هذي القصيده كتبتها زمان .. يمكن تغني عن اي كلام
يقولون طلع مابصدرك وهد البال
ترى الهم بقلوب الاوادم يعذبها
وأنا قول بعض الهرج يالربع ماينقال
هروج الرجال ابعض الاحيان تنكبها
أنا كنت قبل اليوم من حسبة العقال
عساني بتالي الوقت مرجع واخربها
أنا شفت ناس تخلط الزين بالبطال
بدرب النقد مدري وش اللي محببها
إذا جيت للمسؤول تلقاه (كيف الحال)
تجيله تبي حاجتك.... يحسبك تنهبها
تبي حق من أبسط حقوقك يقول محال
نظام البلد.. ما يسمح انك تفوز ابها
يقلك كذا هذا النظام وبدون جدال
نظام الجماعه بس..... يخدم حبايبها
وإذا جيت له بال (و) .. هذي لها موال
يعدل قوانين النظام ........ ويهذبها
ويجلس ولا همه ولا كن فيه رجال
عرفها طويل العمر بدري وحاسبها
تجي له يقول اهلين ترحيب واستقبال
ولا تطلع الا وانت حاجتك...... جايبها
ولو كنت تبغى حق غيرك لها مدخال
إذا قربوك القوم....... ماشي يغلبها
دقايق بمكتب سيد القوم خذ فنجال
وحاجتك في لحظه.. وعمك مزهبها
وخل اللي مايعرف بسوق الخنا دلال
يشفله كلاب فالشوارع يصاحبها