دار لبو عادل عريب المناسيب

[بن داخل]

يابو هبه هيا تجهز على الجيب = واصل الرجال اللي يشرف لقاها
منصاك دار فالسنين الشلاهيب = تقري الضيوف ولا تحسب قراها
دار تعلوها رجال رعابيب = جعل الردي واهل الردي من فداها
دار لبو عادل عريب المناسيب = عزز بناها بالجمايل كساها
وليا وصلت الدار يبدي لك شبيب = نفسه من بيوت المعرفه سقاها
ياخذ ويعطي مايخاف العواقيب = لجل ان رجله فالخطى ماثناها
من بعدها طف وتوحى التراحيب = اللي تسلي خاطر اللي وحاها
واقلط على الدله ومن غالي الطيب = معمور دار ماخسر من قضاها
وبعد العشا يدني لك ام الأعاصيب = اللي سمنها ماقصر عن عشاها
خذ ماقسم لك في ذرى شمخ النيب = وابد العلوم اللي معك مبتداها
وان كان ابو عادل فنفسه حثاريب = بشره بعلوم الوفى اللي يباها
قله محمد عدكم فالمكاسيب = والهرجه اللي قلتها ماعناها
وان كان صوب واختلف فالتصاويب = نفس ابن داخل السموحه مناها
تراه رجل مايحب التخاريب = ولاعادة الأجواد رمي قطراها
وان كان وصلك من بعيد الغياهيب = بعض الهروج اللي حشا ماحكاها
لا تسمع هروج الحكي والتعاجيب = لافادت البايع ولا اللي قناها
وختامها مني لكم سمن وحليب = بالطيب نبداها وبه منتهاها

[ابو مهند]

صح لسانك يا ابن داخل عداك العيب راع الوافيه جعل ابوك للجنة وامك للجنه

[المشتاق]

صح لسانك راعي الوفاء والطيب


يقلون شيء يترقع وشيء ما يترقع

[أبو علي]

صاحب وفاء يا بن داخل ، وفيت وكفيت ،

[حسن عابد]

البارح ما كنت فاهم هرجة الجيب لكن القصيدة اعطتنا العلم .
الله يقويكم.
اشهد انك ياحليفي ما تحب التخاريب

[بن داخل]

اللهم اجعل والدي وواليك ووالدي كل من قرأ هذه الصطور في الجنة وجمعنا وإيك في مستقر رحمته ياأبا مهند
يابعد حيي

[بن داخل]

أحنا محصلينها منك والا من المنسم يامشتاق
ماش شي مشقوق حتى نرقعه العلوم كلها طيبة

[بن داخل]

يابن عزاب بيض الله وجهك ووجيه الرجال اللي كماك مايجي منهم الا كل هرجة وافية

[بن داخل]

علوم الجيب وصلتك ياحليفي
والباقية فالطريق علوم تبيض الوجه
وابشرك علوم منتدانا كلها غانمة مع شرواك من الرياجيل