تكفا ترى تكفا تهز الرجاجيل

[abonayf]

تكفا ترى تكفا تهزّ الرجاجيـل =لولا صروف الوقت ماقلت تكفا

بيت مشهور يتردد دائما خاصة الشطر الاول منه ولم اكن اعلم انها قصيده كامله الا ان وجدتها وها انا اضعها بين ايديكم لعل من لم يكن يعلم بوجودها مثلي يكون على علم بها الان وهي للشاعر: محمد الدحيمي الشهري المعروف بــ ( أخو تكفى ) حسب ماوجدت مكتوبا واليكم القصيده كامله :

اما لطمنا العيل والا الطم العيل = مادام شب النار مندوب الاطفا
من ذاق حر القايله يعشق الليل = ومن شب ضوه ليلة البرد يدفـا
امسيت في جيلٍ ولاهوب ذالجيل= واصبحت والا ديرتي شبه منفـا
واللي حما بيته بطيـرن ابابيـل=ماجيت ادور كل من صد وقفا
ولاجيت ابشحذ يانما دلّه وهيل=جيتك وجرح الظلم غاديه يشف
جيتك بكلمه كنها صعقة الويل=ان قلت تكفا لاتهـاون بتكفـا
تكفا تراها كلمةٍ تقطم الحيـل= لابالله الا تنسف الحيـل نسفـا
تكفا ترا تكفا لها هدرة السيـل= في صدر حرٍ ينتف الطيب نتفـا
تكفا ترا تكفا لها تسّرج الخيـل=ان كان لك في مجمع الخيل عسفا
تكفا تراني من قرومٍ مشاكيـل =حماية الساقه بسيـفٍ وشلفـا
تكفا وتكفا ماتسـاق لمهابيـل= تكفا تخلّي القرم لاشٍ وهطفـا
تكفا ترى تكفا تهزّ الرجاجيـل = لولا صروف الوقت ماقلت تكفا

دمتم بخير

[ابو عادل]

اختيار جميل يابونايف( تكفا) لاتحرمنا من مثل هذه الاختيارات
كانت( تكفا) تثير النخوة والحمية والفزعة أما اليوم فلم يعد لها قيمة ولاتهز أحدا.
بارك الله فيك.

[@ بن سلمان @]

ابا نايف
يعطيك العافية , وقصيدة كلها حكمة
ولعل هذه ابيات من قصيدة مقتبسة :


يهتز كـلي هز من قول " تكـفى "=و " تكفى " على خبري تهز الرجاجيل
اليا أنتخى بي صاحبي جيت زحفى =لا قال " تكفى" يعتريني هـــرافـــيـــــل
امشي لو ان النور عندي مطفى=و " تكفى " تمشيني على العدل والميل
ما تهمنى طلعه ونزله ولفى =متهورن والله عليه التواكيل
على المنايا احذف الروح حذفى=ولا اطيع في ممشاي هرج العواذيل
ماني من اللى لا أنتخوا فيه قفى =يضرب جلى ويشكل الوضع تشكيل
قليل فود.ن. باللوازم تـخــفــى =وبوقت الرخى محد.ن. وصل له مواصيل

[أبو علي]

والله قصيدة جميلة توحي بحمية الرجال اليا نخت بعضها وما اجمل النخوة عند الرجال ، وكم يشعر الانسان بالسعادة عندما ينتخية ذوي الحاجة ، وكم يفرح ذوي الحاجة عندما يجد من يقف معه لقضاء حاجته ، لكن قل اليوم من ينتخي وقل من ينخي وتلاشت كلمة تكفى واصبحت بين جيل اليوم لاتعني اكثر من كلمة عابرة ، نسمع قصص وعبر بدأت بكلمة تكفى تحمل اناس متاعبها وفازو بالاجر وبالسعادة ، اما عصرنا عصر الثعالبه والنصب والاحتيال رجل ينتخي اخر بقولت تكفى اكفلني عند فلان في شراء سيارة بمقدار 160 الف ريال على نظام التقسيط الشهر ثم يشتريها وبعد ايام يروغه كما تروغ الثعالب فيدفعه الثمن فياتي صاحبه يرد عليه كلمة تكفى اعطني حقي ، وليت كلمة تكفى اليوم تنفع ويقول له لا شيى لك عندي، تكفى ،
تكفى ،
تكفى ،
تكفى ،
تكفى ،
تكفى
و لا فايده انتهت صلاحيتها . ( expaird)

[ابن ابي محمد]

شكرا يا أبا نايف
ذهبت النخوة وذهب أهلها , وأضاع العرب شيمهم وقيمهم , وأنتم اليوم تعيشون في عجاجة من الناس في عصر ألرويبضه .
لمزيد مه المعلومات عن عصركم أطلعوا على علامات الساعة ألصغرى ألتي ليس بعدها ألا الكبرى ..

[أبو عبدالرحمن]

مشكور أبو نائف على هذه الاختيارات الجميلة

[النتيف]

تشكر با أبو نايف على هذا الموضوع

فقد كنت أجهل بأن عبارة (( تكفى ترى تكفى تهز الرجاجيل)) هي شطر من إحدى أبيات قصيدة كاملة

[abonayf]

اختيار جميل يابونايف( تكفا) لاتحرمنا من مثل هذه الاختيارات
كانت( تكفا) تثير النخوة والحمية والفزعة أما اليوم فلم يعد لها قيمة ولاتهز أحدا.
بارك الله فيك.
سرني تواجدك ابا عادل وليس الامر بهذا السوء

ابا نايف
يعطيك العافية , وقصيدة كلها حكمة
ولعل هذه ابيات من قصيدة مقتبسة :
اشكر تواجدك اقتباس زادنا معرفة واثرى الموضوع اشكرك بن سلمان

وبعد ايام يروغه كما تروغ الثعالب فيدفعه الثمن فياتي صاحبه يرد عليه كلمة تكفى اعطني حقي ، وليت كلمة تكفى اليوم تنفع ويقول له لا شيى لك عندي، تكفى ،
تكفى ،
تكفى ،
تكفى ،
تكفى ،
تكفى
و لا فايده انتهت صلاحيتها . ( expaird)
ياولد العم يبدو انك عانيت من الامر انما مازالت الدنيا بخير فقط يجب ان نعلم بمن نثق

شكرا يا أبا نايف
ذهبت النخوة وذهب أهلها , وأضاع العرب شيمهم وقيمهم , وأنتم اليوم تعيشون في عجاجة من الناس في عصر ألرويبضه .
لمزيد مه المعلومات عن عصركم أطلعوا على علامات الساعة ألصغرى ألتي ليس بعدها ألا الكبرى ..
ابن ابي محمد
نسأل الله السلامه

مشكور أبو نائف على هذه الاختيارات الجميلة
سرني تواجدك ابا عبدالرحمن

تشكر با أبو نايف على هذا الموضوع

فقد كنت أجهل بأن عبارة (( تكفى ترى تكفى تهز الرجاجيل)) هي شطر من إحدى أبيات قصيدة كاملة
سيم مال انا
تشكرات النتيف