[منقاش]

على هونك يبو عبدالرحمن , ولا يغرك مدايح المادحين , ويقول لك ابو نقشه , ترى ما كل غراء شحمه , ولا تحسب أن هذا المديح من الثلاثه بما فيهم حليفي الدكتور مشعان اللي أبتدت تحوم حوله شكوكي لله وفي الله .
أذا تبغي تعرف السبب جنب عن الشرافه وخليني أستلمها بدالك وتشوف الثلاثه ومعهم ثلاثات وثلاثينات يوم يكيلون لي المديح اللي يسكرني ويسكر معي حماري ويسكر معنا ثماله كلها .
يبو عبدالرحمن الشغله أمسك لي وأقطع لك , وانتبه لي وانتبه لك , وحك ظهري واحك ظهرك , وترى اللي يسبك هو اللي يحبك , والنبته اللي جبتها ما فيها خير , ولا في اللي ما يسبونها , ولو فيها خير كان أمدي حلالنا وحمارنا أكلها , لكنها نبته أكلت الجمال شوك السدر والطلح والسحاه والشكاعه وتركتها ملاله حتى في زمن المجاعه .
ولو أنت جمل مثلي كان تركتها ولا كتبت عنها مثل يوم تركتها الجمال ولا أكلتها.
وأن كنت كفو للتبحثات أنت واصحابك , ابن همام والشيح سلام وحليفي الدكتور مشعان أعطوني جواب , ليش نفرت منها البهايم ولا أكلتها , والا أتركوا التبحثات لبدر الدجى وعرعرة المنتدى ولأمثاله من الناس أهل الباس اللي تجيب العلوم من أقاصيها , وتجبد دلاها وهي ملي , وتروي العطاشا يومها واليوم اللي يلي , واشهدوا على كلامي يا من حضر معي , وشكرا ...