يا حليفي يا دكتور مشعان , ويا حليفي يا شيخ سلام : أسمحوا لي أنتقدكم , واسمحوا لي أقول أذا ما وسعت صدوركم لأنتقادي فانتم ما عندكم ديمقراطيه ولا حريه كلمه ولا احترام للراي والراي الآخر .
والمقصود , أني ملاحظ أنكم مركزين في كلامكم عن النبات على هروج من أيام ما قبل العصور الوسطى , وترددون في كلام أبو حنفيه وابو زيد وولده عبيد من الكلام اللي مكتوب في الورقان من ميات السنين .
يعني , ليه يالنشاما ما تعتمدون على أنفسكم وعلى نتاج فكركم من التجربه العلميه كما يوم أعتمد ابو نقشه عليها في موضوع الحقه والبساس ؟.
ملف مرفق 1082
ملف مرفق 1083
وليش تتركون علوم القبايل وتروحون لهروج الأوايل ؟, وليش ما تجيبون عن البرقوق بعض علومنا مثل يوم يخرص المستمعين في كلام محدثهم , ويرد عليهم ويقول : يا اللحى الغانمه , وراكم تبروقون في علومي ؟, يعني ليش تشككون فيها ؟.
من وين جاء فعل البروقه (تبروقون) ؟.
الجواب : جاء من نبات البروق المخادع اللي يخضر بالديار من أقل وسم ويغادر بسرعه من أول شعاع والا لاهب شمس ؟.
يعني , أذا كان الحيا وما يكسي الأرض من كلا هو البروق فلا تشد له الرحال لأنه كلا وحيا كذاب وخادع يضر الرعيه في بطونها ولا تسمن منه متونها ويهشم ويموت فبل يصل لسنونها , وسلامتكم .