تسجيل الدخول

مشاهدة النسخة كاملة : منقاش في المقناص/ الحلقه الاوله


منقاش
12-28-2006, 06:05 PM
هاك اليوم في سنة الدبى (يعني الجراد الصغار) كنت في طرقه ناصي حليف لي (شاعرقليل خاتمه) في جلان ألفير , وانا محدر على حماري ضحى مع وادي آل غابر (يعني آل ساعد) كنت اتسمع على قصيد وملاعب في شريط حاطه في مسجل الحمارالا وهاك الرمه اللي متلثم بطرف عمامته ويتمخطرمقبل عليه يمشي .. تلاقينا وترادينا ألا وهو المنحوس طيب الذكر اللي ما أبغي شوفته لا في جبل ولا وادي الرمه رويعي الغنم , بعد السلام بنفس شينه ما نبديها لبعضنا ولا هي خافيه على أحد منا تنشد كل واحد فينا صاحبه وختمناها بعزيمه,,,, كل واحد فينا طلب صاحبه أذا لقي فضوه يسير على خويه.
بغيت أمشي في طرقتي لكن وقفني رويعي وقال : عود وراك ما انت ماشي يا منقاش ,, أربط زاملتك وتعال نجلس في فية هاك الوغيفه(يعني حماطه وحشيه) أدلك على دروب المرجله والدراهم ,,, وافقت يوم سمعت أن فيها دراهم , وقلت هات ما عندك من علوم يا رويعي.
قال رويعي : يا ولد عمي يا منقاش ان كان تبي المرجله أبني لك محجاه (يعني بناء مموه يندس فيه الصياد) على ميراد الماء في علق وكل ما جاك حمار يبي يشرب من هالحمير المفلته اللي توحشت أعطه داخن يكسره ثم أزرقه واذكيه . بس تكفى أحرص تسمي وتكبر عليه حتى يسير لحمه حلال, واياك تقتل الأناثي تيتم عيالها والا الصغيرين اللي يرضعون والا كبار السن المعجزين ,, ركز على الجحوش المربربه وبعد تذكيه أرسلي رساله باللاسلكي حق حمارك حتى يجيك من عند عملانا جيب فيه رجال ياخذ الصيده ويعطيك ثلاثمية ريال نقتسمها بيني وبينك بالنصيفه ...
قلت : ألأوله علمني يوم أن فيه مصلحه وراك تركتها لمنقاش ؟, رد رويعي : بي غنمي اللي ما أقدر أغض الطرف عنها تاكلها الذياب والا يسرقها ساري الليل والا غيره .. قلت طيب أبسعلك: الحمير بعد أقتلها وين تروح ؟؟ ,, قال تروح للمطاعم وقصور الافراح ... قلت : وتبيني يا رويعي آكل حرام وأكل الناس حرام ؟. وهو من متى لحم الحمير حلال ؟؟,, قال رويعي : يا منقاش الحمير اللي مثل حمارك الاجودي حرام لكن الحمير الوحش حلال ,, وحمارك هذا لو يشرد ويتوحش سنه والا سنتين وياكل من البر يسير لحمه حلال ,, والحمير اللي أبيك تصيدها حمير هامله في حمى ثماله وعورش وعلق ومتوحشه ولا عاد لها سيد ,, وحتى قلبك يريحك هيا معي للفقيه وأسعله قدامك وتسمع الجواب بنفسك ..
قلت : تدري تم , واردفه ورايه على حماري ونمشي رايحين للفقيه في مسجد الجماعه اللي لي أشهر ما دخلته حتى أروح بعيد عن الفتن واللبايش بعد القتال اللي جاء بيني وبين بعض الجماعه في وسط المسجد والمذن يقيم ..
ها ثم انفكيت أنا ورويعي ونحنا راكبين على زاملتي بالحدايا والزهم طول الدرب حتى وصلنا المسجد وصليت أنا واياه لحالنا برى الحيث أنه هو الثاني (رويعي) منقوص من الجماعه ومقاطعهم ,, ويوم جاء الجماعه نادرين بعد الصلاه ومعهم الفقيه خارج ناداه رويعي وقال : تعال يا فقيه نعطيك كلمه ونبغي رد غطاها بكليمه واحده ولا نبغي كثرة علمه ..
أقترب منا الفقيه وقال: أنتم وراكم مفارقين ألجمعه والجماعه ؟؟ . رد رويعي: هذا ما هو شغلك هذا من أشوان شيخ القبيله , ولا هو اللي جيناك من شانه ها الحين , لكن بعد قلتها ترى ما رادنا عن الصلاه معكم الا نبغي نبتعد عن الفتن بين الرفاقه حتى لا تنشقر عصا القبيله , وانت تعرف أن الفتنة أشد من القتل .. والزبده , هذا العلم خلي فتشته بعدين نجيك ونحنا فاضينا ونسمع جابتك وتسمع جابتنا.. بس هالحين جاوبني بحلال والا حرام على سعالي ,, حمير الوحش حلال والا حرام صيدها وأكلها ؟؟. رد الفقيه : حلال , لكن ليش سعلتم عنها ؟؟ قال رويعي : التبحث يا فقيهنا ما فيه خير, وانت وفيت وكفيت وبيض الله وجهك وخلفنا عليك طيب الحيث أن نحنا ناس عجالى وورانا أشطان ...
قفينا عن الفقيه وخليناه ورانا واقف ما كمل علومه, وعودنا دربنا وخطرنا مرتاحه, وقال لي رويعي ونحنا في الدرب : هيه تطمنت يا منقاش والا لا؟؟ واياك تجيب السالفه لأحد يسبقنا على المصلحه ونضيع مرجلتنا ,, قلت : لا بالله تطمن مرتين وانا تعرفني صندوق مقفل ما يخرج منه شي .. بس ما يعقل تاخذ نصيفه وانت جالس حاط رجل على رجل ؟. حاول يقنعني وقال كاني ماني واتعابي ومن قال أني جالس ؟,, وبعد لقيني جامد على كلامي ما أتحلحل عود في النهايه وافق على ثلث له وثلثين لي ؟.
قلت هالحين تم يا رويعي ميتين ريال لي وميه لك , ثم تعاهدنا على الصدق وترك الغداره والخيانه وان الرفيق ما يختل رفيقه , والحقيقه أني كنت ناوي أمترغ برويعي واكفر عن يميني بعد شهر والا شهرين بعد أشوف النور وأتعرف على الزباين , ثم تواعدنا بعد أسبوع حتى نبتدي مرجلتنا ويبتدي منقاش في المقناص.
وهذا اللي تبي تعرفونه هو والزهداء اللي طاح فيها رفيقكم منقاش من قلال الخاتمه , تنظروا لباقي العلوم والغموم في الحلقه الثانيه ...

