بنت مزيــــــــــــــــــــــــــونة

[ابو فهد الحشيشي]

السلام عليكم ورحة الله وبركاته

محاورة جرة في احد المنتديات بيني وبين الشاعر ][بعيد النظر][

في تاريخ 9/5/1429 هـ


من امس واليوم اغازل في مزيونه = والقـوم كلـن بعينـه يغازلهـا
اتلـد فالقـوم وعيونهـا مـنـي = وانـا علـى دربهـا ماتعـدانـي
البنت عن سكة العيب مصيونة = ماكل رجل بغرامـه يحايلهـا
لوصار نقاش لكفوفها يحنـي = وانا علـى دربهـا ماتعدانـي


ليت الحشيشي يهدّي على هونه = وأنا من العام بالود اواصلهـا
ياكثر من هو على البنت متعني = وأنا علـى دربهـا ماتعدانـي
إن كان ماتعرف العشق وفنونه = لاتزهق يديك تفهق جدايلهـا
يوم المنا مايجي كـل متمنـي = وأنا علـى دربهـا ماتعدانـي


انا لها ناصب البيت وركونه = ماباقي الا شويـة وانزلهـا
والله من الأنس والجن يامن = وانا على دربها ماتعدانـي
راس يناطح نبا نكسر قرونه = حتى يعرف الرجال وحبايلها
ماكل واحد لها يضحك السني = وانا على دربهـا ماتعدانـي


أضغاث الأحلام ماهي بمضمونه = ياللي على غير واقع تفصلهـا
سبحان من هو على العلم مكّني = وأنا علـى دربهـا ماتعدانـي
تلقى حلاوتك في الصبح ليمونه = وآصبر عليها بعـد ماتحصلهـا
خلك على طيف الأحلام متهني = وأنا علـى دربهـا ماتعدانـي


منته من العود ولامن غصونه = ولا انت منها ولامن قبايلهـا
اتضن وتشك ويخيب الضنـي = وانا على دربهـا ماتعدانـي
احكام باحكام بالشرع مطعونه = حكمك يهمش وباقي قلايلهـا
بين العرب منت شيعي ولاسني = وانا علـى دربهـا ماتعدانـي


ماني بمجنون تسري به ضنونه = والحق كلمه ولا آنته بقايلها
مرّتك وآنته بمسحوبك تغني = وانا على دربهـا ماتعدانـي
ياماأصعب الفعل والهرج ياهونه = تقوله اهل المثل فـي مثايلهـا
ماناخذ الدول من محرق البني = وانا علـى دربهـا ماتعدانـي


كم واحد قبلك انسـاق لخمونـه= وامسى في ميل الدروب وعدايلها
البـرق يبـرق ورعـادة يدنـي= وانـا علـى دربهـا ماتعدانـي
لاتفرغ الزاد في غيـر ماعونـه =ويجيك عاقـل بهرجـة تحثلهـا
المنحل ابوه مـن دونـه يزنـي =وانا علـى دربهـا ماتعدانـي


اللي شرى الغاليه حط عربونه = وأقفى بها غاليه بعد كملهـا
لاهو بسارق لاهو بمتجنـي = وانا على دربهـا ماتعدانـي
النجم عالي وبعد المدى دونه = توضي على البعد آنته تخيلها
وإن شفتها تسري تون وتحني = وانا على دربهـا ماتعدانـي


عربونك يجيب لك بنت دندونه = فصيلتك تنطبق مع فصايلهـا
واسكندراني ليا شافك يهنـي = وانا علـى دربهـا ماتعدانـي
دون المغاتير شايب معه شونه = عند الأصايل يـوده لصايلهـا
ماياكل الا من انجاضها والني = وانا على دربهـا ماتعدانـي


إن طار بالون وإن طاح بالونه= إكتالها بعد ماكنـت كايلهـا
تلقى الكمنجه مع المطرب الفني =وانا علـى دربهـا ماتعدانـي
الشايب اللي كبر وإختلف لونه =ماتت زنوده ولا أشعل فتايلها
والسالفه بطن ذيب ولحم جني =وانا علـى دربهـا ماتعدانـي



وتقبلو تحيتي
والسلام عليكم ورحمة الله وبركاته

[ابو عادل]

محاورة بحجم شاعريها
صح لسانك ولسان بعيد النظر
كلاكما كبيران ومن قمم المحاورة.

[أبو عبدالرحمن]

وعليكم السلام ورحمة الله وبركاته

مشكور يا ابو فهد على مشاركتك..والاستمتاع بمحاورة المبدعين..

[مشاكس]

أبو فهد
بعيد النظر
محاورة غاية في التصوير وجمال التركيب وإجادة وصف امعنى
ماهي غريبة على الكبار

[سنا الهجرة]

محاورة ممتعه

وقويه في معانيها


ومحبوكة ومسبوكه

من أنتاج معلمين ماهرين

[فارس الكلمة]

محاورة محبوكة اكيد
بعيد النظر وابو فهد
بيض الله وجيهكم

[@ بن سلمان @]

كل سبقني بالاشادة على روعة المحاورة
وأنا هنا لأشكر وجودها بيننا