قلبي رجف وأسقط ضلوعي بزلزال=وطاح الصبر تحت المعاليق مشلول
كل شيء متهدّم ولو ما انهدم مال=ما عاد باقي شيء بالجوف معدول
واللي حسبت حسابه يطيح فالحال=أثره قوي مهما حصل كيف بيزول
ماني بخاسر شيء و الحب مازال=قصره بقى مثل الجبل عادل الطول
طردي تناسب ثم عكسي خذ مثال=شعري بياني له رسم فيه مدلول
لك حب لو تدري من العال فالعال=كل مايزيد الشوق يعلى به الهول
والشوق ماتدري لو إنه معي طال=يضعف بقلبي هالصبر وانت مسؤول
شوفك مطر به مسيل العين ينسال=وإلا غيابك جفف العين لاحول
قلي متى تعتق معي راس الآمال=قلي متى وأصدق معي مره القول
ظهر الأمل ماله على القاع منزال=وإن نام لحظه يا تعب نومة خيول
كانك عقلت مشاهدك بأوثق عقال=ابشر من الخاطر ترى جا لك فلول
من لي سواك بهالقصايد و الأمثال=وأنت الذي عن باقي العالم تحول
تدري غيابك غربة الروح و البال=واللي شكى غربه مع الناس مهبول
لكن تراك الناس و إن صرت رحال=فأنا غريب وغربتي شيء معقول