ما أغبى من المخاوي ألا ربعه .
 

المخاوي (عساه يخوي في فم كلب من كلاب البوليس ألألماني) رجال عنده خلل جيني وراثي , خلل فيه وفي أغلب ربعه , أسألوا من عاشرهم وعرف عنهم كل سارحه ومروحه وكل شارده ووارده .
والزبده , خذوا هالقصه اللي حدثت قبل سنوات لأثنين من طوال الشوارب من جماعة مخاوي منقاش , وهو راويها لي بنفسه , ولا يقدر يقول أني كذاب في ما أرويه عنه .
يقول المخاوي أن فيه أثنين من كبار ربعه وعقالهم (أن ما كانوا أعقلهم على الأطلاق) كانوا يسكنون في واحد من أحياء الرياض , وعندهم فلتين كبيره ومتجاوره وقديمه لأنهم عمروها من بداية الطفره وكانت مكيفاتها من المكيفات الجداريه قبل يعرف الناس المركزيات والأسبلتات والدكتات والثرموستات .
وقبل كم سنه سافر واحد منهم في بداية أجازة الصيف للجنوبيه يبي يمشي الوغدان (يعني البزوره بالمكاوي) ووصى جاره وقال : يا ابن آخي يا فلان خلك مثل الذيب اللي ينام بعين ويكلا بالثانيه , وانتبه لفلتي من الحراميه , رد عليه ابن عمه النبيه وقال : لا توصي حريص , واقسم بدون يطلب منه القسم على أنه رايح يحرص عليها مثل حرصه على حلاله والا أكثر .
وفي ضحى يوم من ألأيام قام الجار وأطل مع واحده من نوافذ الدور العلوي من بيته على فلة جاره اللي وصاه عليها في غيابه الا وهو يشوف ثلاثه معهم حوض دينه في داخل حوش جاره يفككون ويحملون في المكيفات من البيت , خرج يجري وعليه ثوب نوم لكنه نسي لا يلبس السروال من الخفعه واللمسه الجينيه اللي وارثها من أجداده كابرا عن كابر .
وصل الى عند الدينه بعد لقي باب الحوش والبيت مشرعه والرجال الثلاثه منهمكين في تفكيك وتحميل المكيفات اللي في بيت جاره , ويوم سلم عليهم ردوا عليه السلام بأعصاب بارده وبدون أي التفاته له .
سأل واحد منهم عن علمهم , وليش يفكون المكيفات ؟, أجابه أن راعي الفلة أجر مؤسستهم تفك المكيفات وتصينها وتزينها وتردها مكانها , يوم سمع جابتهم ترجاهم ياخذون مكيفات بيته مع مكيفات جاره للصيانه , قالوا ما عندهم مانع , لكن لضيق الوقت يبونه يطلع على الدينه يستمد من واحد منهم المكيفات ويرصها حتى يتفرغ الثاني لتفكيك المكيفات اللي في بيته (يبون يلهونه) .
وافق الرجال وطلع على متن الدينه وثنى ثوبه وربطه على وسطه وسار يستمد المكيفات واحد ورى الثاني وكل ما أنثنى ومر واحد من المراره أنكشف ما ستر الله منه على المار , وجيرانه يضربون له في البواري يبونه يتلملم وينزل ثوبه حشمه للماره لكن ما عندك أحد .
الخلاصه : بعد فكوا وحملوا مكيفات جاره اللي ساعدهم عليها , وفكوا وحملوا مكيفاته اللي طلبهم يفككونها وياخذونها معهم , رجع لبيته شامخ بأنفه كأنه مظوي راس كليب , ثم أفطر مع المره والوريعين , وبعد ملى الكريشه تلفن لجاره وعلم له عن الخدمه الجليله اللي قدمها له ولنفسه , لكن جاره أستصاب وصرخ في وجهه وقال : يا فلان عساك أخذت رقم لوحة الدينه , رد عليه : لا بالله ما أخذتها ولا أنا بحاجه لها أصلا .
صاح الثاني وندب حظه وقال : والله ما وصيت أحد يصين مكيفاتي , ولا أظنهم ألا حراميه ساعدتهم عليه وعلى نفسك وليتني ما وصيتك .
وفعلا أتضح أنهم حراميه طاحوا في غباويه مخاويه , والله لا يبلينا بما بلاهم من بليه , وسلامتي وسلامتكم ....

رد: ما أغبى من المخاوي ألا ربعه .
 

الله يهديك يا شيخ منقاش..

كان سترت على خويك مثل هذه العلوم..وأنا أدري عندك من هذه القصص الشيء الكثير.

