بداح في باريس

[مخاوي منقاش]

بداج السرنديبي /باريس
في اتصال مفاجيء من منقاش واغرائه لي بالتذاكر والسكن وجزء من المصاريف لتغطية رحلة الشيخ المخاوي السرية لباريس الا ان العلاقة التي تربطني بالمخاوي جعلني اول ما شفته اخمه واقبل جبيه الزاهر واعترف له بفعلة منقاش المشينة ولكنه قال على رسلك ايها السرنديبي لا تقلق واكتب ماشئت ولكن هناك خطوط (حمراء ) لا تتجاوزها فقلت الا الحمراء
لم يكن في اليوم الاول مايذكر وخاصة انه يوم الوصول حيث خلدت للنوم بعد رحلة شاقة انتقلت من خطوط الى خطوط وسف اوافيكم بالتقرير تباعا

[مخاوي منقاش]

بداح /باريز
صباح جميل فقد قمت الساعة الثامنه وعندما دخلت بهو الفندق وكان الظلام لازال مخيما لم اجد الا المخاوي امامه كاس قهوه قلت قايم بدري ؟ قال ايه قمت صليت وطلعت اتمشي وقلت لهالسنافية تزهب القهوه ونجلس لين تدب الحياة بعروق باريس
سألته هالفندق صغير واخبرك تحب الجخ عسى ماقاصر عليك شيء؟
قال لا والحمدلله بس هالفندق اغلية (احبه) وزي مانت شايف جميل جدا وبالشانزليزيه ومحطة المترو 300 متر وبعدين تدري اني سكنت به شهر العسل وسعره مناسب وهادي ومن سالني من الاصدقاء انصحه بهالفندق وصدقني اني سكنت بجورج سانك قبل ما يملكه الوليد ويحول اسمه الى الفصول الاربعه وسكنت في الانتر وما حلفتن ان هذا احسن واريح نفسيا
قاطعته ليه ؟ قال ياخوي لادخلت الفنادق الضخمه تحس ان الناس يضحكون على انفسهم وعلى بعض ويجلسون باللبي وخذ ياحركات استعراضية وصدقني ياغرفة هالفندق فيها من الفخامة والشياكة الشيء الكثير وشفني هالحين متلفلف بالفروة وطالع سكان الفندق كل بحالة وهذا المطلوب
قام الشيخ ليلبس ملابس الخروج فقلت له البس ثقيل تراها بريد قال يازينهم وزين بردهم البرد الشين خابرة بديارنا( قبله ) (تفسيرها على طول)بالعظم قلت ليش ؟ قال انثيرلاتزعل علينا المطاوعة
عندما اردنا الخروج من الفندق قلت ياشيخ اقعد لين اجيب تكسي قال امش وراي وينزلنا مع هكا الادراج وقف قدام المكينه وقطع تذكرتين وركبنا المترو
قال لاتسأل انا اذا سافرت الى أي بلد اعيش عيشة هله وهذه اول خطوات السياحة الممتعة قلت بس زحمة قال بخبث ادفاء
عندما اغلقت الابواب وانطلق القطار اختل توازن الشيخ وسقط ولولا لطف الله ثم الزحمة كان راح وطيء
قلت ياشيخ شلون تعرف وجهتك قال سهله جدا بكل مكان خرايط خذ الخريطة ودور على اقرب محطة للمكان اللي رايح له
طيب هالقطار رايح للمحطة الي نبيه ؟ قال لا بس بعد 5 محطات ننزل وناخذ خط ثاني ولا نحتاج نطلع فوق ولا نقص تذكرة وفيه ممرات تودينا للخط اللي نبي
قلت وشلون تعرف الخطوط ؟قال من سال ماتاه والبدوي يمشي وينشد والفرنسين يحبون يساعدون وترى الشغله سهلة بس يبيله تجزم وياسرع ماتتعلم
شف يابداح انا ادري ان التاكسي اريح بس والله اني احب المترو اولا لسرعته ورخصه واحتكاكك بالناس وفوائده كثيره
قلت واذا طحت تطيح على لحم قال انطم
سالت المخاوي عندكم مترو بالسعودية قال قطار المشاعر والتذكرة بميتين وخمسين ولا زم تحج على شان تركبه

[أبو عبدالرحمن]

