قصيدة ( ابن الفقير ) للشاعر //محمد أبو زيد الأسيوطي

[محمد أبو زيد]

يا ابن الفقير // قصيدة زجلية للشاعر محمد أبو زيد الأسيوطي
يا ابن الفقير
أوعي تشكي للوزير
م الغلا
ولا تعمل بلبلا
أو تقول بقي فيه مجاعة
في البلاد
هيه إيه بقت اختراعة
كل ساعة
مشكلا
قول تمام سمعنا وطاعة
وان سمعت قول إشاعة
مش إذاعة
هيه ولا
ولا إيه المسألة
وان لقيتها صداع وخل
والكلام أصبح ممل
هوه حل
يناس بسيط
ع الغلي تعمل عبيط
أوعي دمك يوم يشيط
أو تزيط
خليك ظريف نام خفيف
يعني بناقص م العشي
طول حياتها ملطشة
ويا اهلك
وأنت حالتك
بالبلا
يعني تشرب م البحور
مش مهم
ولا تسكن في القبور
مش مهم
المهم أن القصور
مش ليك ياللا
الغي عقلك خلي جهلك
للأمور
هوه الأساس
أوعي تعمل فيها عنتر
دا الشعوب يا ما فيها ناس
غاوية الكلام والفرفشة
وأنتا برضوا مش ح تقدر
والمشاكل مالها لازمة
وان قالو لك قول دي أزمة
أيوة أزمة ومرحلة
يابن وطني لا تشاكل أنت مش قد المشاكل
أنتا بس
غني طبل قوم و هبل
قول براحتك بس وحدك
في الخلا
او يسمع حد بيك يشتكيك
يطحنون زي الفريك
يبقي يومك قندلا
ولا تنهيها بعلقة علقة حلوة
ولا غلوة
تنسي فيها المرجلا
وأما تغلي أي سلعة
قول بناقص منها خالص
أنت ناقص بهدلا
لو يزيد السعر لم
في الغدا أو مش مهم
ضم أيدك في الفطار
والخضار
منه بناقص في العشا
والرغيف
لو مش نظيف أو خفيف
ولا طعمه جلد ليف
ولا شكله
عاد مخيف
قول بناقص منه خالص
ولا يعني هوه كيف
كل وجبة بالغموز هوه يعني جوز ولوز
ولا عيش
اعتبر انه مفيش
يعني عيش
يعني قصر في الكلام
والعلام
مش شرط يبقي في مدرسة
والهدوم
علي جتتك متقطعة عامله زي البردعة
قديمة بس كويسة
يعني مش لازم تغير كل يوم
ع العموم
مهما كان جيبك
مفلس
برضوا عيش
أو تغلط أو تغلس
وأوعي تطلع م الهدوم
لا النجوم
تفتن عليك متلاقيش
وفي أيديك تلبس أساور من حديد
والشاويش تلقاه معك
لاء وتلبس إيه بقي
قول جريمة قول قضية
قول حبال المشنقة
قول وقول
قول بريء قول ضحية
في النهاية
هيه هيه
طرحة علقة ميه مية
وأنت جسمك عمره
واخد ع الشقي
واللي نحس
مش ح يشعر
لما يفطس ولا يغطس
في الهموم
حتى لو تعرف تعوم
برضوا ح تودع فطيس
والنصية كون حريص
قبل ما تلبس قميص
الجواز
خلي عينك ع الجهاز
دا المهور والعة وجاز
وأنتا بيتك من قزاز
متحدفش الناس بالطوب
وأوعي تمشي بالحبوب
لو تبقي في يوم عريس
وأنت بقيت
لا تفكر يوم تخلف
أو تولف
يوم تنام أو تقيل كل قيلولة بعيل
والحكومة تشيل
وتصرف
ع العيال
يعني مش لازم تسيب
ليك فروع
أو مجرد احتمال
للوجود من أي نوع
كون قتوع
يا للي مش لاقي وعمرك كله جوع
إيه اللي واخده من حياتك
إيه مفيش
يعني أصلا
أنت مش مفروض تعيش
شكرا لكم وتحياتي الشاعر/ محمد أبو زيد الاسيوطي

[فاعل خير]

وفقكم الله تعالى

[المشتاق]

صح لسانك يا بو زيد
أتحفتنا بهذه الرائعة

[أبو علي]

زينه ما شاء الله عليها .

[أبو عبدالرحمن]

الله يحييك أخي محمد...وحي الله أهل الكنانة

نرحب بكم في منتدانا ...حللت أهلاً ..ونزلت سهلا..

والله يعينكم ..ويصلح أحوالنا وأحوالكم...

كلمات جميلة وسهلة ...ومعبرة..

ننتظر جديدك..وإبداعك..

[@ بن سلمان @]

يعطيك العافية شاعرنا محمد أبو زيد
الفقر ليس عيب والغنا غنا النفس
نستبشر بقلم شاعر

[مدهش]

أخي محمد
الفقر هو ما كتب الله على من أراد من خلقة
ليس لانسان أن يختار أفقير أم غني
والرسول صلى الله عليه وسلم كان يسأل زوجاته أعندكم طعام فلما لم يجد كان يقول إني صائم
ثم كل قرش يكسبه الانسان يحاسب عنه
كيف اكتسبه وفيما انفقه وهل أدى حق الله فيه
شاعرنا الفاضل الحديث ذو شجون والشعر لا يكل ولا يمل
فطوبى لنا حضورك بيننا

[خلف بن عبدالعزيز الثمالي]

صح لسانك يامحمد
وحيّاك الله

[محمد أبو زيد]

اشكر
اخوتي واحبتي
وكل من علق بكلمة علي قصيدتي
وادعو الله ان يجعل هذا المنتدي
منبرا للحق وطريقا للهدي
وفقني الله
واياكم الي ما يحبة ويرضله
اخوكم الشاعر// محمد أبو زيد الاسيوطي

[محمد أبو زيد]

الاخوة والاخوات والاصدقاء الاعزاء
بداية
أنا اشكرك جميعا علي تعقيبكم الجميل علي قصيدتي
واعلموا اخواني انني في قصيدتي
لا الوم الفقير علي فقرة
ولكني احارب بقلمي من افقرة
من كان سببا في جوعة
من كان سببا في ظلمة وقهرة
من اخذ منه لقمة عيشة
من اخذ منه فرصته في ان يحيي مثل غيرة
حياة كريمة
من اخذ فرصتة في عمل وتركة يتسكع في الدوب
ان احارب من لا يخرج من مالة
زكاة مالة
من لا يتقي الله عز وجل في الفقراء
انا لا اسخر من الفقير ولكني اسخر من واقع اليم
من المحسوبية والقهر والظلم
والبعد عن الدين
ولا اسخر من الفقير
لانه ما بيده افقر نفسه
انا لا الومة وانما الوم مفردات الحياة من حولة
احبائي
تعلمون ان الفقر قد يكون سبب انحراف الشخص عن المسلك القويم
ان لم يكن متمسكا بالدين قد يؤدي مثلا
الي السرقة وقد يجعل المراة تنحرف لتطعم
اولا دها وقد يكون سبب الكثير من الجرائم الا ما رحم ربي
ولا يقدر حياة المحروم الا من حرم
واخيرا لن اقول الا كلمة واحدة
لو كان الفقر رجلا لقتلته
شكر لك اخوتي الاعزاء
اخوكم الشاعر // محمد أبو زيد الاسيوطي

[المبرِّد]

قصيدتك جميلة وتعليقك أجمل يا اخ محمد

[الغيور على ربعه]

صح لسانك يامحمد
وكل عام وانت بخير