موالات شعراء المنتدى1 [الأرشيف]

admin

10-29-2006, 05:29 PM

كاتب الموضوع ـ حسن عابد ـ

يامحمد يابن داخل ياعسى صومك قبل لك
ياعسى دار الجنان اتجي لها ولا يجن لك
ياعسى الله يرحمك دنيا واخرى في محلك
ياحليف(ن) له معزة بخاطري ماهي قليلة

يامحمد اليوم انا برسل رساله
وانته عليك القراية والكتابـة

ارسل تهاني على ربعي ثمالة
وان زاد فيها لكم حلف وقرابة

أردنا دمج الموضوعين ـ ولكن ظهر الموضوع باسم المشرف الفني ـ
وهو للأخ ـ حسن عابد ـ

admin

10-29-2006, 05:34 PM

من ردود الأعضاء :
أبو عبدالرحمن:

مرحبا بعودتك أبا علي...
وبن داخل ـ أبو عبدالله ـ يستاهل وراعي أوله

أبو نائف
احسنت ابو علي صح لسانك
ويستاهل بن داخل

الان بيرجع غصب مافيه مجال لازم يترك النحل ويعود

عثمان الثمالي:

احسنت ابو علي صح لسانك
ويستاهل بن داخل

admin

10-29-2006, 05:36 PM

ياسلام الله على ربعي النشامى والتحيـة
الرجال اللي لهم في خاطري حشمة قويه
ما نقص منها جرام ولا نقص منها وقيه
ةالحقيقة ما بنى زين البيوت الاعمدهـا
سلمان بالله لا يقصـر حبالـه
يقدم على العلم مافيها حرابـه
سلمان يدري محمدكيف حالـه
غايب عن الناس ما جانا جوابه

admin

10-29-2006, 05:37 PM

رد بن داخل:
مرحبا ترحيب وافي ياحسن مني يصلك
ياعريب الجد في درب المعرفه من يزلك
الوفى والمعرفة والجود طبعك ويش اقلك
ياحليف (ن) له معزه بخاطري ماهي قليلة
جتني الرسالة على طيب وجماله
........... وانته وانا ياحسن سبعين غابة
أشوف وادي قيا تهدر جماله
............. واللي هدر قام يومي لي بنابه

الحجاج بن يوسف الثقفي

10-29-2006, 05:39 PM

والله المشرف الفني هذا ابواسم انجليزي يبغاله شغل
امتحن العالم في مشاركاتهم يحذف ويوصل ويقطع ويسرق مواضيع الشعراء
هذي القصيده خابرها لحسن عابد
الشرهه على ابوعبدالرحمن المفروض يحطني مشرف فني ويرجع ابو اسم انجليزي
مراقب مع بن سلمان

admin

10-29-2006, 06:01 PM

صبرك شويه يا منسم
لا أخليك تفتكر تسسسسسسسسسسسسسسسسسسسسس تس

admin

10-29-2006, 06:03 PM

رد بن سلمان :
كن ودك تخليها رباعية

مرحبا ترحيبة تبدي بعد رد السلامي
يالصحيب اللي بدى بالعلم ماخل النظامي
عن بني عمي توحى يا حسن مني كلامي
والحثيقة ما بنى زين البيوت الا عمدها

سلمان رافع جنيهه مع ريالـه
والمعرفة دونها ما صك بابه
والا محمد كما نـو بخيالـه
يارد على العد ما دغثر شرابه

admin

10-29-2006, 06:04 PM

رد بن داخل

الله اكرمنا وعز ديارنا برجالها
والمواقف لهلها واحنا ترانا عيالها
مير سوق القافله واحذر تضيع حبالها
ياحليف ن له معزه بخاطري ماهي قليلة
أنا لفاني الخبر عبر الرسالة
.......... واقبلت والنفس مافيها غلابه
لن كان ودك تنشد عن ثماله
.........السيف ماانحازلالا عن نصابه

admin

10-29-2006, 06:04 PM

والان نريد أن يكمل الشعراء الكرام

أبو عبدالرحمن

10-29-2006, 08:20 PM

أحسنت أخي الكريم ـ المشرف الفني ـ
ولو قام الأخ ـ حسن عابد ـ فقط بكتابة عنوان جديد...ووضع فيه مشاركة واحدة؛ سنقوم بدمج هذا الموضوع في موضوعه الجديد!

