منتديات بلاد ثمالة - أبغي رايكم في مشكلة الفاس والراس ؟؟(الجلسه ألأولى).

منتديات بلاد ثمالة (http://www.thomala.com/vb/index.php)

- منتدى الحوار والنقاش (http://www.thomala.com/vb/forumdisplay.php?f=32)

أبغي رايكم في مشكلة الفاس والراس ؟؟(الجلسه ألأولى).

بسم الله الرحمن الرحيم
سلام عليكم يا تالي ربعي , ومبروك عليكم عشر الشهر وليلة القدر , وبعدها أثني عليكم بالتبريك بقدوم عيد الفطر , وبعد :
في ليله من ليالي هالشهر الكريم , كنا نتسامر في ضيافة حليفي ساري الليل , وحضر سمرتنا مكاوي الشيخ وابن ابي محمد والرويعي وابو شرين وحاضر نفسه وبايعها بقرشين , وكم واحد غيرهم من كمال ربعنا وأعضاء منتدانا .
علم لنا معزبنا بعلوم كثيره طلع فيها ونزل وخفض فيها ورفع وأكثر في ذكر بعضها حتى سمعناه يقول , وفي نهاية المطاف لا بد يا ربعي أن الفاس تبي تقع في وسط الراس , وهذي هي الطامه .
كنت أستجمع أطرافي واهجر متكايه واستقعد حتى أستويت في مقعدي , ثم أعتزيت وقلت :
أني أبو نقشه اللي يورد القول الفعل ,, ويا ربي أني داخل عليك يا دافع البلا ,, ويا ساري فاولنا خير , وعلم لنا ويش هي الفاس ؟, وقل لنا من هو الراس؟؟.
ألتفت معزبنا (ساري) ناحيتي والجد كاسي كل ملامح وجهه ومعتلي جميع نبرات صوته وقال , الراس هو روسنا كلنا يا أهل القريه , عربنا على عجمنا , نسواننا على رجالنا , سودنا على بيضنا , فقرانا وأغنياءنا.
كلنا يا أهل هالقرية اللي أسمها الكره ألأرضيه , يعني أنها موس تبي تعم على كل الروس , والسعال (اليوم)بعد أكتملت وانتظمت حلقات المشكله في سلسلتها ماهو , هي تبي تقع الفاس في الراس والا لا ؟؟ , لأن وقوعها أصبح في حكم المؤكد , وأنما السعال هو متى تبي تقع ؟؟, وويش مقدار الضرر اللي تبي تخلفه ؟؟...
زادت دهشتي , وزاد ذعري ذعرا على ذعر بعد عرفت أن الكلام جد , والخطر داهم والطامه عامه , وزاد فضولي وولعي بباقي العلوم بعد عرفت الروس وغاب عني معاني الفوس اللي تبي تصيب كل الروس .
ظنيت في أول وهله أن ساري عنى بالفوس نيازك تبي تضرب الكره ألأرضيه , أو عنى بها قرب مجي كويكب العذاب , أو مجي الدخان , أو ثورة بركان يلوستون العظيم , أو أنفلات حرب كونيه نوويه , أو أكتشاف ميلاد المسيح المسخ في أصفهان , أو أكتشاف سد يأجوج وماجوج ..
لكني فيما بعد عرفت أني كنت ساري في وادي , ومعزبنا (ساري الليل) ماشي في وادي ثاني ..
وهالحين بعد عرفتم الروس , خلوكم على رسلكم ووسعوا خطركم , لأنكم تبون تحتاجون لعدة جلسات حتى تلمون بالمشكله من أطرافها وتقدرون تناقشونها وتبدون رايكم فيها.
عدة جلسات تستمعون فيها لسعالات الشيخ ابو نقشه وأجوبة معزبنا ساري الليل , وفي النهايه رايحين تعرفون الفاس وتحطون اليد على متن قلة الراس ,وبعدها أن كان لكم راي في الفاس اللي تبي تدمي الراس هاتوه مشكورين .
واحب ألفت أنتباهكم من البدايه وأقول لكم , لا تخوفون من المقبل عليكم من الموضوع , ولا تخوفون من أمكانية جركم وأقحامكم في أحاديث تجهلونها ولا ترغبون الخوض فيها , ترون الموضوع ما فيه محاذير من الكتابه عنه , لأن صاحبكم مجنون وصاحي لحوايجه , وصاحي أكثر لحوايجكم وحاجتكم لمنتداكم ....
والمهم هو التفاعل من جانبكم وكيل المديح تلو المديح لسماحتنا , لأنكم أذا بخلتم علينا بالمدايح نبي نبخل عليكم بالمعلومات ونوقف الجلسات , ووقتها يمكن تجيكم الفاس على غفله منكم على متن الراس ..
هذي هي أشتراطاتنا , وهذا هو اللي يلزمكم , وموعدنا معكم الجلسه الثانيه أن تمشيتم بما أشترطنا عليكم , وبذلك أذنا لمن يشهد والله خير الشاهدين ...