منقاش
12-28-2006, 06:14 PM
هذي واحده من القصص اللي سبق أني علمتكم بها واللي بسببها هي وغيرها ما عاد أصلي مع الرفاقه.


الليله مانا شكره يالرفاقه , وعلابيه وعكاكيني توجعني وكراعيني ما تقلني ,, آه آه واراسك يا منقاش
ما هي ألا سلامتكم : اليوم عصر مريت من عند المسجد وقلت في نفسي ليه ما تصلي مع جماعتك يا منقاش لو يوم في الاسبوع , قرشت حماري في واحد من مواقف الحمير جنب المسجد وربطته بخطامه ودخلت المسجد وصليت قبل أذان العصر ثلاث ركعات سنه , وبعد قليل ألا وداخل علينا المسجد واحد قليل خاتمه من الجماعه من كرهتي فيه سرت ما أصلي الجمعه في مسجد الجماعه حتى لا أشوف وجهه والا مقفاه .
وليته دخل وتنحى عني بعيد في المسجد لكن الماخوذ وهو ما يدري جاء على يساري وجنبي في الصف وكبر وسمعته يقرا التحيات وهو واقف وانا سرحت عنه بعدها في الهواجيس واتذكر أيام شبابي وعلوما راحت.
على غفله مني الا والرجال ملتفت عليه وهو جالس وأسمعه يقول السلام عليكم , أحسب الماخوذ يرد عليه السلام واثره يسلم تسليم الصلاه , هو قالها وانا أرد عليه : ألله لا يسلمك يا سويد الوجه وياقليل المذهب والخاتمه , ثم تناوشنا بعضنا بالقتال ونطيح على الفراش ونحوسه حتى ما عاد تعرف أوله من آخره ونكسر على بعضنا عصا الفقيه اللي يخطب فيها .
فرع المصلين بيننا وفرقونا ويوم أقاموا الصلاه وانا أزيد ازرق خويي وابتركه واخنقه حتى قرب يطفي لو ما قوموني عنه الجماعه الحاضرين , هاثم طردوني برا المسجد قبل أصلي واعود أسحب نفسي حتى ضويت بيتي .
عاد أنا بكره ناوي أدعي على كل اللي في المسجد حتى لا يشهدون عليه واقول أنهم كنفوني ولعطوني ومرمروني ورموني برى المسجد ولا خلوني أصلي , والشيخ لي عليه يد في شهاده معه وظني أنه رايح يساعدني ويحكم لي عليهم .
وش رايكم يالرفاقه وسلامتكم ….