ريمان

10-29-2006, 11:02 PM

اتمنى المشاركه معكم لكنني توي مبتدي 00الله يعطيكم العافيه

أبو شنب

10-29-2006, 11:47 PM

المشرفين الكرام لا تداخلون المواضيع ببعضها

حسن عابد

10-30-2006, 03:47 AM

المشاركة الخامسة غير موجودة وهي

الله اكرمنا بكتابه والله اكرمنا بنبيه
والله اكرمنا بشاعر مثلكم مافيه زيه
خال خالك يامحمد هرجته ما هي غبيه
ياحليف(ن)له معزة بخاطري قليلة
الله يبقيك ياراعي الصمالة =لكن تاخرت عن دور النقابة
واللي هدر مثل غيره ياللاله=يهدر وعينه على زادوشرابه

حسن عابد

10-30-2006, 03:50 AM

المشاركة السادسة رد بن داخل

الله اكرمنا وعز ديارنا برجالها
والمواقف لهلها واحنا ترانا عيالها
مير سوق القافله واحذر تضيع حبالها
ياحليف ن له معزه بخاطري ماهي قليلة
أنا لفاني الخبر عبر الرسالة
.......... واقبلت والنفس مافيها غلابه
لن كان ودك تنشد عن ثماله
.........السيف ماانحازلالا عن نصابه [/frame][/quote]

حسن عابد

10-30-2006, 03:55 AM

والان نريد أن يكمل الشعراء الكرام
الادمن شكرا امجهوداتك وتحت امرك
ابو عبدالرحمن
ابشر طال عمرك

حسن عابد

10-30-2006, 04:02 AM

يامحمد يابن داخل ياعسى صومك قبل لك
ياعسى دار الجنان اتجي لها ولا يجن لك
ياحليف(ن) له معزة بخاطري ما هي قليلة

يامحمداليوم انا بكتب رساله=وانته عليك القراية والكتابة
ارسل تهاني على ربعي ثمالة= وان زاد فيها لكم حلف وقرابة

حسن عابد

10-30-2006, 04:13 AM

ارجو مشاركة ابو عادل مع بن سلمان

حسن عابد

10-30-2006, 04:15 AM

اتمنى المشاركه معكم لكنني توي مبتدي 00الله يعطيكم العافيه
الفرص قادمة ان شاء الله

@ بن سلمان @

10-30-2006, 08:30 AM

حسن عابد
الشكر لك , فكرة رائعة وجميلة
ولو استهوتني كان شفتني فاتح مكتب في الطائف
ارجو المعذرة , ورحم الله امرأ عرف قدر نفسه
وانا عرف قدر نفسي
وموكل لكم زهور اشوفها طلعت ال 40

حسن عابد

10-30-2006, 10:08 AM

بن سلمان اشكرك والحقيقة اني محضر لك بيتين وفيها حش لك انت وابو عادل لكن اردها في محمد ان كان جار عليه

حسن عابد

10-30-2006, 11:26 AM

المواقف تعلمون انه لها قادة وساسه
ماجهلناها وحنا اللي ندرسها دراسه
كل تفصال(ن)نجيبه يامحمد في مقاسه
ياحليف(ن)له معزة بخاطري ماهي قليله
اشعور طيب ولا نبغى بداله=مشكور ياذيب عن كل الذيابه
محمد اليوم طالع مثل خاله=والسيف يغمد ولايترك جرابه

بن وافي

10-30-2006, 12:30 PM

نشكر الشعراء
حسن عابد وبن داخل
على ماقدموا من مساجلات رائعة جداً

كما نأمل من بقية شعراء المنتدى المشاركه ويعطيك العافية جميعاً
ولك الشكر أيضاً مشرفنا الفني

ابو عادل

10-30-2006, 03:39 PM

تلبية لرغبة بعض الإخوة في المشاركة أود المساهمة معهم بالمشاركة
التالية وهي على لون الرجز والمعني بها يعرف نفسه:

