[خوالي ياثماله]

مشكور يالخال بن سلمان

وهذي إضافه لو سمحت لي بها لخلف بن مشعان


الشعر في شرعي فكر .. والفكر بالشرع الاصيل
نهج العقول الناضجه والعاقلين أدرى بها
مو شرط من يكتب شعر يدري عن بحور الخليل
اللي يداوي علتك لا تبلشه بأسبابها
احد(ن) على الحنده حدا .. وحد(ن) على الشله يشيل
كلن على ما يكرب بيوته يمس اطنابها
على سبيل اهل المثل ماني مثل اهل السبيل
اللي معاني حضورها تشبه معاني غيابها
لا غبت جبت وعادتي لا غبت مارجع بالهزيل
ان جبت اجيب اللي محد قبلي بالشعر جابها
تعشقني الفكره بكر .. واسبق لها الوزن الثقيل
اللي بنات افكارهم مبطي رميت حجابها
اهيم في واد الدها واروي حديث السلسبيل
يوم ان غيري جامع(ن) كتب الشعر يقرى بها
ما بالقرايه راية(ن) بيضا ولا منها ذبيل
لا روحت خيل الطرد تبكي على هذابها
بعض المعاني وقعها اشطر من السيف الصقيل
يوم السيوف من الهلع تثقل على قضابها
ناس(ن) على الشعر دخلت والشعر بي منهم دخيل
يقول انا بوجهك عن الهزله وعن كتابها
ومدام صارت تشكي العله من اسباب العليل
قل للجماعه ترمي ثياب(ن) ماهي بثيابها
ماهي بلحيه طشطشه سيل(ن) من العارض يسيل
اسقى جبال المملكه وسهولها وهضابها
فان قيل ابو ظبي ابرقت وعيون اهاليها تخيل
قولو لها عيني لها مبطي ترف اهدابها
مساكم الله بالادب والذوق والشعر الجزيل
من شاعر(ن) صدره يسع مكه ومن يسعى بها
شاعر شمالي وقفته عن لابته تشفي الغليل
يدرى زعلها ويحمى عنها ويخشى عتابها
في ميله عقاله ثقه وبفطرته صبر(ن) جميل
يحسب مسافه صيدته واليا رماها صابها
انا البديل لعمر بن كلثوم لو ماله بديل
لا قامت فحول الشعر تفخر بطيب انسابها
لا المستحيل يردني ولا ابن عم المستحيل
ياما كسرت القاعده واخلفت وجه اعرابها
صدري ليا عليت على واليا استطالت يستطيل
اما استوت لي كلها ولا بلاش اشقا بها
عندي قناعه ظلها وافر ولا لي فيها مقيل
مامشي ورى قالو قبل واعيش في جلبابها
ما من ورى زرع المثل في وقتنا الحاضر حصيل
من طبق امثال العرب هذا الزمن يبلى بها
من ذل لو قالو سلم .. يبقى بنظرتهم ذليل
ما تستوي القمه تحت رجلين منهو هابها
ايه الشجاعه تغلب الكثره وانا اعطيك الدليل
الذيب يدرع بالغنم ولا يحسْب حسابها
جيت بشموخ الوايلي ما جيت من تحت الشليل
ولا ردني عن ساحه الشعار كبر القابها
لو كل من اسمه جميل من العرب يطلع جميل
كان اكثر اسماء العرب تحمل صفات اصحابها
ولاينعم بظل النخيل اللي تحت جذع النخيل
الشمس تصقع هامته حتى يحين غيابها
ولاطولت عمر آدمي قولت عسى عمرك طويل
طول العمار وقصرها رب العباد أدرى بها
رح ردها عني وانا باكبر عواقبها كفيل
كان طلعت كذبه فانا بين العرب كذابها
ان الشجاعه تغلب الكثره وهذا اكبر دليل
الذيب يدرع بالغنم ولا يحسْب حسابها


.........................................



