منتديات بلاد ثمالة - اذا لك شف في شوفي تراني

اذا لك شف في شوفي تراني
على شوفتك صحيت الاماني

زرعت الشوق كله بأنتظارك
واخذت الانتظار وجيت عاني

نسيت الناس لكن مانسيتك
عجزت انساك حتى لو ثواني

مليت الكون واشغلت الجوارح
نظر عيني سماع اذني لساني

عطيتك شي ماهو عند غيرك
ولا قصرت لكنك اناني

انا احبك واذا ودك تأكد
شف الله كيف بيدينك هداني

غيابك صعب والاصعب وجودك
وانا في الحالتين اتعب واعاني

حبيبي لا تواخذني ولكن
ابيك تحط نفسك في مكاني

اذا جيتك وانا مشتاق تقفي
تجاهلني وكنك ماتراني

واذا صديت عنك وقلت ابرحل
وقف قلبك على الباب ودعاني

ولو سويت نفسي مااشوفك
يميل القلب صوبك ويحداني

انا يا ابن الحلال اصعب حكايه
كتبني الوقت لكن ماقراني

مضى عمري وتقدر تعتبرني
غريب وفي زمن ماهو زماني

زماني راح مع نصفي ونصفي
نسى نفسه مع الوقت ونساني

اسافر حزن والصحبه ثلاثه
انا والصبر وسهيل اليماني

واذا مريت فـ بلاد الطفوله
فتحت الصدر للحزن وطواني

هنا دمعه جرت من عين جاهل
هنا لاقيت همي والتقاني

هنا باعتني الديره واهلها
هنا ضحيت لفلان وجفاني

هنا حاولت اصيح وماسمعني
سوى بعض الشوارع والمباني

انا ياســــــــــــيدي دقه قديمه
بغيت اخذ من الوقت وخذاني

على الأنقاض واقف دون حيله
اشوفك وجهتي بين المواني

تعال وطفّ بيدينك حنيني
تملكني وانا اشعلك حناني

تعال وضمني يا تاج قلبي
دخيلك لا تخليني عشاني

انا شاعر عيونك ياحبيبي
مع التحريف في بعض المعاني

وما نيل المطالب بالتمنى
ولكن شوفتك كل الاماني

محبة صادق النية قصايد
محبة ساقط النيه اغاني

قسم بالله لو موتي بيديك
واموت الفين مره ماكفاني

اذا باقي من الطلقات طلقه
دخيلك حطها بين المحاني