اضحكن الله سنك
اشوف لك رحلتين لباريز صيفية وشتوية
وياليت تحلقن وتصور القطار من الداخل والخارج وتشوف الفرق بين قطارنا

[مخاوي منقاش]

ابو عبدالرحمن / انت انسان عزيز علي واقدرك ولو تقول انقز من فوق برج ايفل ماعندي مانع بس تتلقفني الايدي الناعمة ولكن اخي طلبك بنشر الصور لا انت علرف ان لاطاعة لمخلوق بمعصية الخالق والصور الي صورتها حرام انشرها في هذا المنتدى ولو شفت تراني اخاف الله

[واحد من القبيله]

مرحبن بوه من باريز يكتب ويقهرن الشيخ عاد وش لون لو سكن بفندق سبع نجوم ودي لو تصور القطار يقولون قطار باريز براسين اي به سواقين ماهو بواحد واحدن ياخذه قدام والثاني يرده ورى ماهو مثل قطارنا يديور ويرجع ولا بد من بعض الصور البعيده عن الزحمه فلا تبخلن علينا

[الحاج سلام]

تقبل الله يالمخاوي ، ولا تنسانا من الهدايا ، يمدحون العطور في باريس قالاريا ما هي بعيدة عن فندقكم .






وانت يا بداح اترك عنك متابعة المخاوي وترى منتحف اللوفر قريب من الفندق ويحتاج الى تلاثة ايام حتى تمر على درر االآثار فيه ولا تنسى تسلم لنا على الموناليزا .http://upload.wikimedia.org/wikipedia/commons/thumb/e/ec/Mona_Lisa%2C_by_Leonardo_da_Vinci%2C_from_C2RMF_re touched.jpg/80px-Mona_Lisa%2C_by_Leonardo_da_Vinci%2C_from_C2RMF_re touched.jpg

[مخاوي منقاش]

واحد مادري من وين / حياك الله وباريس مدينه جميلة وانا الحقيقة ماقدرت اتشعبط فوق القطار علشان يطلع المشوار بلاش وانا زيك اسمع ان في باريس شيء له راسين وتوقعت ان قصدهم ابو سنامين
المهم ان الصور اللي اصورها غير قابله للنشر فهمت والا انشد ابو عبدالرحمن
الحاج سلمه الوالي /العطور الباريسية حرام لان نسبة الكحول عالية ولا ودي الطخ شمغكم بحرام خلوكم من دهن العود والليمون 2011
بداح يسلم عليك ويقول ما افرط بالامانة وغدينن لا نهج الشيخ امر عليهم لاني قلت للشيخ قوه للوفر قال شفته مرتين يالله لوهو الكعبه
اشكركما على المداخله

[سهيل2012]

قالوا في الأمثال :

إذا رحت باريس ..تعوذ من بليس ..

الجماعة اللي طلبوا منك الصور ..ترى موحُب في الصور ..

يبون يتأكدون إنك في باريس ..!

أما أخونا الحاج سلام ..فاظن له هدف من طلب العطور ..ويرمي إلى شيء بعييييييييييد !

يقول الشاعر :

حــنا الخليجييــن ما أحـد(ن)كمانا ***** كاس البــــــطوله نأخــذه دائـــم الـــدوم

لا جا الطرب ما احد(ن)يغني غنانا ***** ونفـوز بالكشـــــخه وبالأكــل والنـــــــــوم

ونقلد اللي يعملونـــــــه عـــــــدانا ***** نبي نتطور عــــــن تقاليــــــــــــد وسـلوم

وتجارنا اللــــي طوروا مستوانـــــا *****كم سلعة(ن)في ســوقها زادوا السـوم

اللي شرى سكراب موتر ديــــانــا ***** واللي شرى منديل خشم أم كلثوووووووم

مال(ن)يســد ضعوفنا وفقرانــــــــا ***** ساقوه في خرقه وفي دووووووووج مصدووم


هاه ..عرفت طلب الحبيب (الحاج) ..

والطلب ما هو للحاج سلام ..الطلب : لواحد ثاااااني ..وأظنك عرفته ..!

