[منقاش]

يا اخواني وجمع الرفاقه والعواني , أتركوكم من المخاوي واللي ما عنده حدود , أتركوكم منهم ومن أحلامهم وكثرة أعلامهم وتعالوا للعلم اللي ما هو حلم وهو طلب التصويت منكم بنعم أو لا .
والسالفه أني كنت عصر أمس جالس أتقهوى من الخمره اللي تعرفونها , وبالمناسبه أقول يا مخاوي ترى خمرتنا ماهي مثل خمرتكم أم الكباير , خمرتنا كفتيره كبيره سوداء من السخام وظايعه غطوتها نسوي فيها مقهاتنا على الحطب .
المهم وانا أتقهوى دخل عليه أربعين رجال من أعضاء المنتدى ورموا بثيابهم عليه وتدخلوني أقبل أستلم شرافة المنتدى بدال أبو عبدالرحمن , ورويعي الغنم يستلم الرقابه بدال ابن سلمان , ومخاوي منقاش يستلم قهوجي في المنتدى بدال البنقالي اللي تبي تسفره ادارة المنتدى .
رديت عليهم وقلت يا أخوان أنا رجال حمش واخاف أني أحمش المنتدى واللي فيه , وافكاري تقدميه زياده واخاف عقولكم ما تستوعبها .
لكن ما فيه فايده , أصروا على علمهم ... ويوم شفت أن الموضوع يبي يكبر حليته بحل على القاعده الفقهيه لا ضر ولا ضرار وسددوا وقاربوا ودرأ المفاسد مقدم على جلب المصالح وقلت لهم : شوفوا يا أعضاء كنفيوتر ثماله , أنتم في زمن التيمكراتيه (الديمقراطيه) والشفافيه والتصويت والراي والراي الآخر . ردوا عليه وقالوا بفم واحد : شبيك لبيك وثماله كلها بين أيديك .
قلت لهم : بيض الله وجيهكم وكثر الله من أمثالكم , أنتم أثبتم أنكم مواطنين صالحين وان شاء الله تصلحون على يديه أكثر واكثر ,, والراي أن نحنا نسوي تصويت للأعضاء يجاوبون فيه بنعم والا لا على أستفتاء يقول : هل ترغب في أستلام منقاش والرويعي لمسعولية ابو عبدالرحمن وابن سلمان والمخاوي مكان البنقالي القهوجي حالا وبدون تاخير.
أذا كان الجواب بنعم فهذا الفرج أقترب ويستلم ابو نقشه والرويعي والمخاوي , واذا كان الجواب بلا (لا) فالفرج يبي يتأخر حتى بداية العام الهجري الجاي أن شاء الله ونخلع ابو عبدالرحمن وابن سلمان والبنقالي واستلم أنا والرويعي والمخاوي مسئولياتنا , وسلامتكم .