[منقاش]

لا أله الا الله , أمسينا وامسى الملك لله , يالله تكفينا شر عيال الحرام وبنات الحرام وشر عيال الحلال وبنات الحلال .
يخواني أنا أفكر في الناس واحد بقاروره وواحد بقارورتين وواحد عنده ثلث درزن من القوارير وواحد مسيكين ما عنده شي غير وسادتين واحده يتوسدها والثانيه يحطها جنبه وهو راقد ويرمي عليها واحده من رجليه ,,, وهذا ما هو حسد لأني أعرف أن الرزاق في السما والحساد في الأرض , واعرف أن فيه رجال مثل المخاوي وشبلي وزملوق والشيهان ذرقان ولا هم كفو ولا لنص قاروره لأن الرجال منهم على قول المكاويه يسكر من زبيبه وتذرقه الوليه.
وعلى ذكر القوارير , كنا زمان أذا هبطنا الطايف نشتري لمسارجنا قاز في قاروره والا قارورتين الواحده منها بكبر قارورة الببسي اللي يبيعونها اليوم بريال , واذا نوينا المصدار من السوق ربطنا القاروره في البردعه من ورا حتى تظلي تدلدل يمين والا يسار ذنب الحمار , وأحيان أذا بغينا الحمير تحث مشيها ونحنا ركوب عليها نعطيها مطرق والا مطرقين على مواخيره ناسين القوارير اللي تكسر من ضرب الجرد ونضوي يد ورا ويد قدام بدون قاز وتبقى سرجنا طافيه .