منتديات بلاد ثمالة - قصيده الشاعر ناصر بن محمد الفراعنه (( ناقتي يا ناقتي )) في شاعر المليون

ناقتي يـا ناقتـي .. لا ربـاع ولا سديـس

وصليني لابتي مـن ورى هـاك الطعـوس

حايل(ن) رابع سنه من خيار العيس عيـس

خفها لا درهمـت كنـه بالنـار محسـوس

في دجى خالي خلا .. لا حسيس ولا نسيس

تدوخك من شدة البـرد طقطقـة الضـروس

في عيوني يكفخ الطيـر ويطيـح الفريـس

وانتهض جساس من دون خالتـه البسـوس

وفي خفوقي فرخ جنية(ن) يضرس ضريـس

يوم اوردها هجوس(ن) واصدرها هجـوس

ديرتي دار ابن ضاري وابن غثلـم جريـس

ديرة اللي دوجو فـي فيافـي نجـد جـوس

ديرتي يا بنـت شيـخ(ن) ومعدنهـا نفيـس

عيطموس(ن) دونهـا دثرتنـي عيطمـوس

جادل(ن) مطرق جسدها مع الغربي يميـس

طينة(ن) من تربه الخلـد والـدم محمـوس

نقشت خمس(ن) من الخمس في ليل الخميس

ليـت شعـري مـا ارادت بهـذا دختنـوس

كـم تمنـى امعـه مثلهـا فتنـه ابلـيـس

كان يمكن قد قلـب نصـف امتنـا مجـوس

كن دماث الصدر منهـا كنيسـه او كنيـس

صومعة رهبان ديـن(ن) يـؤدون الطقـوس

آتقـوس مـع تقـوس نواهدهـا واقـيـس

قبتين(ن) قاب قوسين قوس(ن) جنب قـوس

خصرها يحكي لنـا واقـع القـوم التعيـس

وردفها عن غطرسة بـوش يعطينـا دروس

من رغـم قصرهـا مـا يجالسهـا جليـس

تصبح اطول نسوه الارض في وضع الجلوس

العروسه ماتبي غير ابـو تركـي عريـس

العروسه نجـد ماهـي بحيـا الله عـروس

نجد بنت المجـد ونسـة مونسـة الونيـس

ما عسفها الا معزي ضحـى يـوم العبـوس

كل اهل نجد(ن) هلي من آجا حتى الخميـس

في ذراهم بلتجـي عـن مقففـة الرسـوس

وعيشتي ما بين اسود(ن) ولا ماني رئيـس

خير من كوني رئيس(ن) على شلقه تيـوس

وليس عيب ان خدعني بمكـره كـل هيـس

لأن ما يفهـم بطبـع الهيـوس الا الهيـوس

مصطفى فـي مأدبـه عمـه البابـا لويـس

كبر اللقمه تحت ضـوء حمـراء الكـؤوس

وطسم حدتها على حائـط المبكـى جديـس

يوم شقـت ثوبهـا بنـت عفـار الشمـوس

سيده هـاك القصـر اسمهـا الاول لميـس

دونها سمر الحناجـر بترهـا حـد مـوس

قسقست لأحرارهم قيس قيـس قيـس قيـس

والبستهـم مـن مهانتهـم انـواع اللبـوس

بين خدعه كعب أخيل(ن) ومولـد ادوريـس

درسونـا الالـه والمـدرس هـو مـروس

ويش لاقو من قناه السويس اهـل السويـس

وويش لاقو مـن تلمسـان قـوم منسنـوس

كلهم من شـدة الجـوع راحـو خندريـس

بين غيبوبه مخدر وصحـوه عـرق سـوس

ثورة(ن) راحو سببهـا بتـوع الاوتوبيـس

وش نبي فيها وهي مـا تهـز الا الغـروس

آفه المرء اثنتان .. إلف كاس وحـب كيـس

والنفوس اليا بغيـت تعرفهـا ارم الفلـوس

ينكشف زيف الشعارات لا حمـي الوطيـس

ترجع الاذناب اذناب وتبقى الرؤوس رؤوس

صدق لا قال العرب ما يحوص الا الخسيس

ولا يوطي الرؤوس شي مثل ضعف النفوس

ناقتـي يـا ناقتـي لا ربـاع ولا سديـس

وصليني لابتي مـن ورى هـاك الطعـوس