منتديات بلاد ثمالة - العرس بين الماضي والحاضر ...

تداول في الأيام الماضية عبر الوسائل النقالة مقطع صوت من شاعر يتحدث عن طريقة الزواج في ماضي الزمان، حيث فيه من البساطه وقلة التكاليف فكانت القصيدة التي تتكون من واحد وعشرون بيتاً تحدث الشاعر فيها عن الحياة الجميلة في الماضي وبساطتها وقارن في الحاضر وتكلفته..

العرس شكله غير في ماضي الزمان00 تلقى الذبايح بين الأربع والثمان
والقصر بيتً من شعر معزى وضان00 مافيه لا كوشه ولا يوجد سرير
بعد العشاء مافيه طبل وقرقعاه00 الجو هادي والعروس مبرقعه
ما تشرب إلا من صميل ترقعه00 مهدى عليها والحلا تمر ومضير
ما فيه غساله ولا به منشره00 اللبس في شنطة حديد مسكره
داخل غطاها للعروس منظره00 تكحل عليه العين من شأن العشير
شهر العسل بين الغنم وعيالها00 تسرح وفي ظل الشجر مقيالها
والنوم في بيت الشعر يحلالها00 وقت الشتاء والقيض ما غيره مصير
هذي حياة الناس في وقت مضى00 الصبر فيها والعزيمة والرضى
الزاد حنطه والوقود من الغضى00 وليا بغو رحلة على ظهر البعير
واليوم كل اعراسنا ورد وحلى00 غير الذبايح والعصير مشكلا
الخير واجد والجميع مكملا00 تقلط على نصف الخروف بلا خشير
سيارة المعرس عليها زبرقه00 وقلوب حب بالسهوم مخرقة
وليا دخل تسمع صفير وطربقة00 من شأن تسليم السفارة للسفير
البنت تبغى شكلها يشبه (لميس)00 لازم يطابق ذوقها ذوق العريس
والزوج صامت لا حسيس ولا نسيس00 والخافي أعظم والله اعلم بالمصير
هذا زمان العولمة والفرفشة00 حتى البطاطس جاهزة ومقرمشه
بالزيت مقلية وفيها خرفشة00 عشرين كيس ولا شبع منها الصغير
كم طبخةً جتنا لها جيل جديد00 ما ياكل التمره ولا يأكل عصيد
ببسي وصامولي وحاله ما يزيد00 يمشي ورى الموضاة مع سلك الحرير
الله يديم الأمن في أوطاننا00 فظلاً من الله ثم من حكامنا
هذي شريعتنا وهذا شأننا00 والوقت يجري والزمن هذا نذير