لبس العيد....عيديه لكم واعتذار عن الغياب
 

لن اقدم لها ولعلها من يلتمس لي العذر لديكم على طول الغياب

لبس العيد

[POEM="font="Simplified Arabic,4,blue,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]


للعيد لبس وللمشاعر مرايا=واللي طوته النفس تبديه الاعيان
ناسٍ تعايد من طراف الشفايا=قلوب سود وبيّن بعينه اضغان
وناسٍ تمد قلوبها للتحايا=تشوف في عينه تباشير صدقان
وناسٍ تعايد من بياض السجايا=متعلمين مجامل الناس وغدان
وناس ٍ كفانا الله شر الرزايا=لاشاف عينك صد ماكنك انسان
وانا لياعايدت ما اخفي خفايا=امد كف الطيب ماهي بنكران
لي لابة مامثلها فالبرايا=حتى ولو قالوا تعديت يافلان
عيال عمي محزمي فاللقايا=الطيب يذكر حين يقلون ثملان
حبيت اعايدهم بليا هدايا=واسوق حرف الشعر للفرح عنوان
كل عام وانتم من كبار العطايا=يامكرمين الضيف يوم الردي بان
ويا محتمين دياركم بالمنايا=من دون حد دياركم سيل دمان
تاريخ يقراء والحكايا حكايا=هذا المبرد صار للنحو عنوان
وامجاد ماهي من فعول الخطايا=للدين نصره والتواريخ برهان
ويوم الجزيرة مرتع ٍ للزرايا=كنا على وضح النقا بيض الايمان
اذا جهلنا ماأخذنا السبايا=بالجهل مانصطي على جار حدان
ومن هو نوى بالشر جته البلايا=مانقبل الميله ولو كان ماكان
واذا عقلنا زينها من سوايا=كم مجلس ٍ للشر بأيديننا هان
واليوم حكم وامن واحنا علايا=لان النزيه يعيش في كل الازمان
بالعقل ناخذ من زمنا مزايا=يوم السفيه يجيب بالزود نقصان
حبيت اعايدكم بليا هدايا=الا حروف الشعر من غالي الاثمان
[/POEM]

رد : لبس العيد....عيديه لكم واعتذار عن الغياب
 

أحس أن لهذه القصيدة طعم خاص!

طبعا أكيد طعم الجودة ...

صح لسانك أبو عماد...

لا شك أن هذه القصيدة على جمالها لو أخذتها عذرا لانقطاعك ...فلن نعذرك ..

رد : لبس العيد....عيديه لكم واعتذار عن الغياب
 

حياك الله يابو عماد ولو انك طولت الغيبه بس من جا ما ابطى

صح لسانك مبدع ولايحتاج لك مني اطراء انت علم من اول وتالي

لاتقطعنا مثلك اذا غاب عن هذه الصفحات له فقده ومكانك شاغر

رد : لبس العيد....عيديه لكم واعتذار عن الغياب
 

اهلا وسهلا وكل عام وانتم بخير

رد : لبس العيد....عيديه لكم واعتذار عن الغياب
 

ابو عبدالرحمن

من له اخ في مثل كريم اخلاقك لايسعه الا الاعتذار

شكرا لك الاطراء ....ولعلها ان تكون بداية العوده

النادر

رد : لبس العيد....عيديه لكم واعتذار عن الغياب
 

الشيهان

ابو عبدالله اضاءت حاشيتها بهذا المرور

لاهنت ولاعدمتك...وكل عام وانت بخير


النادر

رد : لبس العيد....عيديه لكم واعتذار عن الغياب
 

حسن عابد

ابو علي

المهلي مايولي...وكل عام وانت طيب


النادر

رد : لبس العيد....عيديه لكم واعتذار عن الغياب
 

تحية عطرة للشاعر الصقار أبو عماد.

مرحبا تراحيب المطر وكل عام وانت بخير ومن العايدين المقبولين انشاء الله.

وتسلم على القصيده الرائعة من شاعر رائع...وعوده حميده.

أخوك محمد بن عبدالعزيز بن حميدان.

رد : لبس العيد....عيديه لكم واعتذار عن الغياب
 

رد : لبس العيد....عيديه لكم واعتذار عن الغياب
 

محمد بن حميدان

كل عام وانت طيب وبخير

ياراعي المنامه ...لنا عليكم ملامه

ليش المقاطع يابو عبدالعزيز


شكرا على التواصل والاطراء


النادر

رد : لبس العيد....عيديه لكم واعتذار عن الغياب
 

ابو الونات

تسلم ..... وكل عام وانت بصحه وسلامه


النادر

رد : لبس العيد....عيديه لكم واعتذار عن الغياب
 

صح لسانك يا النادر قصيده لعلها أوصلت ما قطعه العقوق

رد : لبس العيد....عيديه لكم واعتذار عن الغياب
 

كل عام وأنتم بخير
بل نمد أيدينا بالتحايا الحارة
صح لسانك وسلم بنانك.

رد : لبس العيد....عيديه لكم واعتذار عن الغياب
 

صح لسانك أبا عماد و كل عام و أنت بخير

رد : لبس العيد....عيديه لكم واعتذار عن الغياب
 

صح لسانك يالنادر والحمدلله على السلامه وكل عام وانت بخير قصيده كفت ووفت

رد : لبس العيد....عيديه لكم واعتذار عن الغياب
 

تراني فاهمك يا النادر . أقول نعم هذه القصيدة من قلبك. وهذه القصائد وإلا بلاش.
وهات جديدك دائما.
شف لنا الكايد خله يكسر حاجز الصمت

رد : لبس العيد....عيديه لكم واعتذار عن الغياب
 

مدهش

اسعدتني مرورك وعذرا على تاخري بالرد

النادر

رد : لبس العيد....عيديه لكم واعتذار عن الغياب
 

ابو عادل

مرور اخي الكبير يسعدي

كيف وقد اطراء على النص

شكرا مدد


النادر

رد : لبس العيد....عيديه لكم واعتذار عن الغياب
 

بالعقل ناخـذ مـن زمنـا مزايـا
يوم السفيه يجيب بالزود نقصـان
حبيـت اعايدكـم بليـا هـدايـا
الا حروف الشعر من غالي الاثمان


صح لسانك يابو عماد

وكل عام وانت بصحة وسلامه