[منقاش]

الله يمسيك بالخير يا شيخ سلام أنت وكل القراء
واقول ,أني أبو نقشه اللي يتبع القول الفعل , وأحسك نومستني يا ابن عمي .
ثم أقول الله الله , لا تسأل عن البورده الا بواري مثلي , والبورده والبواردي مشتقه من البارود , وسبق أني فلت لكم أن البواردي والبورده حلت محل الفارس والفروسيه .
نعود لموضوعنا اللي أستفسرت عنه من أبو نقشه , واقول وعلى الله التكلان أن البنادق اللي ذخيرتها من الصفر(الطلقات , وسموها صفر لأنها صفراء) , والصفره تكون من ظرف مليان بالبارور وفي راسه عبرود , واذا أنفجر(أقول أنفجر ولا أقول أشتعل أو أحترق لأن فيه فرق بين ألأنفجار والأشتعال) البارود بواسطة الزناد والنادوس والكبسوله يندفع العبرود مع سبطانة (ماصوره) البندق بدفع ألأنفجار , ويصتدم حالما ينطلق ببروزات حلزونيه لولبيه يسمونها السدود والخدود تجبر العبرود على الدوران في السبطانه طيلة ماهو ماشي فيها .
وبقدر ما تطول السبطانه تكثر السدود والخدود ويزيد دوران العبرود المقذوف وتبعد مسافته , واذا كثر الرمي بالبندق تآكل السدود والخدود وتبتدي البندق تخطي هدفها وتلقاها مره تزم ومره تقصر ومره تلفخ يمنه والا يسره , أو تخطي بمقاس معين يراعيه فيها راميها اللي خبرها .
هذا السلاح ينظف , ومن ضمن تنظيفه مرط السبطانه اللي فيها السدود والخدود .
أما سبطانة (ماسورة) القداحي فلا فيها سدود ولا خدود ومقذوفها تعرفونه , ويعتمد في بعده على عبوة البارود اللي في أسفل الماصوره واللي دكها الرامي بالمشحان قبل يرسل ويدك فوقها الرصاصه , وكان أجداكم يصبون رصاصها ويسوون بارودها في بيوتهم وبأيديهم , وكل اللي يشترونه هو الخفان وقوالب أو سبايك الرصاص ثم يكملون بقية الأنتاج في حلالهم (جمع حله) ويدخل في البارود ماده يسويها الأولين أسمها الملح (بفتح الميم والحاء) ومسحوق فحم نوامي العنب أو العبب بسبب خفتها .
تنظيف السبطانه بعود الشوحط بالطريقه اللي ذكرتها معقوله , والأولين أهل تجربه والمثل يقول أسأل مجرب ولا تسأل طبيب .
هذا في مجال التنظيف , أما أن كان الشوحط يستخدم لتعديل السبطان فهذا أمر ماهو معقول وأستبعده كليا , لكن يظل فيه نسبه مهما كانت ضئيله تخلينا نبقي شي من الشك ونقول ما فيه دخان ألا ووراها نار, وأذا تأكد الخبر من ناس خبروا هذا الشي وقتها نقول أهل مكه أدرى بشعابها وألأولين أدرى بسلاحهم ...