|
سمره سبقت أحتفال القبيله.
البارح كنت جالس مع دكتورنا حليفي الدكتور مشعان ,
وفي طارف سوالفنا سعلته عن شهادة الدكتوراه وقلت , يبن عمي دكترتك هي في أي المعاني ؟, جاوبني وقال , قبلها الماشستير (الماجستير) كانت في عود الاكسير اللي يداون به جميع المكاسير , والدكتوراه كانت عن الذره . رديت عليه بضحكه فيها الكثير من النقده وقلت , يا حليفي أفلحت في الماشستير لكنك طلوحت في الدكتوراه يوم ما لقيت تقدم فيه الشهاده ألا سارفه من السوارف على قول الشيخ سلام , وهي الذره الهابيه اللي تدبي على ألأرض وضررها أكثر من نفعها , رد عليه وقال , يا بو نقشه هذي ذره نوويه مثل ذرة أحمدي نجاد وذرة الكيران الشماليين اللي دوخوا بها الصهاينه وأذنابهم , ماهي ذرتكم يا اهل الديره . لكن خلك مني ومن دكترتي , وقل لي أنت يا بدر الدجى , شهادة الدكتوراه اللي تدكترت بها فيش أخذتها ؟. رديت عليه وقلت , عندي شهادة الدكتوراه في سلوم العرب وسبول القبايل , وعندي شهاده أعلا منها ومن شهاداتك بملايين الدرجات , وهي شهادة أن لا أله ألا الله وأن محمدا رسول الله . أنبهت الدكتور وشرق بالريق, ثم تنحنح وتزحزح وبعدها تشهد وهلل وسكت . ألتفت على ورع من الجماعه كان جالس جنبي ومقر أذانيه يتنصت علينا بزعم أنه يحب مجالسة أهل العلم والعلماء ويبي يتعلم مني سبول القبايل , وبعد هبدت بالشون على الفراش هاك الهبده اللي خلت الغبار تعتكر عجاجه من على روسنا قلت : قم قامت قيامتك يا مزغور , قم تناول الخمره (الكفتيره) من على طرف النار وقهوي الدكتور حتى يتكيف ويستقعد راسه , وبعدها جر لنا من الحضيره همير (جذع) من مال الذيب وجيبه قدام الدكتور وقل له قم يا ضيف الرحمن سنع عشاك . مالكم في طوالها , سرى عندنا ليل وهرجه ودرجه , وحضر عشانا وهرجتنا الشيخ حمار القايله , والشيخ تيس القراره , والشيخ ساري الليل , وحليفي المشرف الفني , والشيخ ملاطم ذبان خشمه , والشيخ بايعها بقرشين , والسفله الخاين بعيد الذكر عني وعنكم مخاوي منقاش وحليفه الشيهان . ومن السوالف اللي دارت وتهمكم يا أهل هذا المنتدى , سعالات سعلتها لساري الليل والحاضرين , منها سعال قلت فيه , يا ربعي لو الراي رايي حطيت كتمان شيخ لثماله كافه , لأنه رجال متحمس للقبيله , وأن شاء الله أن حماسته من باب صلة الرحم ولاهي من باب العصبيه القبليه والعنصريه الجاهليه . قاطعني ساري الليل وقال , يا ربعي جزى الله الشيخ كتمان كل خير, وهو خير من يعرف أن ألأعمال بالنيات , وانه ما ينفع العبد ألا عمل خالص لوجه الله يبتغي فيه مرضاة رب العباد , وما بقي من ألأعمال اللي فيها حميه تروح في مهب الريح . والشيخ كتمان نعرفه طيب ومن معدن وبيت طيب وشيمه وقيمه , ورجال يستاهل الشيخه لأنه من طياب الرجال اللي تحشم في ربعها, وونعم به وستة أنعام , لكني لو لي من الراي راي كان نصحتهم بالبساطه والتواضع والبعد عن التكلف ومظاهر الخيلاء والأسراف وتقليد غيرهم من القبايل اللي طاشت في أحتفالاتها . ولو لي من الراي راي كان نصحتهم حتى يبعدون عن التملق والمديح لمن لا يستاهل المدح , ونصحتهم لا يعطون جايزه ألا للي يستحقها , وأول اللي ما يستحقون الجوايز هم شيوخ القبيله , لأن الشيخ هو اللي من المفروض يجمع ربعه ويجود عليهم بموجوده قبل أحد يجود عليه , ويجيز من يستاهل الجايزه من ربعه قبل تجيزه ربعه . يا ربعي شيوخنا ما ينذمون ولا ينمدحون , يعني أنهم مثل بقية شيوخ القبايل من حولنا اللي ما عمر واحد منهم جاب راس كليب وألا أوى ألأيتام والمساكين أو دخل السجون بسبب دفاعه بالحق عن ربعه وديارهم . شيوخنا نحترمهم ولا نذمهم ولا نغالي في مدحهم , مثلهم مثل باقي ربعهم , وكما تكونون يولى عليكم , لأنهم أحرص الناس على شياخه , وأذا وصلت المواصيل عند أموالهم والا راحة خطرهم تنكروا لشيختهم واعتزا الواحد فيهم وقال أني أبو فلان , لا بالله , ألف لحيه ولا لحيتي , يعني هم بالكاد يصلون بعض