[منقاش]

يالله اليوم مسا خير , أمسينا وامسى الملك لله , نعوذ بالله من عيال الحرام ومن بنات الحرام .
قبل أرد على التختور مشعان أبي أتعلمكم يا وجيه الرفاقه والعواني عن هالرشان والرعود والمحسه اللي كل عشيه , ويش جاكم منها يالأجواد من أمطار ؟,, وابغي اللي ما جاهم أمطار وديارهم مدهوره وممحله من سنين يتفقدون أنفسهم ويعرفون أنه ما نزل بلاء الا بذنب واكبر ذنب يمنع القطر من السما هو منع الزكاه .
أقول يا قلال الشيمه والخاتمه يا حنشل ياللي ما أنا قايل تفقدوا أنفسكم وزكوا أموالكم واستغفروا ربكم وردوا المظالم على أهلها وتوبوا توبه صادقه وناصحه من قلوبكم واستقيموا على الطريق الصحيح ثم بعدها خذوا لكم كم جلمده واستغيثوا بها عسى الله يقبلها ويتجاوز عني وعنكم .
وبعد هالعلوم أعود على دكتورنا مشعان واقول : المعذره يا دكتور أنا في اليومين اللي راحت مش ولا بد ودخل رزي بصل والرياجيل شالت توقيعي وبالشفاعات والرفاعات ردوه لي بعد تدخل أهل الخير شروايه أنا واياك , وبعد أخذوا تعهد شديدعليه ما عاد أحوم على الشرافه والا أقترب من المشرفين .
واليوم يا يدي فكي حلقي ومن قرصه الداب خاف من الحبل ومستعد أواجه حتى أسرائيل وامريكا الا المشرفين فهم عيوني وتاج راسي واللي يرشهم برشة مويه أرشه برشة دم حتى لو كان أبو زيد الهلالي .
وان كنت رجال حكيم فخلي أخبث ما منك آخر ما منك وادخل الأستراحه بهدوء واعطي آيات الولاء والطاعه أول لشيخها الشيخ منقاش ثم كون لك أحلاف وشله ثم أذا نويت الشر أول ما تبتدي بالضعيفين دجاج الأستراحه مثل المخاوي واضرابه ثم حول بعدهم على النطيحه وما أكل السبع وانت طالع ولا تفكر في المواجهه مع المشرفين الا بعد تعتثي في عباد الله يمنه ويسره وتثخن في القتل واذا أنتهيت منهم كلهم مشرفين واعضاء تعال سلم على الشيخ منقاش حتى يسلمك مفاتيح منتديات ثماله اللي لها عندي خمس سنوات ما لقيت كفو أسلمها له .
وقبل أنهي جوابي أبغي أعرف أنت دكتور بيطري حتى أعالج حماري عندك والا دكتور بشري واخليك تخصى لنا كم واحد من اللي على بالي والا من الدكاتره الهراجين اللي على قول أهل الشام لا هيك ولا هيك , وسلامتي أنا واياك ...