[مخاوي منقاش]

كنت ياسهيل قبل عدة سنين في باريس وكلمت اهلى بالرياض وسألت بنتي وش تبين قالت كاكاو وانا في المطار ومستعجل لاننا تأخرنا بالطريق مريت بياع الحلويات وقشيت كم علبة كاكاو ويوم وصلت البيت اعطيتها الكاكاو وقلت قسمي على الاولاد ويوم اخذنا ساعة الا زادت حركة الاطفال وبداء الخناق والمظارب وجت بنتي شجاعة مادري منبن نزلت عليها وهي كانت تخاف من ظلها وكتشفنا ان نوع من الحلاو فيه ويسكي مركز فقلت اسقوهم ليمون يهدون وانا هالحين كل مادخلت محل حلويات في باريس شفت القويريرات
هاه ياحاج؟ ترى سهيل يحب الشر

[مخاوي منقاش]

عدنا الى الفندق بعدما اختفى الشيخ عني بطريقة احترافية تنم عن ذكاء بعكس منقاش الذي والله اعلم ان ذكاه اقل من المتوسط والدليل محاولاته الافلات مني وكسر الرقابه ولكنه يتصرف بغباءء ملحوظ يجبرك على الاستلقاء على جنبك من الضحك
بعد تناول الغداء قال ابي اخذ غفوه قلت مايمديك باقي ساعتين وتغيب الشمس قال يالله خلن اصلح قهوه واجهز التمر وخذ البساط 0
جلسنا في زاويه مقابل مقهى الفوكيت وهو اشهر مقهى على مستوى العالم وقال الشيخ يابداح انت تدري ان فنجال القهوه ما يقل سعرة بالفوكيت عن 200 ريال وانت تدرى ان الحجز بالمقهى لا هضلت(اقبلت) العربان بالصيف لا يقل عن 5 ساعات انتظار وتدري ان فيه من العربان من يحجز الطاوله طول اليوم سواء جاء ولا ماجاء
وتدري انه اللي حجز الطاوله لو قابلته وحدة من البوسنيات الفقيرات امهات الخلاقين اللي بهالشوارع يشحذن قال يعطينن ويعطيك الله وتدري وتدري000 والا اقول عمرك مادريت صب قهوه وقرب القدوع لا ابو بوذا اللي تعرف
قلت ياشيخ لا تزعل ويرفع ضغطك بقريح(بالشيطان) قروشهم وهم ابخص به
قال اللي قاهرن يابداح لو ان قروشهم خذوها بعرق جبينهم كان ماشي بس القهر وام القهر وعائلة القهر انه 00
اقول الا انت وش جابك الله لايبارك بمنقاش0
رفع المخاوي صوته وقام يهيجن
يالي خذيت من الملاين كمشة
وضيعتها بين القهاوي بباريس
نقزت من مكاني وحبيت راسه وقلت تكفى ياشيخ العن ابليس ترى الناس بهاه احرار مافيه رقابه الكل يمشون على القانون وهالحين التفت يمين ياشيخ
قال اعوذ بالله من الشيطان الرجيم قدام الله وخلقه لعنبوهم ماعندهم هيئة ؟ قلت لا مادام ما اعتدو على احد القانون معهم
يوم شعرت ان منقاش تعكر مزاجه قلت ياشيخ انبسط جو رائع وعالم تفتح النفس هه شف
ومرت شابه وقفت تأشر على التمر والدله وبساط الصوف يوم راعالها الشيخ قالت بنجور صب لها فنجال ومد صحن التمر
خذت تمرة وشربت الفنجال وقالت مغسي ومشت ولكني لاحظت ان الشيخ دخل في نوبه هوجاس وقال
يبداح دور وانا اخوك ربابه قلت منين القالك بباريس ثم مسك السبحة وقال:
قالت لنا بنجور جاوبت بنجور
وتفضلي يابنت الاجواد فنجال
في وقفتك مع مدة الكف مسرور
يفداك من لبس البناجر والازوال

ذكرت ابن حثلين في قول مشهور
ليتي ولد عمك وليتي ولد خال
الى ان قال




يبداح ماجور على الشيخ ماجور
النار في صدري وقلبي بولوال

طالت الهواجيس وبداء يهيجن بهالابيات قلت ياشيخ هالحين غابت الشمس وش رايك تروح تتعشى وتنام ؟
قال يالله ذبحنا البرد وحنا مادرينا وباكر جمعة ورانا صلاه

[الحاج سلام]

بنجور بنجور وعساك يابداح ماجور .

ولا يهون المخاوي واحسن ما سويتم انكم اخذتم قهوتكم وقدوعكم معكم لان الاسعار في باريس نار .