الفرايض ولا يلتفتون للنوافل ألا ما قل , والفرايض اللي أقصدها هي حقوق القبيله والنوافل هي كل ما ينومسها. قاطعته وقلت , طيب من تبيهم يعطونه جايزه في مناسبه مثل هذي ؟. رد ساري وقال , نعطي الجايزه للي يثبت أنهم كانوا ورا جلب الخط المسفلت لبلاد ثماله , وللي يثبت أنهم كانوا ورى جلب الكهربه لبلاد ثماله , وللي سعوا في بنا الجامع الكبير ومرافقه في وسط بلاد ثماله , وللي يثبت أنهم يدافعون بالحق عن حمى القبيله ولا تركوه حتى هذا اليوم , وللي يثبت أنهم يدافعون بالحق عن منازل القبيله في عورش وعلق ووادي سوات وغيرها , وللي يثبت أنهم يسعون لكم في بناء مستشفى يمكن يبنى قريب أذا سلم من أذى المؤذين من بعض أفراد القبيله اللي يعارضون فيه الله يعرض لهم , ونعطي جايزه للي يتابعون ويطالبون بالخط الزراعي اللي يربط بلاد ثماله بالردف حتى تصبح الديره أقرب للطايف من الهده , ونكرم ونعطي الجايزه للي يجيبون مرافق وخدمات جديده في ديار القبيله من جمعيات خيريه أو حلقات تحفيظ لكتاب الله . مثل هالنشاما سواء كانوا شيوخ أو من أفراد القبيله أو حتى من خارج القبيله هم ألأهل للتكريم وللجايزه , وان أعطيتوها لغيرهم من اللي ما يستحقونها أعتبروها رميه راحت في غير أتجاه مرماها وتجربه محبطه , لأنه ماهو من العقل ولا الحكمه والرشاد ولا الأمانه أن التكريم يسير فيه تملق وتعطى الجوايز ومعاني التكريم لغير أهلها. طبعا , طلبتنا المتفوقين ما يختلف على جوايزهم وتكريمهم أثنين ولا تنتطح في شانهم عنزين , وليتكم تكرمون معهم المتفوقين من غير أبناء القبيله اللي تخرجوا من مدارس بلاد ثماله لأنهم أبناؤكم واخوانكم ولهم حق عليكم , وهم أبناء جيرانكم , وأكرام الجار من الدين ومن حسن الخلق ومن شيم ثماله اللي كانت من مفاخرها . وممكن يخصصون بعض الجوايز لبعض اللفتات والمعاني النبيله حتى وأن كانت ثانويه في ألأهميه , مثل لو يكرمون عميد المزارعين . وعمادة الزراعه تطلب أن المرشح أنه يكون من أكبر المزراعين سن , ويكون من اللي يزرعون بيديهم وبدون عماله , وتكون الزراعه حرفته من نعومة أظفاره الى اليوم , وأضرب لكم مثل بأبو عمر/ عويض بن شاهر العمري الثمالي. ومثل لو يكرمون عميد رعاة الغنم , والعماده في هالحاله تطلب في صاحبها أنه يكون من أكبر رعاة الغنم الحاليين سنا , وتكون الرعيه حرفته من طفولته حتى هذا اليوم (يعني ما تركها) , ولا يكون معتمد على عماله ترعى له غنمه . وليتهم يكرمون في مقدمة المكرمين أبو عبدالرحمن المشرف العام لمنتدى ثماله , قاطعته وقلت , هذا سرق صور كدتي وأفسد المخاوي ذمته وفيه وفيه , رد عليه ساري وقال , أبو عبدالرحمن يستاهل كل تكريم , ونصيحه تبطل يبو نقشه من الدنفسه واللف والدوران حقك , وتبطل الدعاوي الكيديه اللي ما تكبك منها . ثم واصل وقال , وممكن يكرمون سعيد بن سالم العمري الثمالي صاحب المتحف الذايع الصيت على مستوى الطايف , واللي حفظ الكثير من آثار أسلافكم وناب عن القبيله في هالجانب اللي غبتم عنه كلكم . , وممكن يكرمون البارزين من شعراء القبيله وخاصه صاحب قصيدة فخر ثماله , ويكرمون أقدم سايق سياره لا زال حي من القبيله , وأول مالك سياره لا زال حي حملت سيارته بضايع وركاب أهل الديره للمدينه . قاطعته وقلت , ويكرمون أقدم حمار (بفتح الحاء , وفتح وتشديد الميم) في القبيله , قال , ويكرمونه , رديت وقلت , ختامها مسك , وعشاكم ولم , أقلطوا على مرحبا , والله يحيكم على واجب حليفي دكتور الذره وعود الكسير.. |
رد: سمره سبقت أحتفال القبيله.
ماتخلي خثرقتك يامنقاش ولا وش معنى قلت للولد قم جب الخمرة تبي تفسد مشعان اخر عمره
اترك عنك العنصرية والتقوقع داخل القبيلة واذا انك قيك خير تكاليف الحفل تفقد فية معسري جماعتك وفي ليلة ظلماء فرج عنهم ضوايقهم (احرجتك/وبعدين انا وانت على طرفي نقيض اذا نمت انا توي اصحى واذا صحيت انت تكون بثالث نومه) |
رد: سمره سبقت أحتفال القبيله.
