نبي رابع بلوت

[مدهش]

يسعد مساكم والسلام عليكم ورحمة الله وبركاته
يقول أحدهم لا يعترض لك حظك و تعيش بعيد عن جماعتك وربعك , و أقول خله يعترض , أو أقول قام حظك لو عشت بعيد .
أذكر مرة قالوا لي ترانا معزومين بعد صلاة المغرب عند منقاش و تراه شارط علينا إذا أذن العشاء نمسك الباب و اللي يبي يتنخول و يقعد للعشاء الله لا يهينه وهو راجع من صلاة العشاء يجيب معه تميسة , رحت على الموعد و لقيت ما شاء الله تبارك الله حلته العامرة مليانة بجماعته وربعه , سلمت وجلست أشيل في فنجال شاهي و أحط في فنجال قهوة و هو يخيرني هذه سكرية من القصيم و هذه من خلاص الخرج وهذه من حلويات مذاق الملكة .
طبعا كل الحاضرين أعرفهم بأسمائهم , لكن تغلب المناداة بينا بالاسماء الحركية أو أسماء المعرفات , وهات يا سواليف في المنتدى و المنتديات , يقول أحدهم فكونا من المنتدى وسواليفه ( ماعندنا سواليف الا فيه ) .
و أقول أنا أصلاً ما جمعنا في هذا المجلس الا المنتدى و الدليل كل واحد منا من خامس .
بعض المجالس نجلسها ونبي نسولف فيها ما نلقى فيها الا اللغط و القيل و القال وفلان ودى وفلان جاب ونخرج من نميمة وندخل في غيبة , وش لها حل ياشباب , بالتأكيد ما تبي وعظ و إرشاد عطونا الورقة وما فيه الا تكسير روس , ليطلع لك أحدهم ويقول ( خلونا نسولف وفكونا من البلوت ) .
طيب خلونا نسولف , وش عندنا من سواليف ؟
س : فلان يقولون تقدم للفلاينه وخطب من عندهم
ص : ما شاء الله تبارك الله و عساهم عطوه
ج : لا والظاهر سألوا عنه وعرفوا ....
وساعة حوار
أقول عطونا رابع و الا هات سالفتك يا منقاش مع المخاوي بلا سوالف بلا خوالف .
( خاتمة ) :
هل يعقل تترجاني ما اقول إنك في المنتدى بمعرف ......
تعرف معنى الرجاء و الترجي ؟
يا أخي ترجاني في مالي أو في أحد من عيالي ( على الأقل في شيء يسوى ) .

[منقاش]

