منتديات بلاد ثمالة - لقاء \الشيخ عابد الساعدي -الاخيره-

س\ عم عابد : كنتم شباب واكيد كان لكم اوقات فراغ . فيماذا كنتم تقضون اوقات فراغكم؟

والله الفراغ ماجا إلا في هذه الايام . وزمان ماكان عندنا فراغ
اسمع : انا نهار الصباحيه والديره مليانه من الناس وضيوف القبايل وبعد ما انتهينا من العرضه واللعب . رحت اركب السواني على السريه ومن الساعه 8 إلى ان قطعت الفيه يعني ممكن لحد الساعه 5 عصر وانا على راس الجبل وهذا هو الفراغ حقي الي انت تقوله .
( الفرق الان بين شهر عسلنا وشهر عسلكم)

س\ عم عابد العمله على ايامكم ماهي؟
_ كان فيه :
ريال- مجيدي
ريال- حميدي
ريال- فرانسي
وكلها لحقتها وكان فيه جنيهات تسمى –عصملي- (ابو نجمه) عثمانيه تركيه..

س\ عم عابد في امراض على ايامكم كانت منتشره مع قلة اطباء ماذا تذكر من هذه الامراض وكيف كان علاجها ؟
_ من ابرز الامراض: مرض حمى يسمى بالثلث .وكان ياخذ سنتين او ثلاث سنين مع المريض ,وكانوا يجيبون له اعشاب من الجبال ويتعالج بها .واذكر ايام علي كان في الابتدائيه , صابتنا فاقه في الوادي ,وامطرت لين الوادي ما ينقطع من عندناوكان فيه مرضى كثير ,ولا كان فيه مستوصف , فنزلت انا الطايف وقدمت على الصحه ويرسلون معي ثلاث دكاتره وجبتهم وسكنتهم في البيت عندنا في وادي السواعده , وبعدين جانا المستوصف .

س\ عم عابد . اول سياره امتكلتها لونها موديلها ؟
_ اول من ملك سياره هو عبد الرزاق اشترى سياره نسميها (عنتر ناش) اخذوها الضباعين اسفل الديره
_ وبعده حامد الجحدلي اشترى سياره موديل :47
_ وبعده عبيد الجحدلي اشترى سياره موديل:51 . ومره تعلقت في وادي الاعرج عند الغدير وكانوا جاهلين في السيارات وماعرفولها . وقتلوها مكانها
_ وايضا عبيد اشترى سياره موديل:56 . وكنا نسميها : بساط الريح
_ ومن ناحيتي انا : كلمت عزاب ( والد رداد) قلت له احن انبغى سياره ولاكن مافيه فلوس . روح لابويه وشاوره ؟
رحنا لابويه فقال : انا ماعندي مانع لك انتبهوا لها وحافظوا عليها . وفلوس ما عندي
فرحنا انا وعزاب وكل واحد راح يجمع لحد ما وصلت فلوسنا :8 الاف ونزلنا مكه واشترينا سياره موديل :63 اخذنا فيها ثلاث سنين
_ وبعدين انا اشتريت سياره موديل:66 بـ 28 الف في عام : 1386هـ - 1966م

س\ عم عابد : شاة الغرم كيف طريقتها وما معناها ؟
_ هذا رجل إما انه مطرود من قبيلته او شارد . فيجي لقبيلتنا ويذبح شاة الغرم والقبيله تذبح له

س\ الحلف . ماهو وكيف كان ؟
_ الحلف: إما ان يكون بين شخصين او بين قريتين بحيث القريه القويه تحمي القريه الضعيفه , وهكذا

عم عابد : شكر الله لك وكتب الله اجرك . ونسأل الله ان يبارك في عمرك وان يجعله عامرا بطاعة الله والسلام عليكم ورحمة الله وبركاته

وتقبلوا خالص تحيات وتقدير اخويكم ومحبيكم معدي اللقاء: بن عزاب - ابو عمر

وما كان من خطأ فمن انفسنا والشيطان وما كان من صواب فمن الله وحده ..

ومن هذا الموضوع نأتيكم بإعلان مهم :

نحن اخوانكم في مشروع لقاءات رجالات القبيله . ندعوا كل من لديه فكره أو اقتراح أو سلبيه ان يظهرها لنا . وكما تعرفون هذا عمل بشري مقل يحمل الاخطاء .

وايضا : من يعرف لنا أحدا لكي نقوم بزيارته وعقد اللقاء معه ., فيخبرنا بأسمه ورقم جواله للتواصل والتنسيق معه .

وايضا : من اراد المشاركه والرفقه فحياه الله وبياه

والله اعلم ...