادة كل خامس من أخماس ثمالة يتنازل لك عن مقبرتهم ونبي يتنازلون لك عن البزايع ويبيعطونك عورش تسوي فيها منتجع وتستغل طيارة أبو تركي هناك وتحول مكانها في إستقطاب السياح من مختلف أنحاء العالم .
أقول أقبل وخلنا هنا في الحلقة الرابعة و أوعدك نبي نتطابع معك ترانا راضين بقردنا لا يجينا أقرد منه .

[قائد الطابور]

سيدي منقاش تمتع بالامن وكن على ثقه اني معك وخلفك وعن يمينك وعن يسارك ، وسوف اسد افواه الملقف اللي طالع لهم اللسنه زايده زي ( مشاكس والناكس ) وامثال المعارضين ولا يخفاك يا سيدي ان بن سلمان مثل العقرب اللي تلسع بذنبها ، ولا تنسى التعبان هذا ابو امجد والله لن ما تمشي صح لأصحح لك عقلك , والمتخلف هذا مخاوي منقاش وان سمح لي سعادتكم ان نغير اسمه لأنه كان نسميه مخاوي والان نبي نسميه المعارض الكبير , لكن اشير على سعادتكم تسمح لي اروح له في ديرته واقفصه قفصة عصفور واجيبه وارزع به في السجن عندنا في احد الخربي اللي في الديرة حسب معرفتك وازيد الحقه ابو امجد لا رحمو .

سيدي / سر وعين الله ترعاك الامن مخاويك ما تخاف .

[الشيهان]

ما اقول الا سلط الله على اشباهك يامنقاش انت والحارس المارس حقك
جماعتك يونون من التضخم وريالهم مدحدر مع الريعان ورى مقطوع النما الدولار والاسعار معرشه ومتلقيه الخلا والحي ماهو قادر ياكل وتزيد على همه هم وتقول للي مالقي محل يرقد فيه وهو حي اذا مت مالك عندنا مكان

يعني هي ناقصه ياناقص بدل ماتتعين ربعك وتشوف مساكينهم وتوجهم للاقتصاد الاسلامي بما فيه من فضيله وتكافل يغتني فيها الفقير ويزيد الغني غنا تروح تجلب عليهم عيال القرود يفقرون الغني ويزيدون الفقير فقر

ياشيخ روح منك لله ياضالم والله يالحزم والربط اللى اخذتها انت وحمارك والحمير اللى ماشين معك والحمير اللى يقلدونك ويسابقون فيك على الصهاينه ماتنفعكم يوم لاينفع مال ولابنون الا من اتى الله بقلب سليم

كمل كمل خلنا نشوف وش النهايه معك انت وحارسك الشخصي اللى رايح يكون اول الضحايا على يدين الصهاينه بعد ينحرق كرتك عندهم وتخلص بطاريتك ولاعاد يقدح زندك

[منقاش]

سنا الهجره : أتشرف أنك تتابع كتابات منقاش , واتشرف بمدحك لي خصوصا أنه من رجل يميز الغث من السمين ويتذوق فن البيان والطرفه.
بخصوص الأخوان اللي أزل عليهم ,, صدقني أني ما أمزح الا مع اللي أحبهم وبنظافة قلب والتهجم عليهم المقصود منه الأثاره وأرهب بهم اللي ما أمزح معهم حتى أدخل الرعب في قلوبهم , مع العلم أن بعضهم تشرفت بمعرفة معرفه ولم أتشرف بمعرفته معرفة شخصيه .
ابن سلمان : مالك الا منقاش حليفك القديم حتى لو كان عديم , والبقاء لله , شوف مخاوي الجبان أختفى من الهلع وترك الرجال الأبطال شرواك وحيدين في الميدان ,, على كل عفا الله عنك في حلفك معه ولا يغرك ترى الرجال معادن بعضهم معدنه خرده مثل معدن مخاوي .
ابو عبدالرحمن : تكفى شف لي دبره في مداخلات أبو أمجد , أبيك تحذف وتحرف منها اللي تقدر عليه واعتبرك على ثغر من ثغور الدفاع عن الشرف والفضيله .
زيد الخير : كبك من الأستعناز وتعال أعطيك من الحمى جوزين حمير تستحمر بها أحسن لك من المعزى .
شبلي : أشوفك تبي تعود للدرب والهدايه , وتعود عود من حزمة القبيله اللي شيخها منقاش .
المهم توبتك مقبوله , وبخصوص البزايع وعورش ما يحتاج تنازل من الجماعه وهي في وسط صكي .
قايد الطابور : أنعم واكرم بساعدي ألأيمن ,, وتعجبني يوم تدخل الرعب في قلوب الرعاع مثل المشاكس والمخاوي وباقي الطقه .
وبخصوص ابن سلمان لا تشد عليه واجد لأنه أقرب للخير منه للشر , بس حاول تستأصل مكان السم وتخلي الباقي .
ولا مانع لدينا من قفص مخاوي الموجود حاليا في حايل , وزين يوم تقفصه قدام ربعه , وفعلا كما تفضلت أحسن مكان لسجنه هو واحده من خربي الديره المسكونه بالعفاريت وشيوخ الجن , وتكفى أقفص معه أبو أمجد وفرق بينهم في الخربان .
بخصوص المشاكس لا تزفر يدك فيه وهو أنطس العشره , وسع بالك عليه شويه أرب عزرائيل يسبقك عليه ويقفصه , عساه بحمار بطران يرفسه حتى يكتب في التاريخ أن قتلته جات على رجل حمار .
أبو أمجد : شوف أسمح لك تطاول عليه لكن أياك ثم أياك تطاول مره ثانيه على رمز أمننا البطل قايد الطابور , وبعدين لن كنت أبو نقشه لربط بالدولار حتى البقر والغنم والجمال والحمير حقتكم ماهو بس الريال .
هب عليك يالحسودي اللي ما درى أن الرازق في السماء والحساد في الأرض .

