[منقاش]

ابو عبدالرحمن : السلام عليكم ورحمة الله وبركاته .
وغريب أنك هالمره ما أستفتحت كتابتك مثل عادتك الطيبه بالبسمله والسلام , لكن ما عليك طالما أن دوام الحال من المحال , وبعد :
يبن عمي كنت حاط عيني على هالسارفه لكنك سبقتني , ولا انا حاسدك عليها , والله يهنيك بها , وبعد :
نعم , الحربا تلون بلون محيطها, أن كان أخضر تلونت بألوان الخضره , وأن كانت صخره تلونت بلون الصخره , وهذي خاصيه عجيبه في الحربا تعوض بها خفة الحركه (لأنها في الغالب بطية الحركه) حتى تموه على أعداها وعلى فرايسها .
من هم أعداها ؟ ,ماني قايل لك .
وأترك الجواب لك , حتى ثاني مره أذا كتبت عن شي تكتب عنه كل شي والا تنحى عنه وتعطي القوس باريها وتخلي الكتابه لأبو نقشه .
ومن ضمن تمويه وتخفي الحربا أنها تحرك حركه أهتزازيه , وتحرك أطرافها بنفس الطريقه حتى توهم من يراها (وخصوصا فرايسها) أنها حركه أغصان ونوامي الشجره اللي تقف عليها وتحركها الرياح .
ومن ضمن غرايب الحربا أنها ما تطارد فرايسها مثل العناكب والفراش والجنادب والخنافس وغيرها من الحشرات .
لا ,,, من مسافة تنشن على الفريسه كما يوم ينشن الرامي على الهدف ثم يندفع لسنها المطاطي مثل الطلقه في خط مستقيم ويلتقط الفريسه خلال كسرمن الثانيه , ويرتد بها في حركه لولبيه ولا تستقر ألا في داخل فم الحربا.
ومن عجايب الحربا عيونها البارزه اللي تدور في حركه دايريه حتى تغطي كل عين ما في جهتها(ب 360 درجه أذا دارة بشكل عمودي , و 180 درجه أذا تحركت بشكل أفقي ) , وربما حركت كل عين في أتجاه غير أتجاه العين الثانيه .
ولا تستغربون هذي العجايب اللي منحها الخالق سبحانه للحربا , الحربا اللي تلعب دور حيوي في التوازن الطبيعي وتلتهم مع غيرها طفرة الحشرات , لا تستغربون وتذكروا أن فيه عجب في كل مخلوق خلقه الله , ومن أعجب العجايب أن بعض الحشرات وبعض أسماك الظلمات (قاع المحيط المظلم) يصدرمنها أضواء باهره وملونه وبارده .
وخير ختام أختم به هذا الرد أقول , أقطع وأخس يالمخاوي .