[@ بن سلمان @]

ياأبا عبدالله / ياأباعبدالله
أنا بن سلمان / السلام عليكم /كل واحد في مكانه والله ماتقوم
كيف حالكم ؟ مساكم الله بالخير كل باسمه , وشعلومكم , وشعلوم أبوعبدالله والحاضرين , كيف حال أبوعبدالرحمن , وأنت يا بن عزاب كيف حالك , وشحال أبونايف , السياره اللي نكره برا ماكنها لبنداخل, هو مداه يقعد حتى يقوم يقضي حاجته .
الله يكرمك والله يابو عبدالله مالي في القهوه ., إن كان أخضر وإلا نعناع ماهي مشكلة
علومي سلامتكم , الكلام لأبي عبدالله ولا يهون الحاضرين , طال عمرك لا تهون ولا يهون ساري الليل , أنا لاني عايب ولا مدور طلايب , وبعدين أفتك من مخاوي الليل ويطلعلي ساريه , وبيني وبينك لا هم حقين حقوق ولا طلايب , كلهم ما يمشون إلا إذا دلمس الليل وهم يمشون بين الناس بالباطل بملىء بطونهم .ومن يسمعك تقول ساري الليل يقول إنك تذكر رجل من أهل الخير , رجل يخفي صنايع المعروف تحت ظلمة الليل , رجل يذكرنا بمطر الليل إلا أمطر عقب فلا وكلا , أوجابر عثرات الكرام اللي إتخذ الليل ستاراً يتفقد تحته أصحاب الحاجة .

وبعدين ترى طلايب حمى ثماله مع الحشايش تعلمت منها الكثير, ولا تنس إني عايش وسط المعمعه , وهذولا خوال الله يبارك لهم في اللي أخذوه ويبارك لنا في اللي أخذناه , وكل ماصار هو حلم حلمته , تراويت بخير , فيكم من يصلي على رسول الله , اللهم صلي وسلم عليه وعلى اله وصحبه وسلم , وإلياً الوالد ينادي علي سنايدي ياسلمان وأناأقول سم سم , قال وأنت بكرامه كن شعيله ماضوت مع باقي البقر , قلت سم , قال الهمام قبل ما يمسي اللبل ذكرولي اخرماشافوها في راس الصغير ( وللحاضرين الصغير والكبير والحبقه وذلاله , من شعاب حمى ثماله وهي بالترتيب , الصغير مما يلي وادي العمر إالى ذلاله في الحد مع الحشايش والثبته من الثبيتي ) وأنا أخذ ثوبي في فمي وحذياني في باطي وأدرع درب السيارات ومن فوق حوط البرقان ومن عند بير العليا ومن تحت الأخرار ويوم وصلت خليج الأخرار على فم الصغير وربا أصغر بناتي تطب في بطني وإلياني قاطع حلمي , وأنا أتعوذبالله وأنفث عن يساري ثلاث وأطلب لي ماء وأشربه , وفي بالي هالحلم لين لقيت مخاوى الليل وهم يذكرونه في تفسير الحلوم , وأنا أروي له الحلم من هنا وهو يتنحنح من هنا ويسألني إذا لبوي أملاك غير اللي يعرفها هو قلت أبد , قال وأمك الله يغفر لها ويرحمها قلت ركيب عند خوالها واثرتهم الله يغفر لها ويرحمها وباعته عليهم ,قال أبوك غاصبها ؟ قلت أبد الله يحفظه ماخبرته يغصب عليها وإثر الخبيث يبي يشبها بيني وبين أبوي وهو يقول البقره اللي في الحلم هو حلال أمك الله يرحمها , وحمى الصغير دليل يرمز إلى إنه في أعلى الوادي , وخليج الاخرار هو عورش ودربها مما يلي حلال أمك الله يرحمها , أقفيت عنه وأنا أقلبها يمين ويسار , والشيطان يقولي الحق حقك , ويومهاأنت كنت صغير وبمكن باعوها تحت الحاجه , ويجي ساري الليل و يقول من قتل دون حقه شهيد , ومن قال إنه حقي وهم دافعين حقه في وقتها ,وبينهم أوراق وكتبيه, إلا أقول صاخ الشيطان وحقي يحفظه الله لي ويكفله بقناعتي وما ملكت يميني .
وسلامتكم يالحاضرين , والوقت تأخر ماودكم تسرون ؟

أبا عبدالله / معذرة , وياكثر قرقي , هي فكرة في راسي أتمنى وصولها حتى ولو جانبها الصواب
والسلام عليكم ورحمة الله وبركاته