لكن ما قلت لي يالمخاوي ويش موديك باريس في مطلع الشتاء . ويابعد حيي وش لكم في الشانزليزية ومقاهي الفوكيت والمدريقال .

اتركوا عنكم اللقافة وعجلوا في العودة للديرة ترى الصمان سايلة سيل طيب ،،،

[مخاوي منقاش]

نصيحة يالحاج طيبة من رجل حاسد المخاوي على الوناسة واما نشدتك عن روحتي لباريس بهالوقت فلا اخفيك سرا انني اكره العرب وخاصة الخليجين اذا طلعو اوربا وفعلا يرفعون ضغطي لذا هالوقت اقل كميه منهم في اوربا والا بعد اسبوعين ينهلون علشان الكرسمس
بداح سألني قال ماتضن ان منقاش يوم ارسلني لك ناوي يخت وحنا مادرينا ؟
العلم عتد ابو عبدالرحمن امين سره
ابو سيفين انا طالبك طلبة ترجع تناقر زي العادة اذا غبت وابن سلمان حبيبنا الاولي وابو تركي وابو عادل والشيهان والمقداد ورفيق وغيرهم فضت الاستراحة واستاجرنا استراحة غيرها

[واثق الخطوة،،،]

بنصوااار شيخ مخاوي بنصوااار
كنت اسأل نفسي وين غايب الشيخ المرابي سابقاً...
لابد انه لاهي بالوظيفة الجديدة من حافز وقاعد يكفر عن كتبته يداه
واثاريك منتدب لباريز تغسل وتدفن موتى الديوك الفرنسية

رحلة سعيدة ولا تتهرب وتنسانا من الهدايا خصوصاً العطور البارزيه

[كشكول]

بنجور

مدري وش معناها بس اشوفكم كثرتم منها قلت اسوي زيكم

سلم لنا على الشيخ وصيه يكثر من العطور الفرنسيه عشان الماولين لايبطلون

[منقاش]

أسمع يا مخاوي يا زفت , خويت في فم كلب فرنسي ولا بعثت ألا من بطنه يا بعيد الذكر..
أسمع لا سمعت .
أياك ثاني مره ترفع السماعه عليه , وان عدتها جيتك الى على حدك في شارع الشانزليزيه وكسرت تلفونك على راسك وكنفيوترك على ركبك (ركبتك بقعاء الفرنسيه) , وخليت الفرنسيات الشقر يضحكون عليك , وعرفتك بحجمك الحقيقي يالرويبضه , وعلمتك كيف تحترم أسيادك المناقشه , هذي ألأوله ...

والثانيه , أشوفك أبتديت تمد رجليك وتمغط في فراشك ولحافك وتطلق على نفسك ألقاب ما أنت أهل لها , وتناسيت أن ما فيه شيخ بهالدنيا غير أبو نقشه على مستوى المنتدى وعلى مستوى جزيرة العرب كلها من البحر الى البحر , وكفايه بعد اليوم مهزلة مشيخه ومتمشيخين ....

والثالثه , أعتبر هذي آخر مداخله أنزل فيها من مستوايه وأرد عليك , أعتبرها ألأخيره من غير شر أن شاء الله لأن حليفي الرويعي جاه نقص من ثماله , وفي حشمته قررنا مقاطعة المنتدى واللي فيه , وكما قال أهل الحكمه , في حشمة عين تكرم مدينه , وأن كان ابو نقشه مدينة العلم فالرويعي بابها , وتنظر وتوحى بعد كم من شهر يوم تشوف المنتدى مليان بالفيروسات اللي تخليهم يغلقونه والا ما أكون ابو نقشه ..
وختامها , اقطع واخس وكل تبن مع قدوعك أنت وابن عمك بداح , وسلامتي أنا لوحدي ...