سعلت يا مدهش عن سالفة حليفك المخاوي وخذها مني وانا أبو نقشه , والمعذره أن كانت مكرره لأن التكرار يعلم الشطار :
يقول مخاوي منقاش أنه نام في ليله من ليالي الشتاء بردان طيان (يبي يسوي رجيم نعوذ بالله من الشيطان الرجيم) , ثم يقول المخاوي أنه شاف نفسه في المنام بهاك الليله وهو يمشي الهوينى رافع راسه يتبختر زي عادته وعلى المروح (المخاوي) عمامه من أكبر العمايم لكن يوم ناظر أسفله ألا وهو عاري ما عليه ولا قطعه قماش من الرقبه حتى الأقدام مثل الربع اللي تعود يروح لهم على شواطي العراه.
ثم يقول أنه أصبح وحاول يقنع نفسه أن روياه من الأحلام اللي تجي وتروح كل ليله ولا تعني شي , لكن ما فيه فايده , جاه وسواس قهري خلى روياه ناشبه في ذهنه وآبيه لا تروح من باله طول النهار وكل ما حاول ينساها عود يهوجس فيها من جديد .
ثم يذكر أنه في الليله اللي بعدها حضر مناسبه زفاف كبيره ما أحد دعاه لها , ولأن العشاء بلاش ترك رجيمه وكبس كريشته من الرز واللحم والفواكه والحلى حتى تحنبطت من ثلاث جهات (من قدام ومن يمين ويسار) وخاف أنه يحبط من كثرة ما أكل ولا يصبح عليه الصبح .
ثم يذكر الماخوذ أنه بعد وصل بيته تناول الوساده ورمى بنفسه على السرير وراح في سابع نومه ما صحاه منها الا رؤيا جديده شاف نفسه فيها (في المنام) هالمره جالس في أرض مزروعه على مد النظر بالبرسيم الأخضر اليانع اللي يتمايل يمنه ويسره مع هفيف الرياح , وكان منشرح الصدر من الخضره ولابس ثياب ضاربه للحمره وساتره لكل جسمه الا راسه كان أصقع (حاسر) ما عليه شي .
ثم يقول المخاوي أنه أصبح اليوم الثاني مرتاب وتراوده الهواجس والظنون من روياه (الحلمين) اللي شافها في المنام ليلتين متلاحقه في ساقة بعضها وعزم على أنه يروح لمفسر أحلام يكون مشهور وتفسيره يحول الحلم لعلم , وكما قرر راح لمفسر مشهور وبالخير مذكور ولا عمره فسر حلم ألا وطلع تفسيره صحيح 100% .
ثم يقول مخاوي منقاش أنه سرد أحلامه على المفسر ورد عليه (المفسر) وقال أنه ما يفضل يعلمه بتفسير أحلامه ,, لكن المخاوي زاد ولع بالتفسير وزاد قلق وخوف , وحتى سير المفسر يسير دهنه بأربع ورقات من فية الخمس الميه (2000ريال) ولزم على الشيخ أنه يفسر له ما شاف في منامه قبل يقوم من مقامه .
وبعد دهن السير ولزم جاوبه المفسر وقال : شوف يالمخاوي , لا تزعل مني أذا كان تفسير حلمك ما يروق لك , تراك أحرجتني وترى تفسير روياك في الليلتين :
هو أنك ثووووور ثور من ثيران بلاد الحرمين الشريفين ,,,,,الرويه ألأولى تفسيرها أنك ثور معمم ,, والثانيه تفسيرها أنك ثور الله في برسيمه .

[spiderman1111]

يا منقاش ما تكبك من الغيبة
خاف الله صهاد الظالمين لا تصيبك حوبة

[شبلي أبو الونات]

سبحان الله
الواحد ما يقدر يغيب له يومين عن المنتدى الا و يجي من يتناوله حش وحشيش
هذا لان صاحبي وعزوتي المخاوي حب ياخذ له يومين في مدينة الرسول صلى الله عليه وسلم يؤوب فيها شوي ويدعي لي و يصفي نيته الا و تتلاقطونه محشات
يا منقاش الدنيا قطار وعابر وانت اقرب الى اخرتك من بدايتك و لا تظن العلوم اللي جابها عنك مدهش وانك راعي كرم وجود تبي تشفع لك انا اذكر اني كنت حاضر معهم و كانت عيونك تبي تطلع من راسك يوم تشوفنا حاطين ايدينا في الكروسان وانت تسوي نفسك تاكل معنا وحبه في فمك وحبه في جيبك

[المشتاق]

سلام ياصحبة الشر
أنتم وراكم تخلون العلم حق الرجال و تحاوصون
خلوكم في الموضوع والا خليت بن سلمان يصكه لكم

[منقاش]

يا جماعه ترون الصدقه ما أحب أمنها والا أطريها . لكن ويش السواه بعد فتحتم بابها ..
أما عزيمتكم ذيك الليله فهي كفارة يمين أطعمت فيها عشره مساكين , وانتم كنتم بسلامتكم أحداعشر (11) شحات على قول المصاريه , وكنت أبغي أطرد الواحد الزايد لكن ابن فنحاص قال خلي الماخوذ (الواحد الزايد) واحسمه من كفارة اليمين الجايه .

[شبلي أبو الونات]

يا جماعه ترون الصدقه ما أحب أمنها والا أطريها . لكن ويش السواه بعد فتحتم بابها ..
أما عزيمتكم ذيك الليله فهي كفارة يمين أطعمت فيها عشره مساكين , وانتم كنتم بسلامتكم أحداعشر (11) شحات على قول المصاريه , وكنت أبغي أطرد الواحد الزايد لكن ابن فنحاص قال خلي الماخوذ (الواحد الزايد) واحسمه من كفارة اليمين الجايه .

