[POEM="type=2 color=#000000 font="bold large Arial, Helvetica, sans-serif""]زان جو الشّْعْر والمعنى على بالي خطر=بعد ما زال الخطر والخوف والعيش المرير
يستريح الخاطِر وْياخذ من المامضى عبر=واللي مثلي خابر الدنيا واخذ منها الكثير
وان تفكر في زمان فات واعْيَتْه الفِكَرْ=تابع اخبار الديار الطيبه عبر الاثير
عاشقٍ للدار مَرْخصْها ولا عنها قصر=لو وطت رجلينه الرمظا وتكويه الهجير
هيييييه ياحلو الربيع وريح زخَّات المطر=واحتباس الشمس عن وجه الصحاري من عِصَير
لا طلع للشمس نور ولابدا نور القمر=متعة الخاطر دفاة الجو فاليوم المَطِير
تعكس خدود الروابي لون نبتات الزهر=والخزاما والنفل والشيح يكسيها عبير
والدلال مبهره والنار وبيوت الشعر=والفراسة والقنص والبير واخطام البعير والجبال
الخضر من ماطاك إلي مد النظر=يبهج عيوني سناها والهوى والجو غير
من يعيش بجوها عن غيرها غض البصر=لانها اجمل من قصور الحضر وافراش الحرير
علمتني كيف اجيب من القصايد ما ندر=سلوة الجُهاّل والعُقَّال والشيخ الكبير
من خيالي صُغتها معنا تواصيف وعبر=قصة القريه وراويها بحبكتها خبير
خابرٍ بالدار واهل الدار والما والشجر=ماخفى من وصف ديرتنا قليل ولا كثير
كم جبالٍ قِدْ مشيت بروسها منذ الصِّغَر=وكم شعابٍ تعرف اقدامي ونا توي صغير
في شبابي ذقت مر الوقت واصْرُوف الدهر=مفْترشت الزل لين ادميت ظهري بالحصير
إعتبر يا جيل هذا الوقت لا جاك الخبر=كيف كان أجدادنا اللي كانوا اغناهم فقير
كان ما يلقون زاد النار اكثر من شهر=وكان جوع وكان خوف وكان شرٍ مستطير
كان يمشي منهم الرجال وضعه في خطر=كان يسرح في خطر ويعود والموقف خطير
مثل ماقال المثل ماشي على كف القدر=مؤمنٍ بالله راضي بالقدر شرٍ وخير
ماكتب ربي على المخلوق مامنه مفر=واللي ربي كاتبه صاير وغيره ما يصير
نحمد اللي عزنا بالدين من بين البشر=واصطفانا بالرساله ثم زاد الخير خير
يوم تممها بنور البدر في خمسة عشر=فارسٍ دانت له الصحرا ودانت له عسير
لين وحدها وسماها وشهَّد من حضر=قال هذي المملكه عن شرع ربي ما تحير
كان ذاك اليوم يوم الفصل واليوم الاغر=وانكتب للي حضر ميلاد لو عمره قصير
في بلاد بفضل ربي زايلٍ عنها الخطر=فالشمال وفالجنوب وين ما وجهت امير[/POEM]


.

المشاركة الأصلية كتبت بواسطة أبو عبدالرحمن (المشاركة 96874) إبداع ...سنا الهجرة والحمد لله على نعمه الظاهرة والباطنة... فعلا قصيدة لا مناص أن تكون قريبة من قلب كل من يقرأها... صح لسانك

المشاركة الأصلية كتبت بواسطة مشاكس (المشاركة 96885) والله بعد كذه وش نقول الا صح لسانك وسلم بنانك بس فيه دعوه ثانيه أنابدعي وأنت قول آمين ( الله يسهل لك اللبشه وتبلش معه )

المشاركة الأصلية كتبت بواسطة المستشار (المشاركة 96990) صــــــــــــــــــح لســـــــــــــــــانك وبيض الله وجهك على هذي القصيدة الرائعة

المشاركة الأصلية كتبت بواسطة عثمان الثمالي (المشاركة 97244) صح لسانك سناالهجرة وبيض الله وجهك على هذي القصيدة الرائعة الله يعطيك العافيه