[سهيل2012]

قالت لنا بنجور جاوبت بنجور
وتفضلي يابنت الاجواد فنجال
في وقفتك مع مدة الكف مسرور
يفداك من لبس البناجر والازوال

ذكرت ابن حثلين في قول مشهور
ليتي ولد عمك وليتي ولد خال

وهذا ما جاد به أحد شياطين شِعري :

القمري اللي غرهد وجاك.. مغرور
يحق له ينفش من الريش مختــال

ما تشرب ألا التوت لا كان معصور
صدر(ن)وسيع مريح الفكر والبال

ما أظنها بنت أجودي يحكم الشور
بنت الهوى ما ظن تسوى لها ريال

ذكرت ابن حثلين بالقول مشكور
ما أدري وش أهدافك من القيل والقال

سلم على بداح مع طلعة النور
قبل المكاسب يرجع بروس الأموال

[مخاوي منقاش]

اسمع ياسهيل البنت اللي وقفت ماهي اللي على بالك والمثل يقول ماكل بيضاء شحمة والغرب ثقافتهم تختلف عن ثقافة الشرق صدقني قلوبهم مثل الشاش ولا ادخل فيهم صناع السياسة اتكلم على الفرنسي البسيط
وانا اعتقد انك تقولها بمزح ولكن هناك اناس اخذين فكرة ان مافيه اخلاق الا لدينا 000هداك الله صرت مثل بداح ترفع الضغط
اما الرد فهو رائع من شاعر جميل يرد على ملقوف يتبقم بالشعر لكن انخي الشيهان يفزع راعي الفزعات
منقاش /اجيبك من تحت طقاطيق الارض واللي رد علي قال ترى منقاش اعلن انهزامه فقلت لن اهزمه بالنقاط بل بالضربة القاضية مع كسر الخشم وهشم الاسنان وتورم دائم في الحجاج الايمن

الحلفاء كشكول وواثق/ كثرت علينا طلبات العطر لكن البارح اشتريت عطور لي واعطونن هدايا قوريرات صغيرة قلت للبياعة كثري تري الجماعة فاتحين بطونهم اللي يبي كاكاو والي عطور وابو سيفين مرسل رساله يبي حراثه للمزرعة وابو عبدالرحمن يبي بيجو يقول لاهسين عليه ياهل الطائف
واقول للجميع ابشروا اذا وافق بداح

[السيد الحسيني]

الشيخ المخاوي
ايها الباريسي تحية لك من ارض الحجاز
كلما قرأت لك كلما ايقنت انك تكتب باسلوب ساخر قوي ولا احسدك ولكني اهمس في اذنك الا تستبدلي بهاذا البوذي لاكون مراسلك ومراسل منقاش ؟
نحن مستمتعين اكمل بارك الله فيك

[العاقل]

بسم الله
ولا عدوان الا على الظالمين
اما بعد
فقد تابعت منذ مدة توسلات المخاوي للاستاذ الكبير في عقلة الشيخ ابو سيفين بارك الله فيه ودائما يردد انه التزم بنصيحة قلتها له في زمن الفتنة التي وقعت بين الشيخ منقاش ومخاويه وبقدر شكري له بعضه بالنواجد على هذه النصيحة فانني اطلب منه ان يعود لاارضاء الاطراف فتواجده مطلوب وان احد اخطاء علية الحكم عندي وانا سيد العقلاء
قل تم يابو سيفين

[مخاوي منقاش]

صحيت يوم الجمعة متأخر قلت هالحين الشيخ ينتظرني ولكني لم اجده بالفندق وجلست انتظره لين جت الساعه 11 عندما رجع وزقرني وينك يالبوذي قلت راحت علي نومه الا انت وين رحت قال بالمترو اقولك وهالحين ابي اتوضاء وانزل 0
نزل وبيده الخريطة قلت هالحين لازم تصلي انا سمعت منقاش يقول اذا الرجال مسافر او مجنون مافيه واجب الصلاة قال الشيخ هذا منقاش اذا سافر يخلي عقله ببيت الشعر الي في بيته
سال الفرنسية عن الموقع وركبنا المترو وقلت له وين رحت قال انا لفت نظري هالسنه ان الشوارع مليانه سياكل كلها شكل واحد ومرصوصة رص ممتاز ومقفله وسالت سائق التكسي الاسباني(له 30 سنه في فرنسا) اللي ركبت معه قال الحكومة الفرنسيه امنت السياكل واي واحد من الناس يقدر يحط 50 سنت وينفتح القفل ويستخدم السيكل والمكان اللي ياصل له يوقفه ويقفله والحكومه تفكر السنه الجايه يحطون دبابات للتخلص من الزحمات والتلوث وزيادة اللياقة
ثم التفت علي وقال ياكثر الاشياء الزينه عندهم
نزلنا من المترو واتجهنا الى مسجد باريس الكبير وهو مسجد كبير 0
عندما ركبنا المترو عائدين الى الفندق قلت من بنى المسجد الملك فهد ؟ قال لا هالمسجد تم انشائة عام 1926، من ميزانية الدولة الفرنسية وافتتح المسجد الرئيس الفرنسي أنذاك "دومارغ" .ويعتبر مسجد باريس أول معلم إسلامي تكفلت الدولة الفرنسية ببنائه، إذ بدأت الأشغال به سنة 1922 مباشرة ‏بعد حرب «فيروان» سنة 1916 والتي توفي فيها حوالي 28 ألف مسلم دفاعا عن فرنسا. وجاء بناء المسجد ‏الذي يقع بالمقاطعة الخامسة من باريس، كامتنان وعرفان من الدولة الفرنسية للضحايا المسلمين، الذين حاربوا ‏إلى جانب فرنسا.‏