لكن ودنا تكون بجرعات خفيفة حتى .....

رد: ما أغبى من المخاوي ألا ربعه .
 

مشرفنا العزيز ابو عبدالرحمن والقراء الأكارم : نفس القصة رواها لي مخاوي منقاش , وللأمانة العلمية فقد ذكر لي أنه هو بطل القصه , أي أنه هو نفسه الجار الذي طلب من اللصوص تفكيك مكيفاته , هذا ما تبين لي من كلام المخاوي الذي أحببت أن ألفت اليه نظر الجميع .

رد: ما أغبى من المخاوي ألا ربعه .
 

يعطيك العافيه ياشيخ منقاش

رد: ما أغبى من المخاوي ألا ربعه .
 

ابو عبدالرحمن , رويعي الكلاب , طارق السعد : اشكركم على ردودكم , والله لا يشتكر للجماعه اللي ما ردوا .
ابو عبدالرحمن : نعم عندي عن المخاوي قصص كثيره بعضها يشيب منها الراس , وبعضها يفطس بالضحك , لكن العلوم أستجد فيها شي .
واللي أستجد أن المخاوي بعد أطلع على الموضوع هاليوم أنقهر لأنه مايبغي أحد يبيح بأسراره كما قال لي في مكالمه جاتني منه على الجوال سب فيها أنصاره في الأستراحه اللي ما وقفوا معه , وسب بلاد ثماله واللي فيها , رديت عليه وقلت ما فيها الا عمال واهلها هجروها وهاجروا منها .
واستمر في السب حتى سب المشرفين خصوصا ابو عبدالرحمن وهنه تحركت الدماء في عروقي وثارت فيه النخوه والحميه وكلت له الصاع صاعين , ومع الزعل أحسب الرجال قريب مني ونسيت أنه على الجوال ولقطت رشاش كنت متوسده ورميت بالجوال من يدي في ماعون كان جنبي مليان بالماء .
ولا أنتبهت ألا وانا واقف واصابعي تضغط على الزناد , بس الله سلم اللي حولي لأن الرشاش ما هو معمر بذخيره حيه ولا فيه ألا فشك .
والغريب أن الفقاقيع أستمرت تطلع من الماء والتلفون في قاع الماعون , والظاهر أنها من غرغرة الماخوذ وهو يلفظ أنفاسه الأخيره , وأن جاكم ظني فالرجال كفيتكم فيه ولا عاد يبي يعرج على الأستراحه .

رد: ما أغبى من المخاوي ألا ربعه .
 

صحيح بأن الكلام عام ولا يخص أحداً بعينه , لكن لابد من معرفة أن لكل حدود يجب أن لا يتعداها
أنا أعتبرها تجاوز وتعدي
فالرجاء إلتزام الحدود وعدم التعدي ولست ملزم بالرد والتداخل معك
هنا حفرنا وهنا دفنا

رد: ما أغبى من المخاوي ألا ربعه .
 

يبن سلمان , لايكون أنك زعلان في صاحبك المخاوي
وأن كنت زعلان فيه أقول لك : ترى لو من وراه غنيمه كان ما بعناه ودفنا جرته , أما أنت فلك قدرك عند منقاش لأنك كنت مراقب , وعند ربعك لأنك راعي فزعه مع الرفيق على ألأجنبي حتى لو كان مخاوي منقاش .
أما اللي أعنيهم فهم يعرفون أنفسهم ولا أتنازل أجيب ذكرهم ..

رد: ما أغبى من المخاوي ألا ربعه .
 

ادخلتم السرور الى قلبي
ادخل الله السرور الى قلوبكم
محبكم صقر قريش يوصي أن تعودوا الى عاداتكم القديمة وكل واحد يربي له كلب حراسة تراها لازالت افضل حارس

رد: ما أغبى من المخاوي ألا ربعه .
 

ابن سلمان/ يازين العقل وانا ودي اقطع منك لحمة صغيرة (من اي مكان يجوز لك) وافتح فتحة صغيررة براس منقاش لعلة يعقل (نطعيم) وانا الان مشغول بتجميع خبرتي بالعمرة والزيارة مثل ماهي اهم المقدسات في مكة والمدينة والمكان الافضل لصلاة التراويح في المدينتين المقدستين وكيف تاخذ عمرة وماذا تلبس للعمرة وماذا تقول عند زيارة البقيع وماذا تتسحر ومتى تمسك ومتى تفطر وتجاربي في مثل هذه الامور سوف اوافيكم بها قريبا واما المكيفات فابشرك اني سويت بهم مقلب لان المكيفات عمرها الافتراضي منتهي