[منقاش]

الشيح سلام الله يسلمه من كل مكروه : أشكرك على تبليغك لأبو نقشه بمضمون الرساله اللي تزعم أنها وصلتك , وأقول لك الرساله وصلت وتبلغ بها ابو نقشه , لكني ما أخفي عليك أن الفار أبتدا يلعب في سروالي فرب مبلغ أوعى من سامع .
وطالما أن الموضوع فيه سبأ ونبأ ويقين فلي على هالبلاغ عدة ملاحظات :
ألأوله , أن الهدهد يوم بلغ سليمان عليه السلام ما قال له في البلاغ أن ألأصلع أعطى للولد الصغير ظرف صغير وركب الددسن وفرك والعهده على الراوي,, لو قالها بهالشكل كان ابن داود نتف ريشه وقطع عرفه , لا, وانما قال أني وجدت .
شفت أخواننا الهداهد كيف يجيبون الخبر اليقين ؟.
الثانيه , تقول أن الرساله حاملها أصلع نسأل الله العفو , وأنا أقول مع أحترامي للصلعان , أنا عندي عقده منهم , وعمري ما لقيت أصلع يوثق فيه أو يعتمد عليه , لأن الشعر ما يحت من الراس ألا نتيجة نشفان في الدماغ , وهذا كلام علمي مبني على نتايج تبحثات سويتها على مجموعه من الصلعان قبل أسوي أبحاث البسيسات والحقه اللي تعرفونها .
الثالثه , ليش ما أفترضت أن الرساله مزوره من جهات عميله أو متصهينه ؟, وليش ما سعلت نفسك , ليش الدكتور مشعان يترك الدكتور منقاش اللي ما يجهله أحد , ويرسل الرساله على غير عنوانها , ويسلمها لغير راعيها؟.
الرابعه , أنا سبق وقلت لكم أن حكاية الصبر حكايه مفبركه من أجل التمويه وعباره عن غطا , والرجل أعلنها من باب التقيه , وقلت لكم أن الدكتور أحاسيسه مرهفه أو كما تقولون رومنسي أو هواوي , وسبق أنه وقع في حب جيزانيه خطفت قلبه وبسببها قرر يترك المنتدى والحلف والحلفاء لفتره كم أسبوع لبينما يروح يطيح على عتبة دار أهل محبوبته حتى يعطونه يدها وياخذها برجلها , ويبدو أنه أحتاج لشوية وقت حتى يتعلم اللهجه الجيزانيه قبل يطلب الحسب والنسب .
(والزبده , فصول هالمأساه المتسبب فيها من بدايتها ابو حسام الله يحفظه ويهديه , لأنه كان يبي يسوق المزرعه بعد طفش منها , لكن الزبون المرشح أنخطف قلبه وأخشى أنه ينخطف كله ويقعد ابو نقشه يحارب على عدة جبهات لوحده).

أما المخاوي فهو آخر واحد أحسب له حساب هو ومعه كل حلفاه التعبانين , وكما يقولون , لو حسبنا حساب العصافير ما ذرينا الدخن , وكل ما في ألأمر أني متبع معه سياسة العصا والجزره , يعني أعطيه بالعصا 99 مغطه , ومره واحده أشممه راس الجزره .