[منقاش]

بسم الله ولا حول ولا قوة الا بالله
أصبحنا واصبح الملك لله , يالله تكفينا شر أنفسنا خاصه , وتكفينا شر عيال الحرام وبنات الحرام عامه.
شوفوا يا ثماله : أنا شيخ الأستراحه ولا أحب أخرج منها ألا لغرض لزام واعود لها لأن فيها ورايه حصانيه تلعب بأذيالها ولا يهجدها غير فضيلة فخامة الشيخ الشريف منقاش ,,, لكن يوم شفتكم مفتتنين عند المره والسيارات قلت في نفسي سير عليهم يا شيخ , ويش اللي أنت خسرانه ؟ .
ولأني بدوي ما أقرا ولا أكتب مريت قبل أجيكم على الشيخ ساري الليل وسعلته وفهمت منه السالفه , وهذا أنا جايكم بفحوى كلامه .
واقول شوفوا يا ناس , فتحوا معي عقولكم وقلوبكم قبل عيونكم واصغوا لكلامي
الأوله : أغلب وانتبهوا أنا أقول أغلب ولا أقول كل,, أغلب اللي يطالبون بقيادة المره للسياره يقولون أحيان حق ويبغون من وراه باطل , يعني أنهم يبونها خليطيه غربيه أو شرقيه.
وفي الوقت نفسه أغلب اللي يعارضون الموضوع يحسبون أنهم على حق ,, وقله منهم , أقول قله ما قلت كثره , قله منهم راكب راسه وحاط هالمره المسكينه بين عيونه اللي يتقادح منها الشرار ويدور لكل كتاف والا حبل حتى يلويه على رجليها وايديها وناسي أن الحق أحق أن يتبع .
الثانيه : أذا أختلف قبيلةعلماء المسلمين على شي فتح عيونك ولا تكون أمعه وأعرف أن الموضوع فيه أن وكأن ولكن , وحذاري ثم حذاري أنك تسلم لحيتك وعقلك ودينك لغيرك وتكون مثل اللي أتخذوا أحبارهم ورهبانهم أربابا من دون الله , ومن هذا المختلف عليه بين علما المسلمين قيادة الحرمه للسياره .
الثالثه : من الحرام تحريم ما أحل الله والتسبب في الوقوع في ما حرم الله مثل يوم نحرم السواقه على المره اللي (ما لها من يسوق بها أو يرافقها من محارمها لقضاء ضرورياتها) ونضطرها تركب مع السواق الأجنبي لوحدها , وانتبهوا للي بين القوسين .
الرابعه : ألأصل في السواقه الحل مثل ما قال الغامدي لكنه يوم توسع في الموضوع ربما سحبه الموروث أو التقليد أو المدرسه المنتمي لها لوادي ثاني ودخل في الوساوس وحاسها بعد سنعها للقبله .
الخامسه : أذا كانت المحظورات تباح عند الضرورات كيف نحرم المباحات عند الضرورات ونوقع الناس في الممنوعات شرعا مثل ركوب المره المضطره للخروج مع سايقها الأجنبي , وهنه أنتبهوا ترون الأجنبي هو غير المحرم ؟ .
والجواب أننا من المفروض على الأقل نسمح للمضطر يقضي غرضه بالحلال , ومن الحلال نسمح للمره اللي ما عندها محرم يوصلها لوظيفتها أو للمستشفى أو لمقضاة بيتها وورعانها أنها تسوق سيارتها بشرط أنها ما تعرض نفسها لخلوه غير شرعيه أو تسافر بدون محرم الى آخر الشروط العامه المعروفه .
السادسه : المدرسه اللي بيتك بينه وبينها شارعين والا ثلاثه والسوق المركزي اللي ما يبعد عن بيتك الا خمس دقايق مشي والمستشفى اللي الطريق له آمن ومن المدينه وفيها اللي أنت ساكن بها ويش يوجبك تحرول مرتك ما تساعدك وتركب سيارتها متحشمه ومتغطيه وتقضي غرضها وتعود بيتها بدال ما تستاذن وتخرج من عملك حتى تسوي شي في مقدورها تسويه .
راجع نفسك وأن كان موقفك من منع قيادة المره للسياره مع الضوابط الشرعيه نابع من دينك ولا هو تقليد لغيرك والا عادات أبوك وجدك فقواك الله لأن الله ما يسألك الا عن ما تعلم وتعتقد, وان كان الشغله مع القوم يا شقرا أو لك شيخ طريقه تقلده وتحط نفسك بين يديه يقلبك كما يقلب الدرهم بين كفيه ولا تفكر بدونه فأنتبه لا تكون من اللي نخشى عليهم لا قدر الله أنهم من اللي أتخذوا أحبارهم ورهبانهم أربابابا من دون الله .