خطاب مسجل بعلم الوصول // الراسل الشاعر محمد ابو زيد الاسيوطي

[محمد أبو زيد]

خطاب مسجل بعلم الوصول
للشاعر // محمد أبو زيد الاسيوطي



سيادة

جناب الوزير
الهمام
تحية و سلام
مقدم إليكم
باسم الفقير / سعد بن مسعد
سعيد الإمام
مواطن وقاطن
في قرية حزينة
بيوتها قديمة
ومكتوب عليها دخولها حرام
واعرض شكايا
باسم الضحايا باسم الولايا
اللي فيهم كلام
يا ريت ترحمونا كفاية غلا
حياتنا بلا
لا عارف أعيش ودايما مفيش
ولا عندي عيش يكفي الولا
وأروح المخابز أشوف بهدلا
وبطني في عمره
ما يوم اتملا
ومن جوعي أبدا لا يمكن
ح أنام
ووسط الزحام
أشوف كام مواصلة
علي ألف وصلة
اركب وانزل وادفع وأبدل
وشوف دول بكام
وأروح شغلي وخري
وملحقشي أمضي
ويخصم مرتب جنابي تمام
سيادة
معالي الوزير الهمام
أنا عندي عيل
معنديش غريه
ولو ضل حيطة أكيد ح يدارية
ولا عنده شغله ولا مشغلا
وحالته بلا
لا قادر يفكر في مرة
في جواز
ولا عنده يفرش سرير
مش جهاز
ونفسه في شقة
وتحت الحساب
ومش شرط طرقة
ولا حتي باب
ولو أوضة واحدة
علي لمبة جاز
تكون في أي حته
يا ريت والسلام
واطمع في شغله تساعده
يا بية
ولو كان راتبها
خمسين جنية
دا ابني مخلص علاموا وليه
قول يعني عام
أو قول عامين
خمسة ستة يجي له سنين
وطالع لأبوه يحب الكلام
ولو حتى صعبة
وظيفة الولد
خلاص مش مهم
لكن عندي شكوي
بخصوص البلد
مية بلدنا
تعيي السليم
وماتوا كتير م الرجال والحريم
وقالو فشل
وكام ألف واحد يعني غسل
الكليتين و كام 000وكام 0000
وكام مرة نشكي ونحكي
ونبكي
ونلقي الشكاوي تضيع في الزحام
سيادة
معالي الوزير الهمام
بلاش المياة
جايز صعب إصلاحها
في وقتنا
سيبك وخلينا إحنا هنا
دا شكوي ولينا
بقي كلنا
كتير عندنا مرضي
وفوضي
كتير في العلاج
وكلة بيكشف وحسب المزاج
طبيب يكرمك طبيب يحرمك
طبيب يشتمك
و روح القري
وشوف أي وحدة
ومستشفي صحة
تصاب بالجنون وتحلف بربك
لا يمكن تكون
دي مستشفي صحة
دي لا تشفي دوخة
ولا حتي كحة
يعافي جنابك وتفضل بصحة
كلامي يزعل جنابك بلاش
عموما بلاش
لا كان سعد مسعد
ولا حتي عاش
خلاص اللي يعيا
يولع يموت
لكن ليا شكوي
بخصوص البيوت
بيوتنا وآلية خلاص للسقوط
بيوتنا 000000000000
بلاش
بلاش
جنابك تفضل
أكيد السكوت
جنابك 0000
جنابك تفضل
تفضل أموت
أموت بس ح أفضل
احيي جنابك واقف عند بابك
وأهتف وأقول
عاش الوزير
عاش الوزير
عاش أيوة عاش
وتفضل سنين جنابك عمار
مقدم إليكم/
باسم الفقير
سعد بن مسعد سعيد الحمار

[سنا الهجرة]

الله المستعان >> ياما ناس عاييشن كذاااااااااا

أسل الله أن يشفي كل مريض ويغني كل فقير ..

صح لسانك يا شاعرنا ..

[أبو عبدالرحمن]

دا الحال من بعضه

يعني

كلنا نشتكي

شكرا لك أخي محمد على هذا الشعور الذي يمثل الطبقة الكادحة في كل مجتمع..