والحقيقة ان المسجد يعتبر نقطة ارتكاز مهمة لهوية أكثر من عشرة ملايين مسلم ممن يشكلون العدد التقريبي لمسلمي فرنسا، حيث يمثل الإسلام ثاني أكبر ديانة سماوية فيها.كما أن المسجد يمثل أول صرح إسلامي يتم تشييده بناء على قرار من حكومة أوروبية علمانية بعد الحرب
وقد اعلن الامام قبل شوي البدء بمشروع تغطية الساحة الوسطى وافتتاح مطعم خيري طيلة فترة الشتاء
قلت ياشيخ طلبتك قال عطيتك قلت ابي اتقهوا بالفويكيت علشان اصور واوريها البنيخي بسريلانكا قال مانت بصيط بالبوذي تبي تجخ ؟ 0
دخلنا القهوة وقال نبي نصير على الطرف علشان نتفرج على الرايح والجاي واغدي احد يشوفني من المعارف ويحكي وترنا نبي نحلل القريشات نبي نطول 0
قلت ياشيخ انت لاحظت ان الفرنسيين نحاف ماقد شفنا سمين لا حريم ولا رجال ؟ قال الله والعالم ان الدود لا عبن بهم وهم ماهم دارين وصدقني يابدوح اذا شفت السمين لو تقصقص اصله لقيته عربي
طال المقام ووضع الشيخ راسه على الطاوله ونام فقلت خله (يدفق النعاس) وهو اصطلاح يطلقه الشيخ على القيلوله
وفجأة نهض وهو يتعوذ قلت خير قال حلمت قلت وشو فيه قال بعدين اقول لك يالله قم

[مخاوي منقاش]

جلس على الكرسي في بهو الفندق حيث جدع بروحه مع كلمه اه قلت سلامتك ياشيخ قال انا مستعد امشي 10 كيلو ولا اتسوق ساعة وبعدين يابداح ولا يهونون حقين الاستقبال لي اربع ساعات وانا اركض من دكان الى دكان ومن الشانز لسانجرمان نادر مالقيت صناعة صينية مثل اللي عندنا والصيني الموجود صناعة بمواصفات اوربية وما تحسبني ما سألت ؟سألت وقالو ابوريالين وخمسة وعشرة ممنوع تدخل لاوربا لانها مصنعة من مواد خطرة ورديئة وحنا يالاوربين شعوب لها قيمتها وتستأهل من يدافع عنها
بس يابداح باريس نار والسائح اللي يجي على حسابه يجب ان يحسب ان اليورو مثل الريال والا يبي يتعب واليوم دخلت محل عطورات ولكن البائعة قالت تبي نصيحة المطار ارخص لك قلت جزاك الله خير