حسن عابد
12-28-2006, 06:45 PM
دايما مظلوم يامنقاش لكن ابو نايف دافع عنك في موضوع المدرسين ومعك البرشلوني

أبو عبدالرحمن
12-28-2006, 08:01 PM
منقاش
ما أدري واش قصتك مع رفاقتك..
كل واحد فيهم قليلي خاتمة.
أنا عرفت رفيقك صاحب الكاعدة
لكن حليفك اللي في جلان الفير. ودي توضح أكثر

ونحن بانتظار بقية المقناص..

رسالة للمشرف الفني ( أخاف عليك من منقاش)

@ بن سلمان @
12-28-2006, 10:28 PM
أن نحنا ناس عجالى وورانا أشطان ...
الاوله ودي اعرف وش معنى الكلمة اللي فوق
والثانية الله يهون عليه الفقيه اكيد انه هون عليك
يعني تقدر اذا اشتهيت اللحم عندك صيدك , وانا اطرالي بن عزاب انك حلفت عليه البارح للعشاء على ارقط بس يوم تم وانت تتململ وتقله قوم سنع عشاك الا ليه ما سنعته انته كان ما قعدت سيرة بين الناس .

@ بن سلمان @
12-28-2006, 11:17 PM
سبحان الله اللي الناس ما يخلون النقد معك
اول بادي هذه قليل الخاتمة ما شاف يصلي العصر الا ساعة انت تجي المسجد , وثاني بادي بكرة لا تصلي معهم الجمعة , وان طعتني لا تصليها ابد , ويوم يجون يتعلمون عنك ليش ما صليت تتظاهر انك رايح فيها من لعطة امس , ولا تجاوبهم الا ونين , وانا برسلك رجال من طرفي يجيك عصير الجمعة يعلمك وش تسوي يوم السبت , واياني واياك العلم هذه اللي بيني وبينك يبدي , انا اعرف ان جماعتك فيهم حسد وهم حاسدينك على فقهك يوم تصلي قبل العصربثلاث ركعات , وحرموك اجر الجماعة والتسنن بعد العصر , هذولا الجهلة .

المشتاق
12-28-2006, 11:22 PM
يا منقاش ياللي زمانك ما ينعاش
ما والله اخبرك برثون ولا خبرتك الا رجال ما تخلي لك حق
كني اقرا في علومك خوف وجبن بمربى , فز يامال العافيه وصبح الامارة بعد العيد واحمد الله الحين في يدك معتدي اللي هو وفي يدك شاهد اللي هو بن سلمان


وبعدين كان دي سألت الفقيه بالمرة
هل الحميرهذه تجزي اضحية والا لا

المبرِّد
12-29-2006, 12:37 AM
عم منقاش . علومك هذه بدأت تظهر لنا بعض أعداءنا
جدي راح له حمارين
وراح اكلمه بهذا المقناص واعطه العلوم كلها فصها ونصها
ويجيك العلم يامال العافية
واما رويعي الغنم آه منه . ما زال في غيه واستبداده وتغريره
انا بصلي العيد في الديرة واعلم الفقيه بحيلة هذا الرويعي الذي يستغل الفتوى على هواه

