[منقاش]

القروش ولعبة الفقاعه / الحلقه الأولى . القروش ولعبة الفقاعه / الحلقه الأولى . القروش ولعبة الفقاعه / الحلقه الأولى . القروش ولعبة الفقاعه / الحلقه الأولى . القروش ولعبة الفقاعه / الحلقه الأولى .

بسم الله الرحمن الرحيم
يا كم نحنا مغفلين , ويا كم نحنا قطعان بشريه أذا تركت حبل الله المتين تلوت عليها الحبال وكثرت بينها المنخنقه , أو ضلت وكثر فيها النطيحه والمترديه والموقوذه وما أكل السبع .
نعم الناس مغفله كلها , في أرض المريكان وأرض الطليان , وارض الفرانسه وارض العربان الجربان , الجميع مغفل بدون أستثناء , مغفلين مره ومرتين وثلاث أن ما كانت عشرات المرات ولا يستوعبون الدروس وخصوصا في دنيا المال اللي نحبه حبا جما, المال اللي أصبحت أحابيل سلبه في زمانكم مثل ألعاب السيرك اللي فيها كل فنون البهلوانيات واشكال الحيل والخداع المخلوطه بشي من الحقيقه .
والحقيقه المره أن الحياة (بما فيها من مال وزينه وتكاثر والا غيرها من مفاتن الدنيا) كلها لعب ولهو ونهايتها ضعف وموت , والحياه الحقيقيه ماتجي الا بعد الموته الثانيه اللي ما بعدها موت , والعجيب أن وقت التاسيس للحياه الحقيقيه هو في حياة اللهو واللعب والتكاثر والزينه والتفاخر اللي أنتم عايشين فيها , الله يجعلني وأياكم ووالدينا وذرياتنا من اللي يفوزون برحمته في الدارين وبجنه عرضها السماوات والأرض .
نعود لعالم القروش والفقاقيع واقول :
حتى تعرفون ويش سدك يا جبل , تعالوا معي لهالسالفه عن أزمة المال العالميه اللي من علو ضجيجها صمت الآذان وحارت الألباب .
والقصه من بدايتها أن مجموعه من الجماعه اللي مغفلين مثلي ومثلكم جوني في ليله من الليالي في حلة منقاش العامره في فرعة ثماله , جوني بعضهم واجم صامت منكس الراس , وبعضهم له نويح وثيابه شليح , والكل منهم يقول : يا شيخ منقاش , ألحقنا أن قدرت , تكفى أنت كبير ثماله ولا كبير بعد الله ألا أنت , وقروشنا شي منها صفى عليه الماء في لعبة بطاقات سوا ولعبة الأسهم , واللي بقي في البنوك نخاف يجيه من صروف الزمان صرف ويروح كما اللي من قبلها راح , وانت بعد الله مزبن لكل من يدخل عليك يا وجه الخير يبو نقشه .
نصيناك طلابة نصيحه وطلابة فزعه , ونسأل ويش تشير به علينا يا شيخ منقاش ؟.
قلت : الله يحيكم ويحي علومكم , لكن ليتكم بدال ترك قروشكم في البنوك حولتوها ذهب وفضه وحطيتوها عندي أمانه في الحفظ والصون (ناوي ألطشها عليهم) , لكن خلوني باكر آخذ القداحي (بندق بارود) واهبط على البنوك , وهي واحده من ثلاث , أما جيتكم بحقكم كله ومعه الغنيمه من اللي ألقاه في البنوك من حقوق غيركم , والا جيتكم بروس مدرا البنوك في واحده من الخياش , والا أستشهدت ووقتها أظنكم ما ترقدون عليها وتتركون ألأخذ بثاري .
مع تباشير الضياء في اليوم الثاني تحفلت بأحسن المصبغات من الثياب وتغرزت بالبعيثران والدوش والريحان , ثم أخذت بندقي على جنبي , وركبت رفيق دربي (حماري) وحودرت مع بلاد ثماله ناصي الطايف وبنوكها أبغي أفترش والتحف من خلق الله حتى أرد على ثماله حقوقها أو أموت دونها .
كتيت وادي جفن وصوتي يلجلج في الأوديه ويتكسر صداه على جنوب الجبال بعذب الطروق وجميل اللحون من الزهم والحدايا والانشاد اللي من طربها يهوي الطير من أعالي السما سكران , ومثلكم ما يخفى عليه أني أذا قاطرت بعض القرى أرفع الصوت شويه .
ويوم وصلت الصخيره ديرة رفيقنا الحجاج ولد حياة يوسف الله يرحمهم عند الحدود التاريخيه بين ثماله الفانيه وبقية بني عمومتها من ثقيف , ألا وانا على ساري الليل على راس ذود من الجماله طالعين في مصدارهم من الطايف ومعهم واحد من عيال عمنا الصهاينه أسمه شلومو ولد مائير .
تعلموني وعلمت لهم بموجز علومي , ثم رد عليه ساري الليل وقال : يا منقاش , أنت ساري في ليل ما فيه مسرى , والأفعى اللي تبغي تقطع راسها والا تبتر ذنبها وتترك راسها بينك وبينها بحور تلاطم في ديار ما هي ديار المسلمين , وبينك وبينها فوت وحياه وموت , أما اللي أنت ناصيهم في الطايف من بنوك والا غيرها تراهم مغفلين مثلكم فيهم النطيحه والموقوذه وما أكل السبع .
لكن يا سبع ثماله , عود دربك معنا يم ربعك وديارك , ويكفي القبيله خسارة قروشها لا تزيد تخسر واحد من كبارها مثلك يا منقاش اللي أن راح ما بقي في القبيله من يسد ماقفه , عود يا منقاش حتى نفهمك أنا وشلومو ولد مائير ويش سدك يا جبل ؟.
وحتى لا أطولها عليكم نتوقف من دون الجبل , خلوكم معي في الحلقات الجايه حتى تعرفون ويش قصة الأزمه الماليه العالميه الحاليه؟ , الأزمه اللي ماهي ألأوله ولا تبي تكون الأخيره , وتعرفون ويش سدك يا جبل ؟ .
خلوكم معي حتى تعرفون من اللي يمسك بخيوط اللعبه , وتعرفون أن عالمكم اليوم عالم مليان بقروش من قروش البحار ما هي من قروش الدراهم , قروش ياكل كبيرها صغيرها بلعبة القروش في محيط المال والأعمال , وسلامتكم ....