واضح أن الكفتيرة عمرتها زينه.
والا من وين جاتك هذه العلوم.. وين اللي يحركون هذه القيود.. |
رد: سمره سبقت أحتفال القبيله.
يازين سواليفك يابو نقشه وانت جالس في فيت الحده والله رجعت بنا ريوس كم سنه وانا ترا ما اسمع بسواليف الشيبان واللي لهم باع في القبيله وعند هم خبره بطينه الوادي وقطع العنبه والصرام في عرض اللديده والسواني والايام الخوالي يوم الواحد يتعلم العوامه بالبير ورابط على ظهرة جالون واحنا على القف نطالع ونصيح ياورع تمسك بالصندقه ويوم يطلع وبطنه منتفخ من المويه كنه قربه لبن وبعدين نروح على المجره وهاتك مسادح لين تطيح علينا الشمس اطراه السوالف المهم لا تبخل علينا وعطنا من هالسوالف اللي تشرح الخاطر وفالك صحن معقل بالسمن البلدي ولبن المعزا |
رد: سمره سبقت أحتفال القبيله.
مخاوي منقاش : هذي علوم رجال ما أنت في مستواها ولا أنت قدها ولا لك فيها حظ ولا نصيب ,
وعلى قول الشاعر ابن شلاح أقعد يا مال القعدود @@@ فلا أنت من نمير @@@ ولا أنت من الكلاب . |
رد: سمره سبقت أحتفال القبيله.
يا مرحبا بالحليف المنقش ***اللي لحافه ما ينقش
سبحان من علمك لبس السراويل اقصد من علمك أنك ترد على كل عضو في مشاركة مستقل. |
رد: سمره سبقت أحتفال القبيله.
حليفي العزيز ما أجمل ابتسامتك موعدي معك السبت إن شاء الله بعد اطمّن على موضوع مهم وابعلّم بباقي العلوم اللي ماجبتها وياخوفي على شيختك 0
|
رد: سمره سبقت أحتفال القبيله.
الدختور مشيعين/انا شفتك بالحلم وانت جالس على كومة تراب وبيدك بوق وحالق نصف شنبك وتغمز بعينك لي وتقول تسمحلى وصحيت وعلى طول على مفسر الاحلام العصيمي (تربطني فيه علاقة صداقة) قال وشو من رجال قلت والله مايخلا من الطيب والمثالب كثيرة قال هذا ان صدق علمي يبي يتراس ربعه قلت القبيلة قال بعيدة على نصف شاربة 0 فيه مجموعة خربانه يتنافس عليها ثنين والظاهر انه تبي تصير له0
ويوم سمعت كلامك الاخير قلت صدق العصيمي وانا باعتباري ايه من ايات الاستراحة اميل لتايدك واحتمال اصدر بيان بهالخصوص0 ابو عبد الرحمن /على طول موضوع مميز هو حال مشكلة نووي كوريا او مازق الانتخابات الايرانية او جاب العصفور من ذيلة كلام خيالي احلق سعر راسي ان تحقق وترا التكاليف على المخاوي ان لقيت واحد يجمع شتات قوم مؤمنين |
رد: سمره سبقت أحتفال القبيله.
مسكت القلم ابا اكتب :ما يستفاد من السمره،ولياه طالع هالمخاوي وشتت لي افكاري على ما هي مشتته(الله يخسه ماازين سواليفه) المهم اني كنت ادقق في علوم السمره وكأني بدهاليس السياسة الأمريكيه ،واذا بي انتقل الى لعبة سياسة دولة من دول العالم الثالث مع دول الجوار ، .المهم اني مع هالمعطيات قلت لنفسي وش رايك يا ولد بلاش تتكلم لا بلسان اوباما ولا بلسان القذافي ولا حتى بلسان الحاج سلام هذاك حق الغرفان والحبنان،واترك للي يحبون منقاش ولا ما يحبونه كل واحد ينتقش له فايده على مزاجه ،بس اني قلت ابا اوصي احبابي واصحابي كل واحد يتوضا ويصلي ركعتين وان كان في مخه مواقف او افكار سابقه تؤثر على فهمه لسالفة صاحب الالقاب التي لا يتسع المجال لحصرهايشيلها قبل ما يبدا ويقول بسم الله . واخيرا يا ساده اعدت قلمي الى جيبي ،وجلست اقرأ بتأمل للسالفة والردود فطار النوم من عيني. تقبلوا مروري وسامحوني على التطفل |
رد: سمره سبقت أحتفال القبيله.
أبو عبدالرحمن : ما أدري ليش أجاباتك تجي دايم مبهمه ؟, وليش أشم فيها أن السم مخلوط مع الدسم ؟ .