سلام ياصقرا على الحد الشمالي
يااللي توايق من على مشراف عالي
مرتاح في عاليه لاحالك بحالي
ترى الزمن دوار وافلاكه تدور

المبرِّد

10-30-2006, 05:10 PM

موالات رائعة من الجميع

بن داخل

10-30-2006, 08:13 PM

ياحسن ماني بجاهلك انت من روس الرفاقة

انت من بيت المعرفة والشهامة واللباقة
مير شوف الموس في ايدي ياحسن موس الحلاقة
ياحليف له معزه بخاطري ماهي قليلة
اللي سواتك ترى مااقبل بداله ........ الجد واحد وحنا اقرب قرابة
نعمين بك ياحسن مني اصاله ............ أقولها في حضور وفي غيابه

بن داخل

10-30-2006, 10:10 PM

يامرحبا ترحيب من راس يلالي
ترحيب وافي مرسلينه للرجالي
أقولها تقدير لأصحاب المعالي
والحي مايمسي مع اصحاب القبور

ابو عادل

10-30-2006, 10:56 PM

دام البقا يامن عنانا بالتحية
مقدم الواجب وراعي الشاذلية
حنا على خبرك بنا والنارحية
والعالم الله بالنوايا والصدور

بن داخل

10-30-2006, 11:35 PM

ياراعي الميقاف جينا بالسوية
مانقبل الزله ولا نبغي الخطية
لكن من وكلك بشداد المطية
وانته تعرف ان المنايافي النحور

ابو عادل

10-31-2006, 12:02 AM

ياراعي الطاروق لاتخلف طروقك
الارض تحتك والسماوالبرق فوقك
أحفظ حقوقي وانت دافع عن حقوقك
ثبت قدمك ولاتلف ولاتدور

زهور الريف

10-31-2006, 12:19 AM

هذي مشاركه بسيطه نيابه عن صديقي العزيز بن سلمان المراقب الجديد والاربعين لنا معها وقفات لاحقه انشاء الله

ياسلام الله على الشعار واحد جنب واحد
جيت بنيابه عن اللى محتجي جوف المراصد
لن بغيتوا العرف عندي من فنون الشعر واجد
خلوا اللي مايعرف الشعريرقد ياحليله
الطيب مالي عن ادروبه حواله = والشر يخسى ويخسى من بدابه
دنت بروق السماء وامطر خياله=والسيل جراف ممنوع اقترابه

حسن عابد

10-31-2006, 07:20 AM

يا محمد من يشيل الموس في اوقات شدة
ان لقي له فارس(ن)والله في لحظة يرده
وان لقي له خبل زادت حدته والله حده
ياحليف(ن)له معزة بخاطري ماهي قليلة
اسئل عن الموس بالله وش جرى له=منهو من الموس في قلبه مهابه
اللي تورط ترى حالته حاله=النايم اللي صحي يمكن درى به

بن داخل

10-31-2006, 07:22 AM

استلم ياحسن من زهور
انا ماجنبي أحد ولاني جنب أحد
شيل حملتك ياحسن

حسن عابد

10-31-2006, 01:22 PM

اهلا بزهور اصالة ووكالة وشكرا لتفاعلك اصالة ووكالة
00000000000000000000000000000000000000

مرحبا يازهورنا ياواحدة والاصل واحد
كان صدقتي حسن ولا نجيب الفين شاهد
اسمعيها وافهميها ما نبى منكر وجاحد
والحقيقة لو هرب جساس غطته الجليلة
امشي مع الدرب والدنيا سهاله=ان كان سلمان ولا بالنيابة
ادري عن اللي وصل واللي فباله=صلابة الراس مانبغى صلابة

بن داخل

10-31-2006, 02:31 PM

ياحسن ضل السما واحد وحنا من عباده
لاتحسب انك على سطح القمر حزت الريادة
البعير اليا هدر لابد مانقصر قيادة
ياحيلف له معزه بخاطري ماهي قليلة
الوادي اللي تمشى في جلاله
........ لا تحسب انك ورثته بالعصابة
الزم حدودك وانا حدي لحاله
........ ...لا تخلطون البدون امع الحزابه

بن داخل

10-31-2006, 02:33 PM

انته تحسب ان المكاسب وسط سوقك
ماتدري ان ابليس يمشي في عروقك
ترى الخيال اليا حزم يمكن يحوقك
ماعاد تبعث غير في يوم النشور

ابو عادل

10-31-2006, 05:16 PM

بيض الله وجهك ياأبو عبدالله
غيّر وغــــــــــــــــــــــــــــــــــيّر.

