منتديات بلاد ثمالة - علامه ماتكتشفها المراية

http://www.thomala.com/upp/upfiles/aXM32211.gif

ماكل من يسمع من الناس ينقال .
أشكل كلام الناس مثل الدعايه
أسلم ودع تسلم من القيل والقال
لوقلت كلمه طوروها حكايه
السر خله من ورى سبعة اقفال
وراقب مفاتيح الضمير بعنايه
لاتحسن الظنات في كل الأحوال
خلك حريص ولاتسوي سوايه
ماكنت افرق بين طيب وبطال
حتى جمعت من التجارب كفايه
ورتني الأيام في كل إنسان
علامه ماتكتشفها المرايه
ورتني الايام في الناس عقال
ماتنخدع بين الفتن والوشايه
ورتني الأيام في الناس جهال
دار الزمان ولالهم به درايه
ولقيت في الدنيا تجاريب وأمثال
ميزت فيها صاحبي من عدايه
لقيت بعض الناس صاحب ومحتال
يضحك معي ويسبني في قفايه
ولقيت بعض الناس للهرج نقال
تلقى نقل الهرج عنده هوايه
بعض البشر شيطان في ثوب وعقال
ولاكل شيطان دواه القرايه
هذا دواه البعد لوعشت رحال
حيث الردي فرقاه غاية منايه
دار بها يمسي الفتى خالي البال
ودي بها لوكان مألقى عشايه
وان كان مال الوقت والوقت ميال
اصبر على جرحي وادور ادوايه
واشيل همي في ضميري ولوطال
رجاي في اللي مايخيب رجايه
رب كريم يبدل الحال بالحال
ويطيب جرحي من خلاي بخلايه
وليا زبنت ازبن على طيب الفال
اللي يهلي يوم يسمع ندايه
ارفع مقام النفس عن كل الأنذال
واشوف لي ناس على مستوايه