ولا أقول ألا الله يهديك ويكفيك شر المخاوي الخربان اللي خربك علينا وبس . ابو عهد : مع بالغ ألأسف أني أشوفك تفاعل مع موضوع تافه وترد على المخاوي وترفع موضوعه على موضوع بدر الدجى وعرعرة المنتدى , وأقول لك , أنت ما تدري أنه ماهو ثمالي ؟ , وأنه أخترق القبيله حتى يخرب منتداها أمام عداها ؟ . |
رد: سمره سبقت أحتفال القبيله.
حاكم الشوق : أشكرك على ثناك على سوالف أبو نقشه , وبما أنك حاكم أعتبرني في خدمة الحكام وخدمة الشعب , وخدمة السمن البلدي ولبن المعيز وبيض الدجاج البلدي , وعاشت بلدي .
|
رد: سمره سبقت أحتفال القبيله.
لي رجعه يالرفاقه للرد على موضوع العرعره دحين عندي شغله مع ستو
نشوتكم بكره قصدي نشوفكم بكره يعني غدا... |
رد: سمره سبقت أحتفال القبيله.
حليفي المشرف الفني : ويش هالكلام اللي طالع نازل ؟, الله يهديك .
|
رد: سمره سبقت أحتفال القبيله.
العلم لكم خير يالربع
الأوله أقول للشيخ منقاش ــ وتحت عنوان النار تأكل بعضها إن لم تجد ماتأكله ــ والحلف إيّاه إندحر إندحار آلم الخصوم أعوذ بالله من الخذلان وأنا أعرف إن منهم رجال ياقف الصقر على أشنابها لكن تبعوا هالمخاوي بئس الرفيق كثير النعيق ، وعلى طاري النعيق سمعت واحد من الورعان اللى حضروا عند الشيخ منقاش ليله العشى يردد وهو يناظر فالمخاوي ــ إذا كان الغراب دليل قوم 000ويهذري بعلوم كثيره لولا أن الشيخ بحكمته واحترامه لخصومه بحلق فيه إلين سكت ولاّ كان عنده علوم شكله يبينثرها 0 الحقيقه يالربع أنا لي صحبه مع الشيخ من زمن طويل وكان عنده وليد ولايزال حبيب على قلبي يحب يملى جيوبه أقلام ــ السد بالأمانه بعد عطيناك البرهان ــ وكنت أمازح الولد واشيل أقلامه واخلطها مع أقلامي وادّعي عليه والشيخ بشر والبشر يعتريهم النّقص والكمال لله جلّ وعلا وكان يرفض يعطيه فلوس يحقق رغبته وأحيانا يضحك عليه ويملا جيبه فلوس وياخذه لأحد الأسواق الكبيره ويقول انت وش من رجّال فينتفش ويشتري مقاضي البيت من فلوسه الضعيّف وانا كنت أزوّده بالأقلام وصغار السن أكثر وفاءً من الكبار ولاينسون المعروف 0 ما أطوّل عليكم في الكلام يوم الإثنين الماضي اللي مالحقه إلاّ الثلوث كنت في مهمّه تبع العمل فالمنطقه الشرقيه وطرى عليّه بعد المغرب أتمشّى على البحر ومادريت إلا وذاك الرّجال اللي متغشردني ( يعني ضمّني بحراره ) ولين ماعنّي وعن صاحبي إبن شيخنا والحقيقه إنّي ماصدّقت أشوفه وقلت ياولد أنت كيف حالك وابوك وش الدنيا به واهلك كُلهم واعطاني كل العلوم اللي تسر إلاّ إنّي حسّيت إن معه نغطه ((يعني علم ودّه يقوله )) قلت له أنا مثل أبوك إن كان لك حاجه ولاّ شي علّمني قال الله يزيدك من فضله إحنا بنعمه وبخير وابشّرك حصّلنا من العلم مايُسرّك وابويه أدى اللي عليه وهو بخير عانه باني له بيت فالطايف وعماره عند الحرم وعنده يجي خمسمية راس من الغنم غير البقر اللي ملاية الحمى وهو على حميّره اللي أنت خابره ماغيّرته الدنيا ، وحسّيت إن الولد يبيقول شي ، قلت إيوه 0 قال يعم أنته من أصدقاء الوالد ويعز عليك ولاّ يرضيك إن الناس يلحقونه بهرجه وابويه صاحب له رجال بخيل طردوه جماعته من بخله وطولة إيده (( يقصد حرامي )) ومن يوم إلتفق بذك اللي ماودّي أجيب طاريه وهو صايبته شلمه فالدنيا (( أي حُب لجمع المال مقرون بالبخل )) والله ماكُنّا نعرفها فيه قبل لايبلانا الله بذيك البليه 0 قلت ياولدي أُقصر العلم وابوك أعرفه من يوم كان يلعب معنا فالمقرح وهو رجّال علومه أكبر من سنّه لكن يمكن فيه علم غابي عليك ، وقبل مانوادع بعض وجايه رساله وليا إنّها من أبوه يطلب من الإتّصال عليه قال شُفت هذا الوالد رسل رساله بليز كول مي ، قلت هو معه جوّال ؟عطنيّاه قال الجوّال قصّه ثانيه 00000 لا أُطيل عليكم لي معكم لقاء آخر بمشيئة الله نكمل فيه باقي علوم العزيمه وبعض الأهداف اللي من وراها !!!! |
رد: سمره سبقت أحتفال القبيله.
