[منقاش]

يا رفاقتي أنا رجال جاي أتدخل بطلب من رفيقنا العنكبوت اللي قال قيه يا شيخ منقاش تعال الى عندنا في هالمربط , واحب أذكركم في البدايه أني مطرود ولا أدخل الا قليل بأذن من أبو عبد الرحمن واعود أخرج ,, ويش نسوي بعد جار علينا الزمان ؟ , المثل يقول أذا ما طاعك زمانك طيعه .
نعود لماضوعكم :
ألاوله : المشرفين ما يجوز نملي عليهم شروطنا ونقول يحذفون اللي نبي ويتركون اللي نبي , لالالا , هم يحذفون ويلغون عضوية اللي يرون وجزاهم الله خير اللي يتحملون مشاغباتنا ومشاكلنا وزرايانا وطلايبنا عليهم يالأعضاء , وترون المشرف رجال يخدمنا بنخوه منه حشمه لربعه ولا هو مجبور ولا ياخذ راتب على شغله , والمدير العام يدفع من جيبه ويعطينا من وقته والواجب نعترف بالفضل لأهله .
الثانيه : نحنا أعضاء مثل أعضاء الجسم , واحد مثلا تقول ساق والثاني عرقوب والثالث حاجه على بالي ما أقدر أقولها والرابع ورك والخامس محد والسادس راس لو شلته مات الجسم كله والسابع شعر الراس لا بد له من حلاقه والثامن الأضافير لا بد من تقليمها والتاسع القلب ما يوجبك تزرع بداله ألا مصيبه حمانا الله واياكم , والعاشر عضروط ما تحبه لكن ما تقدر تقعد الا به , يعني العضو الفاسد نبتره والضروري والصالح نستبقيه , والفاسد اللي يخطي والصالح العضو اللي ما يخطي ومشاركاته مفيده مثلي , والعضو القديم له درجه على العضو الجديد .
الثالثه : الشعار مثل حسن عابد ما يمكن تقارنهم بعضو مثل منقاش والا رويعي الكلاب والا غيرهم , لالالالا , الشاعر اللي ما يزل على خوياه أذا زل عليه عضو عادي نعطي به الباب ونستبقي الشاعر , واذا كان شاعر ومؤسس مثل حسن يغلي أكثر , واذا كان مثل ابن سلمان شاعر ومؤسس ومشرف يغلي أكثر واكثر , يعني أصابعك ما هي سوا.
الرابعه : العضو اللي بأسمه الحقيقي مثل الشيخ منقاش المفروض ما أحد يزل عليه , واذا زل عليه أحد تحذف مشاركته والا عضويته حالا ,, قولوا ليش يا شيخ ؟؟, أقول لكم تقارنون واحد متنكر ويرمي الناس من ورى جدار ويشرد مثل الحرامي برجال بادي لكم بوجهه وجاهه ومسجل باسمه ,, لالالا , ما يمكن المساواة بينهم .
الرابعه : اللي معه الحق سيد السادات يغلب خصمه حتى لو كان منقاش بجلالة قدره , صاحب الحق محشوم ويجلس في صدر المجلس , فمثلا لو أخطا عليه مخاوي منقاش نطرد مخاوي منقاش طردة يهودي من فلسطين ونسلم منقاش مفاتيح بيت المقدس .
والختام : أشوف بعضكم ينافق مع العنكبوت ويقول أنه يحبه ,, يا ناس هو فيه عاقل يحب عنكبوت والا عسوده ؟. معقول تحبون فهد والا بس والا صقر ,, أما تحبون عنكبوت فهذي أختلافة عقل ..