اغرب من الصدفه تصادفت ويـاه
بنفس المكان اللي جمعنـا حبايـب
الصاحب اللي غير الوقـت مبـداه
وثقة فيـه وردنـي منـه خايـب
كتمت جرحي عنه في يـوم فرقـاه
سويت نفسي عن هوى البيض تايب
رغم الوداع اللي رفع فيـه يمنـاه
ضحكة له والقلب وسطـه لهايـب
لامادرى انه تل قلبي مـن أقصـاه
وأنه سبب هاك الجروح العطايـب
كتمت جرحي قلت يمكنـي أنسـاه
يمكن يطيب الجرح لاصار غايـب
واخذت أحاول شهر شهرين ويـلاه
توي شباب وعقبه الـراس شايـب
أثره نسى عنـدي ملفـات ذكـراه
ليا بغيت أنسـى تهـب الهبايـب
ضحكه ودمعه والسهر مع محيـاه
لاخالطك يالليـل شقـر الذوايـب
أمسى معي واليـوم ليلـي بليـاه
مصيبةٍ ماهيـب مثـل المصايـب
حتى بعد لقيـاه فـي يـوم لقيـاه
ماقلت هجرك حط فوقـي نصايـب
مشيت من عنـده ولكنـي أبغـاه
عزيز نفسٍ شاف منـك العجايـب