سألته وش البرنامج ؟ قال الليله معزوم عند خالتي قلت وينهي ساكنه قال مادري بس ارسلت لي ارقام 0
عقب عودته من العزيمة قلت عسى ما ضعت ؟ قال لا يومن ركبت التكسي وريته العنوان وسجله بجهاز الجي بي اس وتوكل على الله
شوي الا ويقول تفضل هذا بيت خالتك قلت اسم الله تعرفها ؟ قال لا بس الجهاز يعرفها ويوم شاف استغرابي قال امزح معك في أي مكان بفرنسا يمكن تاصل بسهوله قلت الله يخلف علينا
انطلقنا بالمترو الى متحف الشمع وهويستحق الزيارة لانك ترى الشخص كحقيقته وبعضها من المستحيل ان لاتضنها الا حقيقة
ولكن الشيخ فجع عندما مر بجنب احد التماثيل فرفع رجله لتضرب ساق الشيخ فصاح باعلى صوته بسم الله فضحك الرجل وكذا اثنان من السياح وكان بجانبه كرسي فجلس بجنبه وسلم علية وقال له لو اقمت عليك دعوى ؟ قال ماتسويها ثم عرض عليه ان يقوم باعمال سحرية فقال يالله
بعد خروجنا من المتحف وكانت تحف به مجموعة من المحلات الجميلة واسعارها لا باس كما قال الشيخ وقد قابل سيدة مغربية تبيع في احد المحلات فدردش معها فسمعتها تقول للشيخ بنبرة حزينه ادع لي ربي ان يريني مكة والمدينه قبل موتي فتمتم بكلمات لم افهمها وعدنا بالمترو

[الحاج سلام]

الآن صدقت الشيخ منقاش انك يا بداح على نياتك .
المخاوي ماله عمة ولا خالة في باريس هذا مقطوع من شجرة سمر في شمال الجزيرة العربية .
المخاوي شوهد في الكريزي هورس يا ولد السيرلانكي وخلاك نايم على اودانك كما يقول الاخوة االصعايدة .
ولا اظن انك ذهبت لمتحف الشمع لانك لو ذهبت كان رأيت تمثال شيخك ابو المناقيش بجانب تمثال هتلر وليينين وموسيليني .
عموما سلم لنا على المخاوي ولا تتأخرون ترى الكرسمس قريب ،،،،

[مخاوي منقاش]

قال لي الشيخ تودع من باريس اليوم ترى بكرى السفر قلت انا ودي امدد يومين قال كل تبن قلت في نفسي حتى بباريس ؟
اعطاني مظلة وهو مظلة لان المطر مستمر وقال يابداح لو امطرت عندنا مثل هالديم الخفيف لاقفلوا المدارس
طوال السنه فقلت باستغراب معقول ؟ قال ايه ولدي نواف اتصل الاسبوع الماضي قال ابشرك بكرى اجازة قلت ليه ؟ احتمال مطر
وانا افسرها بشيئين ان المسؤلين يحسبون حساب المستقبل بحيث لا غادرو المناصب واستلم المناصب انصاف المتعلمين من الطلبة الان يكون لهم يد ويذكرونهم بانهم غيبوهم عن المدرسة في الامطار والمؤتمرات والغبار الخ الخ000000000
او ان المسؤلين يرون ان الطلبه في تعليمهم ومستوى المعلم والمنهج لن يخرج جيل منتج لذا قالوا خل الطلبه ينبسطون وليه نحرمهم من هالفرص الذهبية
قلت ياشيخ كلامك عجيب ومن يقود الصناعة والزراعة ؟ قلت ربعك ابو هنود وعشرات الجنسيات وتصدق يبو البدح ان الباكستاني يستأجر المزرعة كيلو بكيلو ويزرعها اعلاف وبعدها بطاطس وبعدها حبحب ويكسب مالا يقل عن مليون ريال ويعطي صاحب المزرعة 150 الف هذا بالاضافة استنزافة للماء
وهل تدري ان هناك سوداني يدخل من تجارة التمر في القصيم 4مليون سنويا ةغيره كثير
انا يابداح اتمنى ان ارى سعودي يعمل وينتج
ياريت مناهجنا تعلم الشباب كيف ينتج
يابداح ياليت مناهجنا تلغي الحفظ وتكتفي بالتدريب العملي من اولى ابتدائي
يابداح تدري اننا اقل دول العالم او من اقلها بعدد ايام الدراسة بالعام
يابداح عندكم مشاكل بالتعليم مثلنا ؟
قال لانشاالله (برا وبعيد ) ياشيخ لو طبقنا نظامكم كان ماتعلمنا ياشيخ ابي اسألك مين هذا يلعب بمستقبل جيل ؟
قال: يابداح لو تنطم تر الضغط مرفوع

[السيد الحسيني]

اخي الشيخ مخاوي الشيخ منقاش
يالله صباح خير ليه الزعل وانت في باريس لوكنت مكانك اخذت اولادي ودرستهم في فرنساء وريحتنا وريحت اعصابك
على العموم الحمدلله على سلامة العودة