منتديات بلاد ثمالة - منقاش مع الديناصورات /الحلقة الرابعه .

تذكرون في الحلقة اللي راحت هوشتي(ثورتي) اللي كان لها نتايج مفزعه , وتذكرون العاهات اللي سببها منقاش للخبير , ولا أظنكم نسيتوا أني كنت غلطان وخصمي كان على حق لكن يا حسره متى عرفت , وبعد أيش ؟ , بعد خراب روما ؟, والا بعد المسكه المخلبيه اللي قضت على الضحيه وحولته يا دافع البلا خرنثى لا ذكر ولا أنثى ؟ .
نعود لحلقتنا واقول : في فترة عقوبة السجن قابلت رجال عارفه من كبار عراف الناصورات أسمه تيس القراره ,,, سعلت التيس عن سبب سجنه وذكر لي أنه مسجون في قضية طلح وما طلح ( يعني مع غلا المعيشه قطع طلحه يبي يبيع حطبها ويقضي بثمنها شوية رز لورعانه لكن العداله أعتبرتها جريمه لا تغتفر وسجنته وخلت عياله بالطوى ورا باب بيته ) , ما علينا من قضيته وخلونا في قضيتنا .
المهم سولفت أنا وتيس القراره في مصيبة الناصورات وقال شوف يبو نقشه : تراك حمش شويه واستعجلت (الله بس يهديك) على الخبير اللي قبلي وعوقته وشليت عضو كان منتج وفعال في المجتمع السعودي الكريم , وليتك تحليت برجاحة العقل والحلم المعهوده فيك وخليت المسكين على الأقل حتى يكمل لك السالفه وتعرف خاتمتها معه , يعني الكلام اللي قاله لك كان صحيح لكن فيه كلام غيره ما قاله لك محتمل يحدث قبله .
قاطعته وقلت : يا دافع البلا ,, وهو ناقص على البشر زيادة مشاكل غير فناء النواصير ؟, رد عليه وقال : مرجح أن الكارثه اللي قالها لك (الخبيرالمعوق) عن فناء النواصير ومحنة البشر يبي يسبقها محن وكوارث ثانيه سببها التعارك بين بني آدم على عيشة الناصورات ,,, فتنه بين البشر اللي تسلحوا حتى أسنانهم بسلاح كافي يفنيهم , ولا قهقرهم (ردهم) عن الفتك ببعضهم في الماضي الا توازن الرعب ,, يعني أنهم ايقنوا أن الحرب تبي تفني الطرفين المتحاربين ولا تبقى منهم أحد يفرح بغنيمه ولا ينتشي بنصر ..
ولا تنسى يبو نقشه أنه حدث في التاريخ حروب ودمار من أجل النواصير بالرغم أنها كانت يومها قليله وعيشتها وفيره أكثر من اليوم وباكر بكثير , ولا هو بعيد أن التاريخ يعيد نفسه , وخذ عبره ومثل من اليابان في الحرب العالميه الثانيه يوم منعتها أمريكا من أخذ ضرمة نواصيرها من مستعمرتها نوسيا (أندنوسيا) وردت عليها اليابان بضربة لبيرل هاربر ثم تحاربوا حرب ضروس راح فيها ألألوف المؤلفه من الضحايا اكثرهم من الأطفال والنساء والأبرياء اللي ما عمرهم رفعوا السلاح في وجه أحد , وختمها المريكان بتدمير مدينة هيروشيما ونغازاكي بمن فيها بالسلاح النووي .
وخذ مثال ثاني وهو أن حياة هتلر ما كان غبي حتى يتهور ويفتح جبهه ثانيه في الشرق مع السوفيت ويبعثر مجهوده الحربي لكن جوع نواصيره أوجبه يركب الأسنه ويهجم في أتجاه الشرق وفي شدة البرد على أمل أنه يصل بسرعه ويستولي على بترول الروس حتى يسقي ويطعم نواصيره , وكان خيار صعب لكن أرغمه على الضر أضر منه يوم ما لقي بديل يشبع منه نواصيره والنهايه أن فشل هالمحاوله كانت هي السبب الأكبر في أنكسار جيوشه وهزيمته .
وخذ مثال قريب في الزمان والمكان وهو غزو المريكان والبريطانيين للعراق اللي كان واحد من أسبابه حماية أسرائيل , لكن سبب الغزو الأهم كان الأستيلاء على بترول العراق واحتياطيه الكبير من أجل نواصير الغرب وانتقام من حياة صدام اللي يوم من الأيام أمم البترول وطيره من يدي شركاتهم وبعدها باع بترول بلده بعمله غير الدولار وبالسعر المناسب , لأجل كذه صروها له وأنتقموا منه حتى يوصلون رساله لغيره من أمثاله يقولون فيها : أنتبهوا ترون عيشة النواصير ما نلعب فيها والمعصعص منكم نبي نكسر عصعصه.
يا منقاش المداحسه والمناحسه في كثير من بقاع العالم والمشاكل اللي في أمريكا الجنوبيه ووسط آسيا وأفريقيه عامه والسودان وتشاد والخليج خاصه سببها المنافسه والمغافصه على عيشة الناصورات , يا منقاش أغلب التوتر اللي بين هوامير الدول في عالم اليوم أهم أسبابه ضرمة النواصير ومعها نخبشة وبربسة بني صهيون اللي ما عمرها وقفت .
وبأختصار النواصير في تزايد كبير وسريع لكن عيشتها في تناقص مستمر, واهل النواصير من صوانيه ومريكان وفرنسين وبريطانيين واستراليين وطليان وهنود وغيرهم متنرفزين ويتدافعون بجنوبهم وينظمون في صفوفهم والتحالفات فيما بينهم ويتمرنون على الدمار لبعضهم ويتمركزون بقواعدهم هنه وهناك والأصابع على الزناد والأسلحه والعيون مصوبه على الأهداف تحسب ليوم الله الله أذا قبست بينهم .
يا بو نقشه التوتر اليوم أصبح تحصيل حاصل بسبب المنافسه على ضرمة النواصير لكن الشيطان حريص نعوذ بالله منه ولا هو مستبعد أن التوتر يخرج في يوم من الأيام عن السيطره ويتحول لحروب أقليميه أو حرب عالميه تاكل الأخضر واليابس .
ختمتها معه وقلت : هذا مستقبل كالح يا تيس القراره ولا ودي أحد يفكرني أو يذكرني أياه , وبمناسبة علومك هذي أظن اللي مثلي ماسك حماره بخطامه أحسن يجود في حماره قبل تعود البشريه تدور الحمير ولا تلقاها ,, جاوبني وقال : صدقت والكذاب اللي يقول كلام غير كلامك يا منقاش حتى لو كان مخاويك النماك والا غيره من الناس اللي تعرف أنفسها ولا فيه داعي نذكرها ,,, وسلامتكم ....