علومك زينة يا د مشعان
ويا سدك جبل..ننتظر بقية العلوم..والله يعطينا خيرها.. |
رد: سمره سبقت أحتفال القبيله.
دكتورنا العزيز , السلام عليكم ورحمة الله وبركاته , وأسعد الله مساك وكل أوقاتك , وبعد :
أنت ما أنت حليف , أنت حليف وصديق ورفيق (بالمعنى السعودي ماهو بالباكستاني) وأخو عزيز وفوق هذا كله مع ألأسف حرامي أقلام . لكن كما يقولون شيوخ القبايل , من علم بذنبه غفر الله له , وأنت هالحين أعترفت بواحد من ذنوبك مثل يوم أعترف الشيخ سلام بواحد من ذنوبه , وحتى تفهم مقصدي أقرا المداخله رقم (ون ون) (11) على هالرابط : http://www.thomala.com/vb/showthread.php?t=43881&page=2 وكونك كنت حرامي أقلام ما ينقص من قدرك لأن حلفك معي وأعترافك بذنبك يجب كل ما قبله , وخياركم في الجاهليه خياركم في ألأسلام , وأستثني من هالقاعده مخاوي منقاش لأنه زفت في الجاهليه وزفت في ألأسلام وذنوب الخاين على عدد شعر راسه . |
رد: سمره سبقت أحتفال القبيله.
صدق ..إذا اختلف ـ مدري أيش ـ طلعت الأقلام!!!!
ظهرت الأقلام ...وما خفي كان أعظم |
رد: سمره سبقت أحتفال القبيله.
نسيت لا أقول لكم عن أقتراح أقترحه الشيخ تيس القراره في مناسبة الدكتور بشان أحتفال ثماله وقال ما يلي :
يقول يامن يوصل الخبر للشيخ كتمان بلغه سلامي وشكري , وقله أقترح عليكم أنكم تشوفون اللي يبون يتزوجون هالعام من شباب ثماله وتقترحون عليهم أن حفل زفافهم يكون على حساب ثماله ويكون حفل للقبيله توزع فيه الجوايز والتكريم للي تبون تكرمونهم . وبهالطريقه يكون عملكم حج وحاجه , حج وبيع مسابح , وتضربون مية صقر بحجر واحد , ووقتها للمتبرع أجر وجميله, وللي نظم الحفل وتعب في تنظيمه أجر وجميله . ويش رايكم ياللحى الغانمه ؟ ..... أبو عبدالرحمن : بطلك من الحركات القرعاء والهمز واللمز على الدكتور , وتذكر قبل ترمي بيوت الناس أن بيتك من قزاز , وأنك حرامي كده وبلصجي سدح براسه المخاوي بشوية تمر. |
رد: سمره سبقت أحتفال القبيله.
رفيقي شاهين : أولا أشكرك يوم خسخست لأبو خس المخاوي الجبان , وليتك تخفف من الوصيه وتعفي ألأخوان من الوضوء وتكتفي بالركعتين بدون وضوء حتى لا تشق على ألمريدين .
والأهم أني أعرض عليك الدخول في حلفي ضد أهل الهرطقه والمهرطقين وزعيمهم المخاوي , ويش رايك يا حليفي ؟. |
رد: سمره سبقت أحتفال القبيله.
الجداوي : وينك ما رجعت ؟, عجل وهات علومك , ومشكور على تعليقك ...
|
رد: سمره سبقت أحتفال القبيله.
اقتباس:
ثانيا وس باكستاني هذي ولاّ هِندي والله ماسبق طبيت لاالباكستان ولا بيونق يانق !! لِف شويّه إيمين الله يهديك 0 ثم أنا ماسرقت ولا اعترفت بالسرقه مثل بعض العرب ، أنا أعطيت صاحبي وارضيته يوم بخل عليه أبوه ، صحيح إني يمكن إستردّيت اللي أعطيته إيّاه في غفله منه بس إنّي طيّبت خاطره وكسبت ودّه 0 أمّا المخاوي فهنيئا له كثر سيئاته إن تاب فالعبد التائب الصادق في توبته ــ بشروطها الأربعه ــ يُبدّل الله له سيئاته حسنات وأنا لمست منه هذي الأيّام رغبه جادّه في التوبه وإن كان طِلع لنا بعلم جديد أعلّمكم عنه بعدين 0 أمّا الون ون حقّت ذكّرتني باناين ون ون اللي ضاعت علومها وقت اللزوم |
رد: سمره سبقت أحتفال القبيله.
تكفى يا حليفي يا سعادة الدكتور , ما عهدتك ألا حكيم وحليم , تكفى بلاشي نشرغسيل على قول المصاريه , وبلاشي تعليق مشيخه , وتذكر أن ما علينا ألا شمات .
وبخصوص المخاوي أقول أنه ما يستاهل ترد عليه وتحط عقلك بعقله لأنك كبير , والكبير يبقى كبير ولا يرد عقله بالصغار والصغاير ويركز على فعل الكباير . أهمله مثلي وأعتبره ماهو موجود لا على الطبيعه ولا على الخريطه حتى لو كان متربع وجالس قدامك , وحتى ما تنزل من مستواك قدام الرجال شروايه أنا واياك وتعرفه بحجمه الطبيعي ... |
رد: سمره سبقت أحتفال القبيله.