المشتاق

10-31-2006, 06:46 PM

خلوها خلوها
وعن مشتاق دسوها
والله شماته بن سلمان تتوكل عنه حرمة
ومن زود الشماته حسن عابد يحط عقله بعقلها

زهور الريف

10-31-2006, 11:42 PM

مرحبابك ياحسن والله ياطيب العلوم
من رجال ن عارفه درب المعارف والسلوم
خل بن سلمان مالي فيه بعظات اللزوم
وخلوا اللي مايعرف الشعر يرقد ياحليله
ياطيب هذا الولد ياطيب فاله=قاري فنون الادب حافظ كتابه
الشر مالك يبن عابد وماله=من دغثر الماء يدغثر في شرابه

زهور الريف

10-31-2006, 11:47 PM

اش فيك يامشتاق نسينا ما كلينا يوم كنت حتت سواق عندي وهربت وجارة عليك الدنيا ورحت ترعى غنم وذلحين تتفلسف يابو ف.........
المهم ترى بن سلمان يوم طلبني انوب عنه ماهو عجز منه بس يستعرض قدام الناس بقوة علاقته معي واني ادافع عنه
والحقيقه انه يستاهل الفزعه لان قلبه طيب بس عاد لسانه ماهو قادر عليه وهذي مشكله مزمنه عنده الله يعافيه منها ههههههههه

بن داخل

11-01-2006, 07:13 AM

دكتوره يازهور
أجدت تشخيص حالة بن سلمان

حسن عابد

11-01-2006, 01:38 PM

ياهداك الله عود للحقايق يافلاني
البصيرة لا تضيعها تهدد لي المباني
ان درى المشرف ترى يلزمك يارجال عاني
ياحليف (ن)له معزة بخاطري ماهي قليلة
انته علامك تقسم في ذلاله=لاتقطع الشرب عن زرع وقصابه
اللي يسيطر على بعض انفعاله=يكسب رفيقه ولايفقد صوابه

حسن عابد

11-01-2006, 01:45 PM

البقا يازهور يابنت الرجال الطيبينا
كلنا يابنت في موقع على ظهر السفينا
وان مزحنا مزحة(ن)ما فيها شك ولا ظغينا
نشكر اللي راح واللي جا نقوله ياحليله
اللي تقدم لنا ماهو كلالة=شاعر وقاري كتاب(ن)للصحابه
اصاله يازهور عن نفسي اصاله=مادغثر الشرب والضامي هلا به

زهور الريف

11-02-2006, 12:15 AM

صفنا واحد يبن عابد على كل الدروب
ومن لفانا قال والله نعم في هذا القروب
ما يفرقنا كلام مزوح تمشي ما تروب
ومن يدور غير هذا العلم خله ياحليله
خيل خيال ن على شعبة ذلاله=يالله عسى خير في ذيك السحابه
عساك زرت المواقع في ثماله=وتجيب علم المطر واللى سرابه

بن داخل

11-02-2006, 12:16 AM

ياحسن ماانته مقديني وانا عارف صوابي
عارف المدخال والمخراج واعرف وين بابي
قد قرينا في كتابك ليه تزعل من كتابي
ياحليف له معزة بخاطري ماهي قليلة
اللي قسمها ترى راعي الجلالة
........ واللي رضي قسمته ياويش صابه
البن مايستوي لو في دلاله
........ لأهل المدينة لفو باقي الصحابة

