منقاش زعلان
 

اتصل علي منقاش قبل يومين وبدون سلام قال اسمع انا معتكف في البيت ولا يمكن اقطع اعتكافي من اجل ان يتسحر مجموعة لا قيمة لهم عندي قلت ابو عبد الرحمن وابا هبه والشيهان لا اعتبار لهم قال وزيادة فقلت انا في المسجد ولا استطيع ان ارد عليك قال ليه مايصلي الا انتم هو الدين عندكم بس وانطلق في كلام لم استطع ان ارد عليه وقطعت المكالمة وها انا اشتكيه لديكم فما الحل ؟

رد: منقاش زعلان
 

بلشنا معك يا مخاوي وانت هذا المنقاش ولا يجرح صيامنا الا أنتم
لكن الحل عندي وأنا أبو نهدي
ما معنا إلا سياسة الكياد وعلى ما يقولوا الكايد أحلى
اليوم اللي تبي تقصده أنت والمسمين وأنا في ساقتكم وعلى الفطور وبنية السحور وتبغتونه في بيته فإن كان راعي سفطان راح يهلي ويحيي وإن كان كاره ماله فيها إلا كسرة عين تدخلون وتنادون على أم العيال وهي والله اللي تبي تفطركم وتعشيكم وتسحركم وعينه ما فيها إلا ملح أبيض .

رد: منقاش زعلان
 

السحور يامدهش مايجرح الصوم وجنا نبي اللي مربطة شياطينهم وانت شايفك لازلت شريي ومنقاش انهكه الصوم فابو عبد الرحمن يكفينا شرة 0 وفكرة انك بساقتنا ممتازة بس برطم على برطم لو تشوفنا مربطين

رد: منقاش زعلان
 

برطم على برطم
هذه براطم بن سلمان وش جابها في الموضوع
أخلصوا علينا ما قعد على العيد إلا أيام لا تقعدون خلونا ندهم الرجال وإلا نعود على أبو عبدالرحمن ترى عودة قريبة من أم العراد .

رد: منقاش زعلان
 

هذي والله البلشه , وهي الضيافه غصب وبخشم البندق ؟.
لا تجوني ولا أجيكم , ويا نحله لا تقرصيني ولا أبغي لك عسل
يا ناس أنا داخل عليكم تروحون عني في السعه وتخلوني في حالي , روحوا عني بعيد في أرض الله الواسعه . واللي فيكم مضطر ويبغي سحور والا فطور يروح للجمعيات الخيريه , وتروني في رمضان شري يغلب على خيري , واللي يبي يرمل مرته اللي مستعبدته وييتم أطفاله يكتب وصيته ويجيني عند باب بيتي .

رد: منقاش زعلان
 

يا هوه ما هي معقوله
الرجال يحب يهوش معاكم ويضحك
هذا الشيخ الشريف الكريم منقاش للي ما يعرفه
هذه ينوخها وعقرها عند الباب ... ولا يهمه إلا وين يودي دمها ؟
يقول لي رجال ثقة إنه شاف منقاش من يومين شاري له قدر يقول يمكن يشيل 40- 60 لتر والظاهر إنه للشربه اللي محتزيكم بها .

رد: منقاش زعلان
 

يبن سلمان , القدر اللي قال لك عليه الثقه صدق فيه , وكنت شاريه حتى نطبخ فيه شعير لحماري لأن سنونه تقلعت مع الكبر ولا عاد يقدر يقضم الشعير جاف كما يوم كان في عز شبابه .
أما كرم الشيخ الشريف الدكتور منقاش فهو كرم حاتمي ولا يحتاج لواحد يزكيه والا يجربه , لكنه كرم في مكانه وزمانه , يعني كل لحيه عندي لها مقص , ولحية المخاوي أصرمها بالمحش واضرم بها حماري واللي زعلان يشرب من البحر .
الزبده : اللي يبي يضيف المخاوي منكم يحول بيته دار عجزه ويستضويه في داره , أما أنا ماله عندي الا القنا وحد السيف الهندواني هو واللي يجيني في ساقته , ولكم عليه لا أحول البرحه اللي قدام بيتي لميدان معركه يسجلها التاريخ وتدخله من أبوابه الضيقه والوسيعه , ومن قتل دون بيته فهو شهيد .
أنتبهوا ترونها وصلت حتى كيس التنباك .

رد: منقاش زعلان
 

أوصيك بحمارك خير ففي كل كبد رطبه أجر
أما الفطور فهو في ظهرك بغيت وإلا ما بغيت والله لأن قاله الله ثم نوى المخاوي فما عنك محوال
والاعوج أعوج وإلا يا بعيد البخت ما سألت نفسك كيف تكسب ود أبو عبدالرحمن وأنت تبي زيادة نجوم ولأجل نجمة فطر لك عشره فمابالك لو كانت ثلاث نجمات إضافيه كل نجمة تنطح نجمه ويمكن يتبعها شرافة على المنتدى

رد: منقاش زعلان
 

واهني الحمار بك
واللي رزق الحمار منك يرزق المخاوي والشيهان وأبو عبدالرحمن
وكلها في الشهر الفضيل هذا باب أجر

رد: منقاش زعلان
 

لا حول ولا قوة إلا بالله

اش الكلام هذا يا منقاش ..يا نقشه..حتى ابو نقشة كبيرة عليك.

أبشر..أبشر يا المخاوي ..باللي يرضيك...