[منقاش]

يا الله صباح خير , أصبحنا وأصبح الملك لله .
يا ربعي فاعل خير رجال طيب , أن ما كان أطيبنا , ودليل طيبته أنه قبل فتره رشح أبو نقشه يكون رجل العام , ومن حسن حظه وحظ المنتدى كله أن كل المصوتين اللي زادوا على الميه ضموا أصواتهم لصوته واختاروني لهذا الشرف اللي أنا أحقكم به بدون منازع .
لكن الغريب أن بعض حساد أبو نقشه مسحوا الموضوع فيما بعد , وخانوا ألأمانه , وهذا يحتاج من مشرفنا العام يعرف ألأيادي الخفيه اللي تلعب في المنتدى من ورا ظهره .
نعود لموضوعنا واقول أنه ما حصل لي الشرف بمعرفة أبو عبدالله معرفه شخصيه , لكن معرفه يذكرني بأصحاب الرسائل الكيديه اللي يذيلها كتابها بفاعل خير , ويذكرني معرفه باللي ينفقون النفقه في خفيه حتى لا تعلم يساره ما أنفقت يمينه , ويبقى مجهول ألا عند ربه , ولا يعرف الناس عنه ألا فاعل خير وبس .
ابو عبدالله هو من الصنف الثاني (يعني المحسنين) , ومع أنه كما ذكرت ألا أنه ضبط متلبس بجريمة التحريض على الشعار اللي تبنيناه (أهدموا المحاجي واقيموا الملاجي) , الشعار اللي أصبح وثيقه ماهي مكتوبه لكنها ملزمه أكثر من المكتوبه , وتدل عند الملتزمين بها على الوعي وتذوق الجمال والتحضر والرحمه وتحمل المسئوليه الدنيويه والأخرويه .
وبعد هالحكي كله , أقول يا ثماله أمامكم واحده من ثنتين :
ألأوله : أعتقد أنه بعد سابقة ترشيح ابو عبدالله لي (لرجل العام) ما عاد يضره أي ذنب يسويه خصوصا أذا كان الموضوع في حدود تقطيع الشجاري الخضر والطلوح اللي سددت علينا الدروب , أو لا قدر الله محاربة خلق من خلق الله من هالطيور والا الوبران المساكين , وظني أنه ما عاد بقي شي حتى الرجل يتورط في هالجريمه النكراء .
الثانيه : تقدرون تعلقون عاني على خامسه أن كان له كبير , وان كان مثل بعض خماس ثماله اللي مالهم شيوخ فنا وانا ابو نقشه شيخ من لا شيخ له , والمذاهب ألأوله ثبت لنا أنها حرام , لكن اللي يقتل واحد من القهد نغرمه يشري عشر من القهادي من حراج المزغديه ويفكها في الديره , واللي يذبح وبر يشري عشره .. الخ .. مع غرامة الف ريال عن كل صيده ندعم بها المنتدى , ومصادرة السلاح والصيده وتسليمها لي , وشكرا .