ياكثرهم .. لا قلت لك .. عرفة وجيه
وياقلهم .. لا قلت .. قـدر ومعـزه
رجلٍ .. تعزه بعد ماتلتقـي .. فيـه
ورجلٍ .. قبل ماتلتقي بـه .. تعـزه
ورجلٍ .. ترزه بالمجالـس مباديـه
ورجلٍ .. فلوسه بالمجالـس تـرزه
.. ورجلٍ يموت ولا يجيبون طاريـه
ورجل ٍ .. يجي طاريه في كل حزه
ورجلٍ يهزه .. بعض موقف ويشقيه
ورجلٍ .. مهوب أيّات موقف يهـزه
ورجلٍ .. ضعيف .. ويستفزه معاديه
ورجلٍ .. كلام اعـداه .. مايستفـزه
ورجلٍ .. تلزه يعترف لك بخافيه
ورجلٍ .. على خافيه .. محدٍ يلـزه
ورجلٍ .. يوزونه .. ويزعل بنيخيـه
ورجلٍ .. يزعّل من يحاول ، يـوزه
ورجلٍ .. تكزه لا زم انك توصيه
ورجلٍ .. بليّا ما توصيـه .. كـزه
من لا فرش .. للمرجله ماتغطيه
ومن لايخز .. الناس .. محدٍ يخـزه
ان كنت تعرفني فهي .. عرفة وجيه
مو شرط لك بالقلب قدر .. ومعـزه

..............................................

الوايلي .. والشمري .. والظفيري


ماظن هالليله تعدي على خـــــير
أشوف بعيوني .. شرارٍ يطـيري
جت مدلهمه .. ريح .. برق ومعاصيــر
غطت سمانا .. بالحفر والصفيري
من حدها .. يجنح اليارفرف .. الطــير
ترعد ، وتبرق ، من نوايا ضميـري
تسقي ( النداوي ) حشمتله وتقديــر ؟
وترمي بردها فـــــوق راسٍ كــبــيري
ياهيه .. وينك وين عكف المناقــير ؟؟
لاصرت ماتقدر .. تصيد القــــميــري
تبي تصير .. ولاانت داري وش ايصير
توك على درب المراجل .. صغـيري
أهل الشمال إن جوك .. ماتصبح بخي
من وايلي ، من شمري ، من ظفيري
السالفه ... ماهي بحاجة .. لتبرير
اذا سكتّ .. يجيك .. مليون غيري ..!
يجيك جيش .. من القوافي طوابيـر
قبل تحك الراس .. راســـك يطيــري
الكلمة اللي قلتها دون تفكـــير !!!
عشان تفهم .. منزلقها خطــيري ..!
ترى النخل .. ماثقلته العصافيــر !
لكن يغث الغصن .. كثر الصفيــري

وضحتلك .. هالحين .. والباقي كثير
ماهو حكي .. لاشك ... فعـل ٍ كثيــري

..........................................


من جيت للدنيا وانا ( حظي ) .. مثل عابر طريق
يشّر ، على خط الزمن .. عل الليالي ، تنقله


صابر على مر التعب .. كرمال عينك .. يالرحيق
يطيح صبري ( واشقله ).. وايطيح وارجع واشقله


يضيق صدري ( بالعَجَل ) واقول صدري مايضيق
استثقل اني انهزم .. وآخذ من الهــم ... اثقله


ومع كل هذا .. بسمتي .. مافارقت عين الصديق
واللي يعرقل بسمتي .. أضحك .. عشان اعرقله


ماعرف اكون الا كذا .. صادق ولا احب البريق
مثلي مثل أية بشر .. بالصيف .. يرفع .. منقله


مااحب امثّل مثلهم .. ( شفيئ ) ياراجل ( شفيق )
ولا حب اسوي بالشعر .. حشوة حكي .. ( مستعقله )


اللي اعرف اني اجي .. واشعلل الساحه .. حريق
واني حكيم .. بفطرتي .. واكتب من الشعر .. اعقله


( سطحي ) الى حد السما .. واضح ولا لي بالعميق
اللي تحت قاع البحر .. والموج .. فوقه .. يرقله


ماهمني كثر الفرق .. حولي .. وانا وحدي .. فريق
أحب .. خط المسطره .. واكره .. مسار المنقله


وسلامتكم وصح الله لسان الشاعر خلف