بن داخل
12-29-2006, 12:42 AM
يامنقاش
لو مانت راعي نقص مع رفاقتك
ماواحد يرد عليك السلام وترد علية بهروج السفلة
وأنا غسلت ايدي منك من ليتلول يوم بن عزاب عند بابك
ضيف والضيف ضيف الله وتبدي له واجبته في عرض المراح وتقول سنع عشاك
ماتجيبها له تبيه يقعد يطرد فحلالكم فالجنبان قدام الرايح والجاي
ومن شورتي عليك انك تسوي لك حضيرة لذبايح رفاقتك السواعده
وكل ماجاك واحد تمده السكين وتقل له سنع عشاك وعندها نقول لك ابيض وجه
واما على قولك قليل الخاتمة حق جلال الفير مااضنه يبي يستقبلك وانت قاطع مذهب
تراه رجال على قيس معرفتي به انه راعي خاتمة ولا يكره أحد كما قاطع المذهب
وكل ماهرجت معه في علوم الرياجيل يقول لي المذهب صابون القلوب
تدمدم وخلك عند صيدك وذكرتني بقول واحد من الشعراء
يقول
قد رمى المهدي ضبيا شك بالسهم فواده 55555 وعلي ابن سليمان اذرمى كلبا فصاده
فهنيئا لهما كل امرئ يأكل زاده
والظاهر ان علي بن سليمان هوه منقاش

>>>>المشيلحي<<<<
12-29-2006, 12:54 AM
الله يعينك واسمع نصايح رفاقتك وانشاالله ماعاد تنلعط

منقاش
12-29-2006, 01:12 AM
وجيه الرفاقه الكمال , حسن عابد , ابوعبدالرحمن , بن سلمان , مشتاق :
بيض الله وجيهكم اللي بديتم عليه وهرجتوني.
يا حسن يبن عابد : ما فهمت الماضوع اللي تعنيه وليتك تبينه .
أبو عبدالرحمن : فيه ثملان اذا قابلته وطلبته حق والا فزعه تلقى علوم تشفيك وتلقى الحق والفزعه والضيفه , مثل هالثملان اللي مثل منقاش هم أهل الخاتمه ... وفيه ثملان قلال خاتمه مثل رويعي وعريبات مثله خذ منهم مقلطه وعلوم رجال لكن أذا نصيتهم يعقدون لك الحبال ويلونها ويقطعون بعضها ولا تلقى منهم الا زيادة مشاكل وقل خاتمه .
أما حليفي اللي في جلان الفير فهو شاعر طويل مدور مشاكل ومتشاكل ومعه سكين في باب السياره .
أبن سلمان : أشطان معناها مشاغل دنيا مشغلتنا عن العباده والاخره .. والفقيه يحسب رويعي يسعله عن حمر الوحش المخططه ما دري عن قلة خاتمة رويعي .. ولحم الحمير كلنا أكلناه في الكبسات والمفروم ونحنا ما ندري والنتيجه أن أكثرنا تحمير ..
موضوع ابن عزاب : الرجال وجبنا له , وسلوم العرب أن الضيف يسنع عشاه ,, وواجبه باقي حي متى ما خطر عليه مره ثانيه ما دونه الا يستعير سكين رحيمه ويتعشى هو وياه وابو عادل وحسن عابد وابو أشرف عشاهم ..
مشتاق: وراك يا ولد عمي قامت تقل خاتمتك ومنحرف عليه وانت صاحبي ,, والعلوم اللي تبي تسليك مقبله لا تعجل يا رفيقي ... وبن سلمان أنطس من رويعي وخليه هو وشهادته ويا نحله لا تقرصيني ولا أبغي لك عسل ..

