نعود لموضوعنا واقول ....
سلام عليكم يا مسلمين , وأخص بالسلام كل حلفايه وبعض الرفاقه والعواني , واستثني منهم المخاوي وحلفاه , وبعد :
أكتب لكم وأنا تحت تاثير موضوع الدنفه , وتحت تأثير مقال الشيخ سلام الله يسلمه ويهديه ويعطينا خير مواضيعه كلها ويكفينا شرها أن كان فيها شر, مقاله اللي كتبه لكم تحت هالرابط =
http://thomala.com/vb/showthread.php?t=39472
أقول أكتب لكم والا أنتم تكتبون لي , كلنا في الهوا سوى وفي الحد واحد , ما يهم , أنما المهم أبغيكم تذكرون كدتي اللي سرقها ابو عبدالرحمن , وتذكرون أنه حشمه لحليفي الدكتور مشعان تركت ألأخذ والعطا فيها بعد توسطه في أخماد فتنتها هو والشيخ سلام .
وتذكرون آلالاتي اللي كشفت مكانها , وكيف أن ابو عبدالرحمن ورويعي البساس غدروا بي وراحوا صوروها قبل أصورها وعرضوا عليكم صورها قبل أعرضها , غدر منهم والغدر من شيم الذياب .
لكني هالمره ما أحتاجكم تذكرون , أنا اللي رايح أذكركم بالرغم من تأثري بالدنقه .
أذكركم أني أنا اللي طلبت من ابو عبدالرحمن يخاوني حتى نستكشف الدنقه سوا , وحددت لكم وله المكان والزمان .
والحقيقه أني ما كنت بحاجه لأخوته لكني كنت محتاج لواحد أجري عليه التجارب حتى أعرف أن اللي بين أياديه دنقه أصليه واللي قدامي آدمي مدنوق بحق وحقيق , لكن الرويعي فكر في اللي فكرت فيه , ووسوس لأبو عبدالرحمن وغدروا بي , وأعلنوا أنهم رايحين يستبعدوني من فريق ألأستكشاف .
وبعد أستوعبت آثار صدمة الخيانه , جات ردة فعلي وتذكرت حكمه من حكم عيال العم اليهود (فرق تسد) وقلت في نفسي ألعبوا غيرها ,, ثم بلغتهم أني معذرهم ومتنازل بطيب نفس عن أخوتهم , وأرسلت عليهم واحد مختص في الدنفسه وألاعيب الغدر وهو مخاوي منقاش حتى يفرق شملهم ويزرع الفرقه فيما بينهم (فريق ألأستكشاف).
ما صدق على الله المخاوي أنه يلقى هالتكليف مني حتى يزاول أختصاصه , وراح حالا على جناح السرعه لأبو عبدالرحمن وخش منه بعض التميرات حتى يدنقه , ثم قال :
يا مشرفنا العام العزيز , أنت ما تعرف أن عدوك صاحب صنعتك ؟ , وما تعرف أن الرويعي أصبح مصوراتي ينافسك مثل ابو نقشه ؟, وما تعرف أنه غدار رايح يخليك مختبر يجري عليك التجارب لهالنبته الخبيثه ؟, وما تعرف أن رجال المخدرات يتلمظون ويتمنون يمسكون الشعب كله لا قدر الله وهو مدنق حتى يثبتون أنهم شغالين ؟, , وما أنت عارف أنهم لو مسكوا واحد وهو يشيل في نبتتها والا في حبوبها ما يمسي ليلته ألا بعد يودونه عند ركبة واحد من الشيوخ في المحكمه والكلبشات في أديه ورجليه حتى يصدقون أقواله وينكبونه هو وعياله واللي جابه ؟ .
ثم زاد راح للرويعي وقال له نفس الكلام والا أزود , ولا فارقهم حتى فرق شملهم وزرع الشحناء والبغضاء فيما بينهم , وخلاهم ما عاد يطيقون بعضهم , وشال من روسهم الدنقه وفكرة البحث عنها .
وهذا هو السبب اللي خلى أبو عبدالرحمن بعد دخل الرعب قلبه يعلن في المنتدى عن تخليه عن المشروع ويقول أن ثيابه ما عاد تاسع أحد غيره , ويقول يا يديني فكي حلقي .
الى هالحد نتوقف , وفي المداخله الجايه , يجيكم علوم جديده عن الدنقه بعد أستعيد قوايه العقليه , وشكرا ....