اقتباس:
وبعدين أنا شايفك هالأيام على ماقيل أسد عليّ وفي 00000 اقول لك خلّك فعشك إلين أحد ينشّك ولاهو بعيد 0 ثم إنّه وش سالفة كل ماسمعت لك طاري سرقه فتحت جيبك ، حسبي الله على من خرّب طبعك 0 |
رد: سمره سبقت أحتفال القبيله.
اقتباس:
والله ياطويل العمر ( وعلى فكره لاتنسى إن هذي من صفات أبا الحسل ) لايزال فالبندق صفره وفرد حمزه ثاير ثاير على ماقالوا ، وانا تحت أمرك إن كان تشوف إنّه كفاف تم 0 أنتظر الإذن منكم لتكملة السّالفه |
رد: سمره سبقت أحتفال القبيله.
يا دكتورنا سرني ردك المفحم على أبو عبدالرحمن حتى ثاني مره يبطل الصيد في الماء العكر , لكنك ما أشفيتني واجد في عدوي اللدود مخاوي منقاش .
وطالما أن فرد حمزه لابد ثاير ثاير لا محاله, وبعد أنها حشكت عندك فلا نقول ألا اللهم حوالينا ولا علينا , ولا نقول ألا لابالله ثورها وحاول توجها في جهة الخصوم وكثر البارود وخلها محمطه ولا تحط رصاص لأن الربع على قول القايل ما عندك أحد وفجعة الذيب ولا قتلته . |
رد: سمره سبقت أحتفال القبيله.
اقتباس:
الله يبشّرك بالخير إن كان صدقت يقول إبن سيرين في كتابه تفسير الأحلام (عن كلمة تراب ) إذا وردت في الحلم أنها تعني الخير الكثير من المال ، وعن كلمة ( حِلقَ ) فإنها تدل على أداء الأمانه ، ومن رأى ان شاربه حُلِق أو خفّ فإنه يصيب خيرا كثيرا (( ص 209 )) أمّا الغمز بالعين فلا يمكن أفسّرها في ضوء ماقرأت إلاّ بعد أشوفك وإن كنت أضنّك ماتستاهلها 0 عموما التفسير الإجمالي للحلم حسب القراءه أنني مُقبل بمشيئة الله على خير كثير وجاه وإن شاء الله إن الحلم يتحقق قبل إجتماع الجماعه واقوم بكل التكاليف على حسابي واقسّم الجوايز والأعطيات وساعتها سيهتف الجميع الشيخ مشعان الشيخ مشعان وتقوى شوكتي واطيّر أبو عبد الرحمن واستولي على المنتدى وأصفّي حساباتي معك وأمثالك ممن يسعون لتفريق الجماعه وهم مكرمينك ومضيّفينك وخالعين عليك الإسم الذي لم تُعطِه حقّه 0 أقوووووووول الظاهر إن كُثر الهرج معك خساره ، يحيا الشيخ ويسقط المخاوي يا يسقط يا يسقط 0 |
رد: سمره سبقت أحتفال القبيله.
الحمد لله على نعمة العقل وهل تقارن ياحليق نصف الشنب ابن سيرين الى شبع موت بالعصيمي الى رزقه على تفاسير الاحلام وبعدين انا مافسدت ابو عبد الرحمن والظاهر اذا فيه فساد فهو من منقاش وربعة وانا كل كلامي حمية لثمالة منك ومن الى مايتسماش وفي النهاية الغمز معناه انك تبي تجيك ضربة قناة(عصاء غليضة)0
|
رد: سمره سبقت أحتفال القبيله.
المخاوي : رجايه ولو كان ما بيني وبينك رجا أنك لا عاد تدخل على مواضيعي .
|
رد: سمره سبقت أحتفال القبيله.
وش تعطيني؟
|
رد: سمره سبقت أحتفال القبيله.
ماذا ارى ام ماذا اقول ام ترون ان الصمت ابلغ فبالبت شعري ان استطيع الوصول لاقناعكم جميعا بأهمية ان الصمت ابلغ |
رد: سمره سبقت أحتفال القبيله.
يا حليفي يا نجمنا الساهر : ليت المخاوي يفهم كلامك .
ومشكور على ردك , وليتها وقفت عند ندرة الصمت وقلة الصامتين لكنها تجاوزت الحدود ووصلت للخيانه العظمى والتولي يوم الزحف كما حدث من دكتورنا نسأل الله له الهدايه والبعد عن الغوايه ..... |
رد: سمره سبقت أحتفال القبيله.
لم أنسى بقية السالفة ولكن ضغط العمل وضيق الوقت لم يُسعفاني لروايتها ، إضافة الى أنّي أخشى الفتنه ، ومع ذلك سأُحاول فيما بعد بمشيئة الله أن أُورد ولو بعض ملامح الإجتماع 0 المخاوي ثبت بما لايدع مجالاً للشّك أنّك خاوٍ(ن) أو غاوٍٍ(ن) كلمةٌ تودّيك والثّانيه تجيبك 0 |
رد: سمره سبقت أحتفال القبيله.
