[POEM="type=2 bkcolor=#000000 color=#CCCCCC font="bold large Tahoma, Verdana, Arial, Helvetica, sans-serif""]يصعب تعاندني الأيام وارخي لها=واطرب من مجاملتها فالعمر ليله
أشرب مشاريب قهوتها وابي هيلها=دايم وانا اللي لها تزحف فناحيله
أصب من كيفها واسقي رجاجيلها=وارغب حلاها واخلي المر ما جيله
راكب رحاها ومقيالي مظاليها=وارقب عقارب زمنها من غرابيله
أصعب من الصعب قسوتها وتحميلها=وانسب مشاويرها بالليل تعسيله
ياطيبها يوم تصفي لي وانا اصفي لها=ويا ثقلها يوم تركي لي على ميله
جربتها في حلاها في غرابيلها=وان قلت ما خذت منها ... خذت تدبيله
من جورها من رخاها من بهاذيلها=حتى اسود الراس سوت فيه تتبيله
سبحان من عدها واحصى تفاصيلها=واقتص منها لكل انسان تفصيله
ننساق مع زخرف الدنيا وتطبيلها=ونفوق من بعد لا قوة ولا حيله
دنيا الفنا لو بدت تومي بمنديلها=دروبها كل درب وفيه تحويله
باقدام الايام رجل العمر تمشي لها=واعلان نقطة وصول العبد ترحيله
أما متى وقتها ؟ نرجع لتسجيلها.!=ربي أمر .. قبل ما نولد بتسجيله
لحظة تحول ذكرها الله. وتبديلها=إعجاز ربي تحدابه في تنزيله
يالعبد نقطتك هذي وش معبي لها=جهزت زادك لها وازددت في كيله؟
والا ان طول الأمل نساك تحليلها=حتى حساب الزمن تحذف مجاهيله[/POEM]