يا فرحة المخاوي فيك
سبحان الله مدهش يلمع فيك و يظهرك امام الناس بمظهر الكريم الحاتمي و انت مثل اللي يقولون له ( خذ خير ويقول ما معي ماعون ) .

[منقاش]

أرجوك يا شبلي أنت ومدهش , أقول أرجوكم بحق المحبه والمعزه الكبيره اللي بيني وبينكم أنكم تقطعون ذكر الجبان مخاوي منقاش ..
هذا أشوفه مثل البرغوثه وان كبر مثل الجعرور , ولا أتنازل أحكي فيه لو ما أنتم جبتم طاريه ...

[مدهش]

أرجوك يا شبلي أنت ومدهش , أقول أرجوكم بحق المحبه والمعزه الكبيره اللي بيني وبينكم أنكم تقطعون ذكر الجبان مخاوي منقاش ..
هذا أشوفه مثل البرغوثه وان كبر مثل الجعرور , ولا أتنازل أحكي فيه لو ما أنتم جبتم طاريه ...

أمسينا و أمسى الملك لله
بحق المحبة والعنزة الكبيرة نبي نترك لك ذكر المخاوي فلعلها ساعة غضب تندم عليها .
وبعدين أبنشدك عن بلا حدود الرجال اللي طمر عليكم في الاستراحة وعاث فيها بالهروج والمروج و أنتم تتفرجون وما فيكم اللي قدر يطفي ضوه .

[مخاوي منقاش]

المكرم المشرف على الموقع و(صورة لبن سلمان الحليف الاكبر) الرجال (منقاش) اتهمني بالدعارة والفسق امام الله وخلقة وانا ابي حقي والا سوف اغلق المنتدى بقوة القانون كما اهيب بالجليف الجديد بلا حدود ان بستعد للمعركة القانونية وخير الكلام ما الجم المنافقين والمارقين على القانون00

[@ بن سلمان @]

المكرم المشرف على الموقع و(صورة لبن سلمان الحليف الاكبر) الرجال (منقاش) اتهمني بالدعارة والفسق امام الله وخلقة وانا ابي حقي والا سوف اغلق المنتدى بقوة القانون كما اهيب بالجليف الجديد بلا حدود ان بستعد للمعركة القانونية وخير الكلام ما الجم المنافقين والمارقين على القانون00
بن سلمان حليف الحق
فند علمك وأبشر بنصرة الحق إذا لك حق
وترا منقاش في يدي وانت ما أنت بعيد منها وألزم المنتدى و بطلك من البربسة و المحدار و المسناد من ديرة للثانية .

[مخاوي منقاش]

كيف اثبتها و هي واضحه وضوح صلعة منقاش في رابعة الليل وانت وابو عبد الرحمن تدهورون اعيونكم الواحد مثل الي شارب له شي يشحط الحلق00 الم يتهمني بارتياد سواحل العراة؟؟؟؟؟؟هل لديه اثبات على ذلك؟ وانا اتحداه يثبت لاني اولا حريص اذا بغيت اروح لمثل هالاماكن اتاكد انه مابها احد يعرفني او عربي وثانيا لا رحت اويق بسرعه وانا متلطم واطلع على طول فالحق اطالب ولا شيء غير العدل وتجردو من التعصب القبليلا اطربقها على روسكم

[@ بن سلمان @]

اطالب ولا شيء غير العدل وتجردو من التعصب القبليلا اطربقها على روسكم
لا حول و لا قوة الا بالله
دعوة صريحة للتفصخ و العري
وش الحل فيه يا بو عبدالرحمن ؟

[سنا الهجرة]

هههههههههههههههههههههههههههههههههههههههههههههه

[مدهش]

لا حول و لا قوة الا بالله
دعوة صريحة للتفصخ و العري
وش الحل فيه يا بو عبدالرحمن ؟

ضيعتها وهي في يدك
الحين دور أبو عبدالرحمن

[الحجاج بن يوسف الثقفي]

اجتمعتوا ياشلة الفلس
الله يصلحكم والا_____