منتديات بلاد ثمالة - بيني وبين العرابي

مشيلح الثمالي

سلام ردَيَةٍ تاخذ حقوق وتعطي حقـوق
مرفوعة الشان والنيشان مايقصر مداها

ثنتين وجه وقفا حبَة خشوم ولزمة حلوق
مدري يجيك النصيب بوجهها والاَ قفاها

عبيدالله العرابي

يامرحبا ياهلا يا اهل الكلام اللي على ذوق
ترحيبةٍ تاخذ وتعطي بعد يبطـي صداهـا

الاوله عايشه والطايشه ماجالهـا سـوق
حزّر وفزّر وحوّل وآنت الاول في سراهـا

مشيلح الثمالي

ياالله لعل البقابك والمخايل رعد وبـروق
وان هلت مزونها ضاقت مسايلها بماهـا

يابعد روس النخل يابعدها لوشلَت عذوق
ومن لاسقى زرعها من عدّ راهي ماجناها

عبيدالله العرابي

اللي تشوفه نشوفه في وصوفه مرتفع فوق
والارض زايد ظماها تبلع اللي من سماهـا

السالفه كلها عنقا وغول بشكـل مخلـوق
ماني بظالم لكنّك ما آنت سالم من حداهـا

مشيلح الثمالي

العام راع النحل حطّ العسل في قدر مخروق
واللي حواليه لومـدّت يديهـا ماعطاهـا

ياالله دخيلك عتيق الله يقلّد فعـل معتـوق
الأوّله حوّلـت والثانيـة تلحـق وراهـا

عبيدالله العرابي

العام راع النحل ماله محل بداخـل السـوق
قدام لاتبتدي نافـض يدينـي مـن يداهـا

والغايبه بين لحم وبين شحم وبيض مسلوق
من زين ادبها تقول اللـي كتبهـا ماقراهـا

مشيلح الثمالي

الغايبة حطها مامونها في جوف صنـدوق
لوذقتها قلت هـذي مرّهـا غطّـى حلاهـا

ان كان ابوزيد يفرق سومها ماهو بمسبوق
لوينتهبها من يدين الزبون اليـا شراهـا

عبيدالله العرابي

تبي تعوّد يابن بركي ونصف الـراس محلـوق
إن كـان تـدري بسكـان المدينـه وأومراهـا

وإن كان شمس أمس غابت ماوراها نية شروق
رد العروسه لأهلها قبـل ترقـص فـي قراهـا

مشيلح الثمالي

تقولها وانت في بالك تردّ الطـاق مطبـوق
لكن بعض العرب لوجـا يكحلهـا عماهـا

دام ان وجبة غداها ياالعرابي قرص محروق
والله لتبطي ولاتلقى المفطـح فـي عشاهـا

عبيدالله العرابي

وش في يدينك لو بعينك تشوف الصقر غرنوق
ادري وش اللي معك واللي قفص صدرك حواها

ابرد من الظل لين تمـل والمطـرود ملحـوق
والناس ما آنتـه بهاديهـا ليـا مالله هداهـا