[مشاكس]

القايد الطرطور
آسف قصدي قايد الطابور
أنت ومنقاش راعي الخياش
إليكم هذا البيان منزوع الدسم(يعني مافيه مجاملات )
لا نامت أعين الجبناء ووليخسأ الخاسئون
أنا قررت اني أقوم بتكوين حزب معارض يتخذ
من القبر المنصدع شعار ل( لاللتطبيع ولا للتخصيص ولا للبصبصه على الوفود)
ثلاث لولوات لا نحيد عنها قيد راس نمله
واللي عاجبه عاجبه واللي مش عاجبه
يضرب الحيط في راسه
وليكن شعارنا الويل والثبور لكل خائن غدور
واللي عينه زايغة لا يخاوينا
وإذا استطعنا طرد منقاش هو والقايد الطرطور حقه
هنا نفعل مانريد ونقيس ونفصل ونقول لا ماطاعك زمانك طيعه
وأول الأعضاء شبلي وهو نائب الرئيس والعضو المفاوض مع الأعداء

[شبلي أبو الونات]

إيييييييييك وأنا عزوتك يا عمى عين منقاش
الحي يحييك والميت يغبن عداك و أنا ولد أبوي ولده ويمناك اللي ما تعصاك وقت الشدايد شداد وو قت اللزايم لزام ومنهو اللي ثكلته أمه و يقول غير كلامي
إن رديتها للمعارضات والانقلابات ترراني معارض و مقالب وإن بغيتها للمسايس والدسايس وين اروح من اصلي
وليخسأ منقاش و قايده

[أبو عبدالرحمن]

يا سلام عليك يا مشاكس. واش جابك لوادي الأعرج..
حدك الفضية . ويالله الخراج !

أخر مرة اسمع منك أي حد من حدود الأعرج!!

[الشيهان]

وانا اشد على عضدك يامشاكس وعضد اخيك شيخ الشيوخ شبلي ابو الونات
عليكم بهاذا المارق الافاك الاشر هو والقايد حقه الظاطور على قولكم ياشيخ شبلي

الخيانه ارتسمت على محيا منقاش وابتسامته الصفراء اللي يمطها الين اذنيه امام كمرات التلفزه لم تعد تنطلي على عقولنا وكرشه المنفوخه من اكل اموال الناس بالباطل ستنطق عليه يوم النشور

اسمع يامنقاش لم يعد هناك من جماعتك وابناء جلدتك من يثق في ترهاتك وكلامك المفبرك وتشدقك في التصريحات الاعلاميه حقتك بان حقوق ربعك محفوضه وكرامتم مصونه وانت اكبر خاين واجرم من اصحابك اليهود على ربعك

خلاص نشفت البركه وبانت ضفادعها ياضفدع

[قائد الطابور]

سيدي صاحب السمو ( منقاش ) ان الفئة التي تسمع كلامها امثال ( المشاكس + ابو امجد ) تراهم من طيب الرجال وما زلت به السنتهم ليس من حقد لسموكم لكن الاخوان لديهم معاملة يطلبون فيها موافقه على منحهم مخطط ونبي نتوسط لهم عند وعساهم يفارقونا وينشغلون فيه لين نغلق علومنا مع اليهود .

[شبلي أبو الونات]

زعيم الاشاوس مشاكس وحليفه ابو امجد
تعلمون سمو مقامكم ولان منقاش لا ينهاش ولا يناش بعلوم الرجال لدنفسته وراء النسوان وحرمة توديه وحرمه تجيبه ولعلمي ويقيني بان الشاعرة زهور الريف وهي سيدت أنسات منقاش ومن من يوثق في رجاحة عقلها ولان منقاش صاحب سوابق معها وهي تبحث له عن خرم ابرة يكون لها مدخلا عليه ارى ان يقترح عليها تتبعه وهي تملك من كيد النساء ما يأتي به جاث على ركبتيه حاف القدمين وحينها ستسقط كل الاقنعة التي خلفه و يتعالى صيتكم حين يكون لكم ما اردتم على يد امرأة و سيلحق به عار ما عاش والرأي المجيد لكم وأنا رهن إشارتكم .

