حسبي الله عليك يبن سلمان
 

يوم الجمعة الماضي ركبت الددسن وحطيت المعاميل والحطب وتوجهت للصمان لئنه مذكور لي ربيع ناهي وفعلا يوم وصلت تخيرت هكالفيضة الي مختلط بها العشب وكان الجو شاعري ويوم تقهويت خذيت الربابة وبديت اجرها وكان الجو غائم فنصبت الخيمه يوم بدت السماء تمطر وانا في قمة الوناسة الا التلفون يرن يالله ضحى خير الا هذا ابن سلمان وارحب به ترحيب عجيب انطلاقا من الجو اللي عايش فيه وقد سالني بمكر ودهاء بباريس؟ قلت اي باريس واي بطيخ بالصمان ومبسوط ومستانس خير؟ قال ابد بس البارح الح علي سؤال وش جابك لمنقاش ووشلون تعرفت عليه؟
قلت الله ينكد على عدوك هذا وقته؟ ارجعتني 50 سنه وجريت زفره سمعها ابن سلمان بدون تلفون 00
قلت اسمع قصة اول لقاء مشؤم 00
هاكالوقت لحقنا في نجدمجاعة عظيمة وكنت شابا في 18 من عمري اتفقت انا وجموعة من ربعي على ان ندور الرزق في ارض الله الواسعة فاتجهت الى مكة شرفها الله ولكن اقامتي لم تطل لان اليمنية يحاربون كل من ينافسهم على الشغل وخاصة انني اشتغلت زمزمي وكنت اشيل 8قرب من نشاط بي مما اغضب رئيس الزمازمة وطلعت اشاعة انني ابصبص ولم اعرف معناها واحسبها مدحة وسالني عمدة حارة اللصوص يقولو انك تبصبص ؟قلت نعم فاخذ العصاء وضرب يها راسي ولو مانحشت كان صارت مشكلة وتذكرت الرسول وقلت مايبغالها الطائف ولما وصلت الطائف رحت لم السوق وجلست يومين ادور شغل وكدت اهلك من الجوع لولا الله تم واحد يبيع معصوب شافني اصفر قال يواد ايش فيك مصفر وبردان قلت لي ثلاث ايام مااكلت فاعطاني ما سد رمقي
وصدفة رايته في الثلاثين عيونه فيها خبث وحركاته سريعة وله ابتسامه صفراء وكان يساوم شايب بخاري على ثلاث قوارير من اجمل مارأيت في حياتي فأشتراها ولما اعطى الرجل الدراهم دمعت عينا البخاري فقلت ليه ياعم قال انها غالية علي ولها ذكرى
قاتل الله الحاجة000
عندها رمقني الشاري بنظرة وقال ويش تقول للرجال تبغى نفسد علي البيعة مانت شايف هالشوحط بيدي فقلت بغضب الشوحط حطة (000) فلما راى العين الحمراء قال تعال توصلي هالقوارير اخاف لو شلتها معي على الحمار تطيح قلت ماعندي مانع بكم قال
الظاهر انك غريب ودوار شغل وانا ابغى اعطيك ثلاث حكم تستفيد منها في حياتك فكرت وقلت يمكن انطباعي عن الرجال خطاء
حطيت القوارير بالزنبيل وشلتها وقال بعد ثلث الطريق اقول وحده ونصف الطريق الثانية والثالثة بعد ما ناصل 0
وبعد ثلث الطريق قلت هات ياعم قال الحكمة الاولى: ان احد قالك ان الجوع احسن من الشبع فلا تصدقه00
قلت في نفسي اصبر لعل في الثانية خير ويمكن الرجال يبي يختبر صبر وتحملي0
ولما انصفنا الطريق قلت هات الثانبة قال :اذا احد قالك ان الماشي اريح من الراكب فلا تصدقة
قلت لامحاله انه اختبار اعصاب فتحمل ياجمل المحامل
وعندما وصلنا البيت قال انزل القوارير قلت بعد الثالثة قال: اذا احد قال لك ان هناك حمال ارخص منك فلا تصدقه
فنظرت فاذا صخرة مستوية فطرحت القوارير عليها وقلت له: اذا قال لك احد ان القوارير لم تتكسر فلا تصدقه0
فصاح صيحة اجتمعت ثمالة عليها كل معه بندقية فلما ارادو ان يبطشو بي قال احد عقلائهم لنسمع المشكلة اولا فلما انهيت القصة وسط ضحك الجميع بدأت علاقتي بمنقاش
تبا لك ابا هبه افسدت علي خلوتي

رد: حسبي الله عليك يبن سلمان
 

من هنا بدا النصب

من ريحتك اللي جايتني مع التلفون

لا يكون أنت صاحب سالفة لو زدت زاد السقا

اليمين وإلا اليسار

لا لا
صدق الدكتور مشعان
يبي لك من يقرأ عليك ويمرخك بزيت زيتون

رد: حسبي الله عليك يبن سلمان
 

ددسن في رمال وكثبان الصمان ؟, وأمطار وجو شاعري وغيوم وبحيرات ؟ , وأظن البحيرات يصب فيها نهيرات ؟.
يالله تحسن لنا وله الخاتمه , ولا تردنا لأرذل العمر .
يا دكتور مشعان أدويتك ما نفعت مع الرجال ابو رشاوي , وأظن التدخل الجراحي أصبح ما منه فكه , وليتك تسوي له عملية أستئصال لسان حتى يخرس ثاني مره ويتدمدم .