منقاش
12-29-2006, 07:58 AM
الرفاقه الكمال , المبرد , بن داخل , المشيلحي : مشكورين12 مره يوم طليتم علينا.
المبرد : يا رفيقي تعذبل من الشيطان وكبك من الدعوجه والتذكر والتفكر حتى حمير جدك تبي تدعي بها على منقاش ؟.
اما رويعي فهو قليل مذهب وحرامي مصبح ولا ينفرش له الفراش أسعلني عنه وعليك به وانا عوينك عليه .
أبن داخل : خير ؟ على راسك ريشه ؟ في بطنك شي يمغصك ؟ وراك تحمصك ؟. صحيح أن اللي في بطنه ريح ما يستريح .
واما رحيمك أبن عزاب فنا ما غلطت عليه , واجبه حي ينتظره لكن ما يسنعه الا هو كما سلوم القبايل ولك مثله أنت وبن سلمان والمبرد وابو هاشم وحسن عابد وراعي القصيده اللي في الشريط , لكن بشرط اني أفرش لكم برى والسبب أن في بطونكم ريح ما يخليكم تستريحون واخشى تذوون بالمكان وتخيسون بالهوى وتكتمونا بالغازات السامه ..

بن داخل
12-29-2006, 10:54 PM
منقاش الله لايحرمك حلالك
أنت الظاهر ماخذها عشاقة
أنا وبن سلمان مانضوي على الطفارا
وان كان قدرت تضوي بن عزاب تراه مسكين
كرشه وردته المهالك
قول له تعال للعشاء ولا يصدق
وبعدين انت منو ين لك بيت وانته مشله
تلحدد في صنادق الغنم وجنب المقشات
تدور الهروس اللي ترقع بها همالينك

abonayf
12-30-2006, 01:27 AM
الله يعينك يامنقاش حساد كثر لكن صبحهم ولا مسيهم بدوريه تقشهم كلهم وابشر بالفزعه انت صاحب والصاحب يقولون له على صاحبه ثلاث :
واحده منها الشهاده

منقاش
12-31-2006, 07:07 PM
الرفاقه الكمال , ابن داخل , ابو نايف : مبداكم عليه مقدره ومثمنه ومشكورين اللي ما تخيصرتم برفيقكم منقاش .
ابن داخل : من قال لك اني ما أقدر اكرمك أنت وابن سلمان ,, الحمدلله حلتي عامره واعز ما عندي حماري لو حدت عشيتكم أياه وانتم تستاهلون حمارين لكل واحد حمار واجبه ومقداره .
أما رحيمك ابن عزاب فواجبه فات وانتم شفتوه ويستاهل بدال واحد أثنين .
أبو نايف : بيض الله وجهك وانت عزوتي وحليفي وما عليك منهم العبره على من تدور الدواير آخر النهار ...

مشاكس
01-02-2007, 01:11 PM
جيتك يامنقاش
أنت حاتم الطائي
منقاش ابو الكرم
تذبح حمارك
وتقعد على مفارق الطرق تحرى من يتجمل عليك
أقول لاجوك قمقم لهم وكل واحد يروح يدور له شغل
أنت فاك بابك لمن هب ودب
واتلله لوني محلك مايعتب الباب لابن سلمان ولا بن داخل والا بن عزاب
تراه أجودي يدرمح فراسه مايدري وش السالفة يعلموني بعض الرفاقة
ويقلون هو طفيلي ثمالة

بن داخل
01-02-2007, 03:22 PM
ياعم منقاش
احفظ عليك مالك
أنت راعي وزعة مع بن عزاب
ولا ذميناك
ومن يوم شاهدك مدحدر( مافيه فرامل )
عرفنا البير وغطاه ( عفنا العبد وعفنا سلامه )
بس احنا نعرف اهل الحلال اللي فيها كثيرات الشحم ولا ناقع مواقيع الرخوم
لابغينا نضيف رحنا لرويعي الغنم والا ابن أبي محمد والا شيخهم كافة المستعين بالله
رجال تشرف حلالهم والا ضيفتك تراها على قيس ضيوفك بن عزاب ومن على شاكلته

منقاش
01-29-2007, 11:11 PM
يارفاقتي , أنته ياللي ما فيك فرامل وانته يا ابن داخل : ترون أن ما مسكتوا الهاده وتعذبلتم من الشيطان لخلي رفيقنا أبو نشقه ينشقكم حاجه ما عاد تشوفون العافيه بعدها .