[poem="type=1 bkcolor=#ccffcc font="bold medium tahoma, verdana, arial, helvetica, sans-serif""]سلامي عد براق يلوح وبالرعد مصحوب=مزونه يوم هلت بالمطر بالسيل مصحوبه
وغني باللحون اللي كما ذوب العسل مجلوب=كما ذوب العسل من شرت المصياف مجلوبه
يقولون الرجال أهل المثل بعض العرب عرقوب=ومن يمشي خطأ في مشيته يكوون عرقوبه
ومن يطلع على قمة جبل يقولون له مهبوب=وديره ما نبت فيها الحيا يقولون مهبوبه
يقولون الجمل وأثر الجمل يبقى سخيف جنوب=وحتى لو هدر لازم يحس الضرب في جنوبه
ولا بعد الهدير إلا الرغى والحنحنه وصعوب=بعد ما كان حلَّال الصعاب يواجه صعوبه
ومن لا يعرف المعروف في الدنيا كثير عيوب=تشوفه يوم يمشي ينحني من كثرة عيوبه
ليا قرَّت موازين الشعر تمشي بدون غصوب=ولن ما قررت ميزانها تمشي ومغصوبه
ومن يقلب موازين الشعر يصبح هو المقلوب=يميل وينقلب حتى ثيابه شبه مقلوبه
أنا أقول الحقيقة والحقيقة سيفنا المسحوب=سيوفٍ من ذهب ومن الجفير الحر مسحوبه
يتوب مسيلم المذكور وإلا لا عساه يتوب=يرد الوجه يم الله ويلقى عنده التوبه[/poem]