حسن عابد

11-02-2006, 02:53 PM

صفنا واحد وكله من جماعتنا ثمالة
والله اكرمنا بهذا الدين واصحاب الجلالة
ازهمي الاقزوز انا بنقل لمشتاق الكفالة
مشرف خربان ليت احمد من الموقع يشيله
السيل يازهور من جاله فجاله=السملقي ممتلي سده وهضابه
ازور انا عزوتي في كل حاله= ادخل قصور الذرىمادخل خرابه

@ بن سلمان @

11-02-2006, 03:08 PM

يعطيكم العافية
الحقيقة شيء ممتع

حسن عابد

11-02-2006, 03:08 PM

كل شاطريامحمد غلطته تحسب بعشرا
مرة تكتب باليمين ومرة تكتب لي بيسرى
اجلس اجلس وسط مكة لا تذكر عصركسرى
ياحليف(ن)له معزة بخاطري ماهي قليلة
من هو الذي راضي بقسمة حلاله=تنقد عليه الشباب امع الشيابه
امشي مع المتن لا تمشي الهياله=يدي بيدك على حرب وعتابابه

أبو عبدالرحمن

11-02-2006, 06:12 PM

أحبتي شعراء المنتدى
حقيقة أمر في غاية الجمال والروعة
نتمنى لكم دوام التوفيق وصفاء النفوس

بن داخل

11-02-2006, 11:03 PM

من بنى جدره على حده وقال الحد حدي
عارفه من ورث أبوي وعارفه من ورث جدي
تحسبونه ياحسن في عرفكم جيز معدي
ياحليف له معزة فخاطري ماهي قليلة
ماني بجاحد مواقيف الرجاله
........ منكم لكن كل سيفٍ له جرابه
ون كنت تنشد عن دروب السهالة
...... لا ترمي الضلع وتصحي ذيابه

زهور الريف

11-03-2006, 02:51 AM

علم واصل ياحسن عابد على روس الرجال
والمدرس قال نصف العلم في فهم السؤال
منت شارب لو يطيح الحبل من فوق المحال
وخلوا اللي ما يعرف العلم يرقد ياحليله
الرمي جاء فالهدف والا قباله =مايعزف العود عزاف الربابه
خطوتك ياصاحبي فيها ثقاله=وان جاك سيفي توثق في نصابه

حسن عابد

11-03-2006, 10:52 PM

شكرا حليفي القوافي ما بقى منها الا اللي ماله طعم شرفتني بردودك الجميلة واستمتعت بهذه المساجلة فلك خالص شكري وتقديري

اما زهور بقي لها رد واحد عندي بكرة ان شاء الله اذا جيت من الدوام

admin

11-04-2006, 08:46 AM

يعطيكم العافية جميعا
أخي حسن : آمل مرة أخرى إعادة المشاركة رقم 1 في موضوع مستقل!!!!
لا بد ان يكون الموضوع باسم صاحبه

حسن عابد

11-04-2006, 11:18 AM

ابشر اخي الكريم المشرف الفني

حسن عابد

11-04-2006, 03:33 PM

افهم اللي راح ياطالب ولا عندي زيادة
درسنا واضح ولا يحتاج له شرح واعادة
لا تغير فكرتي ياصاحب اصحاب السعادة
الذكي يفهم دروسه ولا ينظر في زميله
سمعت باذنك وشفت اكبر دلاله=فتح مسامعك لا تاكل قلابه
السيف ماضي مع اصحاب الدباله=الصيد في وقتهم نمل وذبابه

حسن عابد

11-04-2006, 03:41 PM

اطلالة جديدة اتمنى ان تحوز على رضى الجميع يشارك بها كل من الشعراء حسن عابد بن سلمان بن داخل زهور الريف ابو عادل

admin

11-04-2006, 04:33 PM

وقت تاريخ المشاركة حال بينا أن نضع المشاركة الأخيرة في أول الموضوع!
معذرة على ذلك

حسن عابد

11-04-2006, 04:45 PM

قدمت مجهودك وتشكر عليه

@ بن سلمان @

11-04-2006, 11:05 PM

ابا علي
والله يا حرارة في لساني
ما خليت ثلج وانا قاعد اطيي فيه
يعطيكم العافية جميعا ولا تهون غريمتي زهور