رد: حسبي الله عليك يبن سلمان
 

معليش أيها السيد الكريم ـ المخاوي ـ

لا تكدر خاطرك..وكنت اتمنى أن تغلق اتصالك بالعالم الخارجي كليا..

رد: حسبي الله عليك يبن سلمان
 

ابو عبد الرحمن/ لو حسبنا حساب العصافير ما زرعنا حب وانا ماحسبت لهم وانا ماني شيء ماهو بعد هالاوسمه والنجوم وعلى فكرة انا صورت معاها ومليت زوايا بيتي منها ومن شافها قعد يدعيلك عساها في ميازين اعمالك 0

ابن سلمان/ النصب من علامات المسؤلية فهما في علاقة طردية وفعلا الصمان كان عليه مطر يوم الجمعة وهو ربيع ممتاز واذا تبي تطلعون انت والجعيد انا مستعد اوصلكم منهاادلكم على الطريق وعلشان مايتعرضكم احد اي بحماي
اما عيوني فاليسار حمراء واما اليمين فأيضا حمراء والي ولد ابوه يقطعها0
اما فيما يتعلق بالبصبصة فلم ادرك معناها الا بعد حين 0

منقاش /الصمان ياغبي ليست كثبان رمليه بل مثل وحهك تماما حزوم وعرة جدا ددسن ويالله الخراج

رد: حسبي الله عليك يبن سلمان
 

رد: حسبي الله عليك يبن سلمان
 

ماشاء الله تبارك الله .
والحمد لله على سلامتكم يا مخاوي , وموضوع جميل ولكن كما ذكرت لكم سابقا هناك اشخاص ما يعجبهم العجب ولا الصيام في رجب .
عندما يهرف الدكتور مشعان , باضغاث الاحلام ويعترف بذالك يمجدون مقالته ويهتفون لتخريفه , وعندما توردون حقائق عن الصمان وجمال اراضيها يشككون في صحة ذلك .
اخي المخاوي عليك ان تحدث القوم بما يألفونه , والبر والطبيعة البكر لها اهلها .
ولكن لم تحدثنا عن انواع النباتات التي في فياض الصمان ,وهل شاهدت عشب الحندقوق , منتظرين اخبار الرحلات القادمة ولا تنس تغلق التلفونات , حتى تأمن ازعاج المتطفلين سلمت لاخيك ,,,

رد: حسبي الله عليك يبن سلمان
 

تكفى يا حاج إلا هذه
سنواته اللي قضاها في مكة ضيعت كل علوم نجد ولا يغرك بقولة البر وطلعات البر تراها في الصدق حلم أصبح عليه , وإلا أنا أعرفه وبيني وبينك زهم علي مرة وقال يا بن سلمان يوم جيت أصلي الظهر وإليا الشارع حقنا ما فيه شمس وحنا خارجين من الصلاة أسمع جيران المسجد يقولون معنا روف سحاب وشمال الرياض عليه مطر وش رايك أمرك ونطلع البر فقلت تم قال أمرك ما مداني 7 دقايق وهو عند الباب وإلياه جايني في تيرسل قال قوه قلت وين قوه هذه السيارة تبي تودينا البر قال اركب يا رجال العدة حقت البر في الشنطه ومحتزي العلوم السنعة كلها قلت يالله هو يوم ونبي نجربك واركب معه واعمد بنا بعد دوار العويضة الأول وعلى بعد 10 متر من الخط وهو يلبق يمين قلت وش فيك قال هذا المكان طيب قلت وين حنا وين البر قال يارجال قريب نتونس بالملاهي وزحمة الدوار
المهم نزلنا والياه منزل حصير 1 × 1.5 ومنزل شنطة ظنيت المعاميل فيها وجلسنا إلا ومعنا هتان خفيف فقال وش رايك اسوي قهوة قلت انت المعزب والمحترف اليوم قام والياه مطلع من الشنطة كوبين وعلبة فيها أغلفة كابتشينو وسكر قوالب وموية حارة في ترمس وقعد يخلط ويحرك فيها إلا والمطر بدأ ينهمر واليا فزته تقول عنز شافت لها بسم الله
قالوين وين الشراع قلت وش شراعة قال الامبرله جايب معي امبرله قلت نتذرى فيها لو جانا مطر تعرف خويك راعي بر وينومسك قلت عز الله انك تنومس
جاب الامبرله وهو يجي يلز ركبته اليمين في ركبتي اليسار ويقعد رافع الامبرله بيده اليسار ويحرك في قهوته باليمين واليا تعبت يساره اخذها في يمينه .
قال بر قال

رد: حسبي الله عليك يبن سلمان
 

رد: حسبي الله عليك يبن سلمان
 

يا ابن سلمان اسمح لي ما اصدقك في هذه الحكاية .
مع ان شخصا من الربع اياهم خاواني مرة للبر ويوم شاف السحاب والعواصف التي تسبقه , طار عقله وضف نصف اغراضة ونسي بعض اطفاله ولا وقف الا في ام الحمام الله يستر عليه وقام يتصل ارسلوا علي عيالي ارسلوا اغراضي .
ولكن المخاوي ما هو من هذه الطينة الرجل سبع الشمال , وانا اذكر اني رافقته مرة في الطائرة مسافر الى الطائف لوحده وذكر لي انه من ربع منقاش . ونظرتي ما تخيب في الرجال , وخل عنك السواليف انت والدكتور مشعان . قال انه كان في المملكة مع الوليد يوم شاف نار المخاوي . يقول المثل حدث العاقل بما لا يعقل فان صدق فلا عقل له ,.