بيني وبين الشاعر العلم عبيدالله المجيريشي

[بن داخل]

السلام عليكم ورحمة الله وبركاته
اليكم هذه المحاورة وهي بيني وبين لشاعر الققدير عبيدالله المجيريشي

المجيريشي من اول فرض صلى راح يمسح =مدعي الغفران مدري يدعي بعض النبوة
يا عبيدالله انت قلته جد والا كنت تمزح= مد حبل المعرفه فالعلم والا قوم طوه

مرحبا ترحيب مثل السيف ليمن صاب يجرح=وانت لاتستعجل البراق لين يجيك نوه
من يتاجر في بضاعه طيبه يخسر ويربح=والذي مثلك نظاف اشكالهم برى وجوه

البقى ياللي ترحب مانبي الاستاد يشرح=نعرف البراق في نو الحيا لابان ضوه
التجر فالسوق والدلال عيا اليوم ينصح =شال كل السوق ويقول التجاره بالمروه

المدرس لجل خاطر طالبه يجمع ويطرح=واثر الطالب يعيش ابجو ثاني غير جوه
كنت ابا انجح زكي لكن عيا الورع ينجح=يوم جاب لي دفتره وليا اسفله يشبه علوه


المدرس حط ورعه فالفصل وامسى يمدح =والنتيجه نجحو المزغور من بند الابوه
علم الاستاد لاجا فالفصل لاعاد يسرح=والامانه لا يضيعها على شان الاخوه

كيف تعثر يالبعير اشعيل في الدرب المبرح=شدحيلك والدروب امبرحه والليل توه
الصويبه لاتقربها من البل المقرح=الصويب اعطه دواء وان ماشفي بالنار كوه

يا مدور للمراجل رحت لك مع درب ما افلح=والشوير اللي معك لا قلت علم يقول سوه
كنت تبغيها تروح سلم مير العلم ديح= اعلن التوبه ورد الحق ماهي بالفتوة

اثر حبك حب جاير مثل قيس ابن الملوح=لاتدله للطريق وكل من غواك غوه
والله اني شفت تالي الحبل يوم الحبل طوح=والعيار ان مايصيب ادوشك بس تزيد قوه

ياعبيدالله ترى بعد الخيال البدو تشبح =وان قدرت تلوي الحبل الممسد روح لوه
انت فالماقف كبير نقول لك بالله تسمح =علمنا كله مزح ولن سرح لي ثلب ضوه

[@ بن سلمان @]

صح لسانك يا بو عبدالله وصح لسان شاعرنا عبيدالله المجيرشي
واقول لا هنتو

[حاكم الشوق]

ماشاء الله
محاورة جميله

صحت السنتكم

[النجم الساهر]

صحت السنتكم جميع

الحق يقال اننا استمتعنا بما دار بينكما لانكم لم تبتعدوا ظاهريا عن طبيعة المهنه ولكن كما قيل المعنى في قلب الشاعر

[مجنونها]

صح الله ألسنتكما
كان خليتوها بالفارسي حتى يسهل علينا فك الرموز

[صقر المجد]

صح لسانك

[أبو عبيدة]

يعطيكم العافيه

[سنا الهجرة]

صحت ألسنتكم
أبو عبدالله ... والمجرشي

شاعرين متمكنين بلاشك
وتمتعون الجمهور وانا اولهم ..