[قائد الطابور]

سيدي منقاش#
شبيلي ابو الونات يبي يشارك معهم في المخطط وعلى خبرك نبيهم يترزقون الله وياكلون ويشربون في ديرتهم ما لهم ومال الطايرات . ما لك هم يا شبلي تلعب حيوما وتاكل عيش ان شاء الله مع ابو امجد ومشاكس الاشاوس رجال الهيله ونعمك بهاك اللحى ،
يا حيوما حيم لوحي ،،،طارت الطير بارزاهها لوحي يالوحي

[قائد الطابور]

والله يلي ما يسمع كلام ( ابونقشه ويسلك ) لخليه زي البس في القفص ، واذوقه المر العلقم ، احنا ليا نوينا انا وابو نقشه كلا العالم يسكت ، والخراط اللي ماله داعي يقعد عند اهله ورعنة ورعان ما نبي .
ان شاء الله تمسي اموركم يا عيال العم وتاخذون اللي تبونه ، والله اني من يمينكم لين يساركم بس اركدو اركدو .

[منقاش]

قايد الطابور الأسد مفترس الحسلان وتيوس الجبال : وسع صدرك عليهم وخليهم يطلعون اللي في حلوقهم والغازات اللي في بطونهم وهذي كما تعرف لعبة الديمقراطيه .
واذا خلصنا من السلام مع عيال عمنا اليهود وقتها أقفصهم وملي بهم خرايب الديره , ولا تنسى المحرض لهم وهو رويعي الكلاب ألا هم أمعات مع الناس أن سندوا سندوا معهم وان حودروا الوادي دردبوا روسهم معهم .
وتراني أترفع حتى عن ذكر أساميهم , الا المروح مخاوي منقاش طلعه لو من تحت طقاطيق ألأرض وعذبه عذاب الهدهد لأنه ما غاب كل هذي المده ألا يتآمر , وجاني لبهة علم أنه يخطط يسرق حمار السلام حتى تعطل العمليه السلميه كلها .

[قائد الطابور]

(يا مخاوي منقاش ) سوف ننكل بك واسحبك على وجهك واعفر بوجهك التراب ، لين تعرف قيمة نفسك ترى ما احد عرفك بقيمة نفسك ولا يغرك انك بعيد ترى نجبك على حمار اعرج لين يوصلك عندنا في الخربي ونحطك فيها وبعدين تعرف اش اللي يسير لك زي ما سار لناس حطيناهم فيها وخلينا وجيههم في اركان الزرايب يبكون سرابيلهم مع افواههم يبكون ، وايديهم في اعمدة الخربي مربطين وخلينا ارجولهم فوق ورؤسهم في الارض

[مشاكس]

قايد الناطور وصاحبك المغرور
لقد ثبت زيف ماتدعون
وياأنصاري ستقر عيونكم بما تحبون
فقد خسيء الأفاك العظيم وزمرته الملا حيس
منقاش الغشاش وقايد الطابور الخفاش
آن لكم أن تصعدو كل عال وتصدحون بكلمة الحق
فلن يبقى سوى أثر بعد عين
أمطلروهم برماح الكلمة واضربو أعناقهم بسيوف الفكر
فهم لا يعدون حفنة من صنع الأنجليز وسوف يكون لنا عليهم الدولة
ولن تغني عنهم الكراعين وأسيادهم حمر الوجيه

[مدهش]

وادهشتك يا مدهش من العرب هذولا اللي ما غير في صب وحقن وحقن وصب وابو لا يغلقون هروجهم اللي كل ما قلت قريت تخلص جا من يمطها مطه ترجعك كنها سالفة دوبها بدت

[الشيهان]

مدهش انت دوبك تندهش الصلح مع اليهود احفاد القرود واسياد منقاش وغيره من العرب هكذا يسير يامدهش من جرف في دحديره ومن دحديره في جرف الخ الخ الخ

اما انت يامخاوي منقاش يا اسد خليك عل نفس الوزنه والخطه نفذها بحذافيرها اذا استطعت ان تستولي على حمار منقاش كل شئ ينتهي وتنسف عملية السلام برمتها منقاش

ترى منقاش مايساوي شي من دون حماره والحمير اللى معه واليهود لم يذهبوا لمنقاش من اجله وانما من اجل حماره لان الحمار عربي اصيل وهم مهتمين بالحمير العربيه منذ عام1964 م وكل يوم يكتشفون حمار جديد اشد حميره من اللى قبله الله رازقهم ليش الحسد

[منقاش]

حسبي الله عليك يبو أمجد ,, ما أنت تناوي تعقل وتنخم أبليس .
لكن الأيام كفيله تربيك .