اقتباس:
ماطوّل عليكم إتصل الولد على أبوه واسمع صوته مرتفع والولد يرد بـ طيّب ، إن شاء الله ، إبشر ، أمرك ، وبعدها قلّه عندي واحد يبيسلّم عليك ويوم كلّمته وسمع صوتي وهو ينهطس بالبكاء (يعني بكى بشدّه ) قال يارفيقي وينك زمان ماتلاقينا واحنا كان مايمر الاسبوع إلاّ واحنا شايفين بعض ومتعشّين سوى ، والله إنّه مايمسك معك الفول والعدس وقعد يعدّد بعض الامور ، وانا الحقيقه يوم سمعت صوته تذكرت ذيك الايّام واقول في نفسي ياربي يكون الولد ماهو صادق ويمكن إنّه طمعان فابوه 0 قلت له ياشيخ أنا شغلتي تنتهي بكره وفي طريقي أبمر الطايف وحسّيته يكرتم (يعني يتكلّم بكلام ماعرفته ) قلت نعم قال الله يحيّك أنا تلقاني عند الغنم في فيّه الحماطه اللي عند البيت مع العصر 0 ويوم الربوع ركبت الطيّاره وما عنّي وعن الطايف وقد تواعدت مع النّجم السّاهر وركبنا سيّارته وقبل أذان المغرب بساعه واحنا مقبلين على الشيخ ولينْ الغنم ضاويه والرويعي الله يبيّض وجهه يحوش فيها ويوم وايق علينا وهو يقول حيّاكم الله ــ سبق الشيخ ـ وينتبه الشيخ ويرحّب وهو تقول ملوّز ، المهم إن إحنا لقيناه حاط له دكّه وفارشها بطحا وعنده الربع اللي جاب طاريهم ومير يصيح فالرويعي ياولد جُرْ لضيوفنا ذبيحه من الغنم هذي خلهم يسنّعون عشاهم والحقيقه إننا وافقنا على طول لأن المواري تقول إنّه يبيقبل أطرف عُذر ، قام الرويعي الله يكثّر من أمثاله ويجر هاك الجذع اللي يسواله مسواه وينقز فيه الشّيخ قال الله لايعافيك ماشفت تُجر لهم إلاّ فحل تبيهم مايتعشّون (وهو يبيتبزّز من الشحم ومواري الخصايه باينه عليه ) عوّد فكّه وتناولّه ذيك الشّاه اللي مليانه شحم من خلقتها ودّك تقلط عليها باسرع طبخه قال فُكّها الله يكسر إيدك أنت ماتعرف تنقى للضيوف ذبيحه زينه ؟ قال وش أزين من هالحايل ، ويوم جاب طاري حايل وانا أطالع فالمخاوي وهويكركر إلين إنقلب على قفاه وإلين فثيابه بقعة تقول تهريب زيت ، وكنّه خابرها ويوم تذكّرها وهو ينكتم ويقوم بسرعه وانا تنكّد خاطري ما أسفط فالشّيخ إن أحد يضحك عليه ، واصيح فالرّويعي وهو مايستاهل ياولد الضنا علمه عندالله والشيخ من جِدّه ماتدري إن كان في بطنها شي وتعدم عشانا ، وفي غفله ولين الشيخ يشّر له على هريد شابر ( يعني يتيم وراضع من غير أمه ) دوبه ضاوي لحاله من رداة حاله ماقدر يلحق الغنم وقف الرّويعي يقدّم رجل ويوخّر رجل مستحي ولين جاي مع الخاوي ورع ملقوف كِنّه ماعمره شاف العيشه وينقز ويعُر ( يعني يسحب بعنف ) الهريد 0 أوغظ لي النّجم السّاهر قال نبنمشي وانا مستحي من الشيّخ وحشمان فيه قلت أبجرّب ويمكن يعذرنا قلت له ياشيخ عش ضيوفك واحنا مستعجلين إسمح لنا ، وقبل مايرد علينا مانتبهنا إلاّ والشيخ ناقز له في شاه قحمه تقمقم لها فالقراطيس اللي فالساحه وذكاها وقاطع اصبعه مدري من إيش0 قال والله ماتسرون وينادي فالورع يشب النار ويحط الكفتيره عليها وكأنه يقول ليا صار مال ابوك ماكول خلّك من أكّالته وكانت ليله مشهوده تجلّى فيها الشّيخ وسمعنا من سوالفه اللي من زمان ماسمعناها ولا عكّرها إلاّ المخاوي يوم تلقّف وجاب طاري إحتفال القبيله وكنّه يحاول يفهّم الشّيخ إن مشيخته في خطر إن كان ماحضر ولاّ على الأقل ساهم لو بشاتين مثل اللي ذبحها ولاقدرنا ناكل منها شي ، وسمعته يحذّره من أبو عبدالرحمن وانّه بسبب المنتدى يمكن يسحب البساط من تحت اقدامه وعلوم كثيره ماودّي أجيب طاريها إلاّ إنه تبيّن لي بوضوح دنفسة من ورى الستار والشيّخ ضايع بين حسن النيّه وخوفه على مشيخته ، المهم إن إحنا ضحكنا واستانسنا ويوم جينا سارين قال النّجم الساهر عندي ردحه أبكرّم بها لمعزّبنا قلت بيّض الله وجهك قال : ـ بيّض الله وجه من عشّانا 000 000ذبح لنا جدّة غنم خلق الله تصبحون على خير |
رد: سمره سبقت أحتفال القبيله.
