[ابوعهد]

عاشقة تشقي بقلب من طريق العشق هايب..
كم رضيت اسكت عليك من القهر وانتي زعوله

عاشقة جيتي ورحتي يالحبيبة يالعذولة
لابنيتي لي طموح ولا تركتيها خرايب..

اسمعي والكل منا له هواه وله ميــــــوله
تحسبين ان كل فعلاً تفعله يمناك صايب..

والله انك لو ذبحتي خــافقي لألقاك حولــه
خايف اضحك واستفزك واهجرك واعيش ذايب

ادعيت انك خجولة وادري ان انك خجولــة
وادري انك تخجلين الشمس من فوق السحايب..

مايحببني بقلبك يااحياتي الا فضــــــــوله
ولا ينسيني غرامك غير تكرار المصايب

تستبيحين القلوب وتستحقيــــــن البطولة
واستحق اعيش بعدك تايب واموت تـايب..

ياكثر ماشال قلبي شي اكبر من حمـــــوله
ولا عفيتي عن غلاهـ ولابخل لك بالوهايب..

كنه ارحم من همال المزن للــــــزهر بذبوله
وانتي اقسى من هجير القيظ وسموم اللهايب..

وانتي ادرى في غلاك بداخلي وش اللي يزوله
وادخلي دخله على الله واحفظي ذيك السـبايب..

ماخبرت اللحظة اللي حللت قربك تحوله
ولا هقيت اني بشدد للجفا قلب وركـــايب..

ولاهقيت انك تحبين الزلل وانتي جفوله
ولاهقيتك تكرهيني كثر حبك للطــلايب..

كن قلبي في وصالك وابل لحظة نــــــزوله
وفي فراقك مثل دمعة تنحدر من عين شايب..

كنت غصن كل كفاً غير كفك مايطـــــــوله
كنت قلب ودمعتين ودرب وجروح عطايب..

كنت ابيع العمر كله وأرخصه عرضه وطوله
للعيون الي هدبها ثامن الســـــــــــبع العجايب..

والرجل لو ماتحلـــى بالشهامه والرجولة
صدقيني صعب يقدر يملك قلوب الحبايب..

صدقيني مايوالـــــف خافق البنت بسهوله
بالهوى يابنت حواء غير طلاب النشايب..

والسهر والعشق الاول والهوى واللي ينـــوله
شي اقسى من همومك والعناء حاضر وغايب..