مادمت أنا حي ( ن ) ومادمت في خير = أبشر ويبشر خاطرك بالسعاده
أوعدك مايحصل على القلب تغيير = أرقد وآمن فوق أكبر وساده
سمعتم الموجز بـبـيتين تقرير = وأسمع لشرحه سيداتي وساده
رسالة(ن ) أصوغها للغنادير = مكمله عن كل نقص وزياده
مفادها مات المراسل بتفجير = وأعلنت فرحت خاطري مع حداده
وتقدمت عيني بشكوات تزوير = لمجلس الشورى على غير عاده
كيف القمر ضاوي ومعنى قمر غير = منه الحلا والزين ياخذ مراده
فيها من أحلام الطفوله تباشير = من جيدها تنطق هذيك القلاده
أعلن ملكنا بالخطابات ويشير = ممنوع للمرأه تولي القياده
وهي تقود القلب من غير تقدير = الله يستر من توالي عناده
لي رحلت( ن )فيها كما رحلت الطير =اطير من غصن الغرام لوداده
واقطف من ورود الخزاما تعابير = أبنيبها بيت القصيد وعماده
واسج مع فكري واقضي مشاوير = إلين تصبح نار ليلي رماده
وتبقى عيوني للثريا مساهير= ويعاف جفني لذه( ن ) من رقاده
وتشد قيفاني لفكري طوابير = عد البروق إن كان تحصي عداده
وتسجل أقلامي قواميس تحرير = يعجز طبيب النقد في إنتقاده
من طيب المقنى يراعي المغاتير= عطني السبوق إلي توثق شداده
ابقهر العذال وارضي الجماهير = وافوز بالغالي بليا إعاده
وأخلد الذكرى بأحلا التصاوير = والقاف فالتصوير يوصل إفاده
ويبقى الوعد مادمت حي ( ن ) وفي خير = ابشر ويبشر خاطرك بالسعاده
ماهر عبد المعين حماد العلياني =

صح لسااااااااااااااااااااااااك يا ماهر

مبدع ما شاء الله عليك
وشاعر ما فيك حيله