ابو سيفين : حسبي الله عليك , كل علومك ذبح وصلخ وملخ وشاة حايل وخصي وعنف وشبوب نار وجر وعر, واضح من كلامك أن عندك ميول دمويه من يوم هذي علومك ومن يوم غيرت أسمك الزين لهالأسم الدموي.
بعدين بقعة الزيت ما فهمنا هي مقابله لصرة الزيت عند المخاوي والا عند بدر الدجى ؟. أن كنت تقصد المخاوي فهذي عادته في كل المواقف الصعبه اللي يقابلها , ويذكرني حاله بالمدافع القديمه اللي أذا ثار طلع بعض دخانه وشويه من باروده من الخلف . أما أن كان تقصد أنك شفتها على بدر الدجى فهذا من عكك السمن اللي يشربها حتى سار السمن يتنادس من كل مكان يلقى معه طريق . الزبده : أنت تعرف أني لو أكلت مالك وجلدت ظهرك وصادرت كل حوط البرشومي حقتك ما يجوز لك تخرج عن طاعتي بعد حالفتني وبايعتني على السمع والطاعه , لكن معك ثلاثه أيام تعلن فيها توبتك والا كلفت المخاوي بحكم أختصاصه يبني لك محجاه على طريقك في أم الحمام ويخصاك كما يوم خصى الشيهان حتى تحول لغاوه وتكون عبره لكل خوارج ثمالة . أسأل الله لنا ولك الهدايه ...... |
رد: سمره سبقت أحتفال القبيله.
اقتباس:
[blink] لا فض فوك لا فض فوك . [/blink] |
رد: سمره سبقت أحتفال القبيله.
00000000000000000000(لغرض التعديل )
|
رد: سمره سبقت أحتفال القبيله.
اقتباس:
وبعدين تعبت وانا أحاول أقرّب لك السالفه وانت يالله عليك الخلف مرّه توديها الباكستان ومرّه تردّها أم الحمام 0 الزّبده إنّي ماعاد أنا متحسّف لاعليك ولا على خويّك ، لكن من باب الوفا بسابق العهد وبمواقفك من صاحبي الدكتور مشعان إنّي أخلّيك تحت نظري ولاّ علومك ماهي تمام إلاّ إن كان إنّك هالأيام خالطها بخاره مع برشومي ؟؟؟؟؟؟؟؟؟؟؟؟؟ |
رد: سمره سبقت أحتفال القبيله.
يبو سيفين روح أنت والمشجعين لك وأولهم الشيخ سلام لهالرابط :
http://www.thomala.com/vb/showthread.php?t=44430 |
رد: سمره سبقت أحتفال القبيله.
ما شاء الله عليك يا ابو نشقة كل يوم يزيدون المعجبين والمعجبات لك بأفكارك الجهنمية وما دعيتني للحفلة لكن مسامحك والمسامح الله وين الحفل الكبير اللي بالبيت الكبير يقولون مره تكريم ومره تعارف ومره الخ... كله خرطي (عظم الله أجركم) يالرفاقة في عيالكم الممتازين اللي عشمتموهم وفرحتوهم وقتلتم الفرحة في قلوبهم بالتكريم اللي تأجل السنه الجايه حسبي الله عليكم.
وعشمي في شيخكم الكبير الشيخ منقاش وانا متأكد انه رايح يوم من الأيام يعد لكم حفلة كبيرة بعيدا عن المزاجية والعشوائية والوعود الكاذبه. وهو قدها وقدود وانا معاه بالريال والرجال والدلال والملال ويا لال يالال لكن نبغى ناس تقف وتأيد ما تعارضون وتندسون وأول شخص تكرمونه صاحب الحفلة الشيخ منقاش وحلفاه الخلوقين والرائعين لأنه غيور على قبيلته وسبق وسوى حفله وذبح ونفخ ودعم في السراء والضراء وفي الشدة والليونه ما طلب فزعة واحتسب الاجر عند الله ما ناقز وصايح وقال اعطوني وتشوفون وش اسويلكم . همسة: لماذا لا تتحول فعاليات وحفلات القبيلة إلى الشيخ منقاش ونضمن نجاحها ميه بالميه. غمزه: الحلف جميعا يكنون لك الاحترام وما حققته من انجازات عظيمة لهذه البلدة العظيمة لمزه: انا في خاطري أسوي حلفة جداوية على الشاطئ للشيخ منقاش وحلفاه. |
رد: سمره سبقت أحتفال القبيله.
الله يحيك يا جداوي , ويكفيني منك أنك من المعجبين بأبو نقشه , وليتك تنضم لحلف الظفر , حلفي الغانم , وسلامة هالوجه.
|
| الساعة الآن 05:08 PM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by